На средбата се поздравени историските исчекори на Република Македонија во демократските процеси, добрососедските односи, членството во НАТО и отворените европски перспективи со одлуката на ЕУ за почеток на преговорите на Република Македонија со Европската унија, што се постигнати изминатиов период со храбро лидерство и голема политичка волја.
Премиерот Спасовски изрази благодарност до канцеларката Меркел, до германската Влада, до амбасадорот Герберих и до германската амбасада за огромната поддршка во сите специфични процеси во нашата држава, за искреното и големо пријателство од Сојузна Република Германија, како и од сите земји членки на ЕУ, со што позитивните резултати од овие големи процеси станаа реалност.
„Ви ја врачувам оваа плакета, како знак на огромна благодарност за сè што направивте лично и како претставник на нашиот голем пријател, Сојузна Република Германија, за Република Македонија и за нашите национални интереси", рече премиерот Спасовски.
На средбата е поздравена работата на Владата, за време на здравствената криза, како успешно справување со ситуацијата.
„Направивме сè да го заштитиме јавното здравје и да обезбедиме функционалност на здравствениот систем и покажавме дека, ако се сака институциите можат да функционираат. Ќе продолжиме со грижата за граѓаните и за државата", рече премиерот Спасовски.
Тој се заблагодари за поддршката од Германија и од ЕУ на нашата земја, во надминувањето на предизвиците од здравствената криза.
На состанокот се споделени информации и оценки околу можното траење на пандемијата и мерките за здравствена заштита што ќе се преземаат во услови на можно релаксирање на рестрикциите на движење.
Разговарано е и за други актуелни прашања. Оценето е дека Република Македонија покажала дека е вистинска демократска земја и очекувањата се дека низ реформските процеси ќе продолжи да се развива во таа насока, стои во соопштението од Влада на РМ.