Живот

Советот на ЕУ одобри мерки за справување со кардиоваскуларните заболувања

Советот на ЕУ денеска одобри пакет мерки насочени кон подобрување на кардиоваскуларното здравје во Унијата.

Советот на ЕУ денеска одобри пакет мерки насочени кон подобрување на кардиоваскуларното здравје во Унијата, фокусирани на превенција, рано откривање, третман и рехабилитација, со цел зајакнување на напорите во спречување на срцевите заболувања, кои се водечка причина за смртност во блокот.

Според унгарскиот државен секретар за здравство Петер Такач, кардиоваскуларните заболувања имаат разорно влијание врз поединците и нивните семејства, иако во повеќето случаи тие можат да се спречат со надминување на основните фактори на ризик и преку поздрав избор на начин на живот.

- Скринингот и подобриот пристап до третмани се суштински елементи за намалување на влијанието на кардиоваскуларните заболувања. Денешните мерки ја одразуваат нашата посветеност за подобрување на кардиоваскуларното здравје низ ЕУ, порача Такач, чија земја е актуелен претседавач со ЕУ.

Во одобрените мерки се повикува на посветување на особено внимание на превентивните инструменти, како што се подобрување на здравствената писменост, подигање на свеста за кардиоваскуларното здравје и обесхрабрување на изборот на нездрав начин на живот, како што се употребата на тутун, прекумерното консумирање алкохол или нездравата исхрана.

- Советот ги повикува земјите членки да обезбедат еднаков пристап до кардиоваскуларната здравствена заштита, да го вклучат скринингот во редовните здравствени контроли и да ја зајакнат обуката за здравствените работници. Советот ја повикува и Комисијата да преземе сеопфатна акција за да помогне во намалувањето на распространетоста на кардиоваскуларните заболувања во ЕУ, нагласувајќи ги не само унапредувањето и превенцијата на здравјето, туку и скринингот, раното откривање, третманот, рехабилитацијата и унапредување на истражувањето и иновациите, се наведува во соопштението на Европскиот совет.

Кардиоваскуларните заболувања влијаат на срцето и крвниот систем и вклучуваат срцева слабост, мозочни удари, срцева аритмија, висок крвен притисок и кардиомиопатија. Тие се причина за околу една третина од сите смртни случаи во ЕУ и се клучни придонесувачи за морбидитетот и инвалидитетот.

Овие заболувања, исто така, можат да имаат значително економско влијание, како врз здравствените системи, така и врз продуктивноста.

Одобрените мерки се во рамки на заложбите на унгарското претседателство со ЕУ, кое завршува на крајот на годинава и меѓу чии приоритетите е и намалувањето на товарот предизвикан од незаразните болести, особено од кардиоваскуларните заболувања./МИА

Македонија

Поднесено обвинение за „див“ паркинг во Чаир

По спроведена претходна постапка, јавен обвинител од Основното јавно обвинителство Скопје поднесе Обвинителен предлог против едно физичко и едно правно лице за кривично дело – Узурпација на недвижности од член 225 од Кривичниот законик.

Обвинетиот 47-годишник, сопственик и управител на обвинетото правно лице, зазел во владение туѓа недвижност – земјиште позади Здравствен дом Скопје – Поликлиника Битпазар. Земјиштето во државна сопственост, а доделено со право на користење на здравствениот дом и предвидено како имот во општа употреба во Деталниот урбанистички план на Општина Чаир, обвинетиот го користел како импровизиран паркинг простор. Во име и за сметка на правното лице поставил рампа и пункт за наплата и ангажирал едно лице да врши наплата по цена од 50 денари за 90 минути користење, со што го ограничил и го контролирал влезот и излезот на земјиштето.

Заедно со обвинението, јавниот обвинител до Основниот кривичен суд Скопје поднесе и посебен предлог за изрекување мерка на претпазливост – забрана за преземање определени работни активности, односно забрана да го користи предметното земјиште.

Култура

„Ризата на Богородица“ и „За нашиот доктор, а писател“ на Фестивалот „Богородичен покров“

Документарните филмови „Ризата на Богородица“  и „За нашиот доктор, а писател“ вечер се на програмата на 9. Фестивал „Богородичен покров“, што се одржува онлајн од 30 ноември до 7 декември на Youtube.

- Во изворите марамата на Пресвета Богородица се именува како риза, омофор или покров. Тоа не е покривка за главата, туку е горна облека која ја покривала главата и се спуштала до петите... Денес мал дел од Ризата се наоѓа во Успенската црква на московскиот Кремљ, друг - во лутеранската црква Св. Јован Крстител во Рим. Но, најголемиот дел се чува во катердалната црква на Божјата Мајка во Шартр, Франција, велат од Фестивалот „Богородичен покров“ во најавата за „Ризата на Богородица“, руски документарен филм во продукција на Добротворен фонд „Познание”

Автор и водител на филмот е митрополит Иларион (Алфеев), продуцент: Дмитриј Менделеев, а режисер: Марија Вилкасте. Документарниот филм трае 26 минути.

„За нашиот доктор, а писател“ е српски документарен филм за д-р Душан Радиќ, како што посочуваат од Фестивалот, великодушен и благороден дух, хуманист, со бројни богоугодни дела. Останува без родители, а на 18 години му ја ампутираат ногата. На земјата бил кратко, но, оставил значајна трага. Посветена жена, големо семејство, бројни раскази, роман... Основал и библиотека во Врњачка Бања. Умира во 1938 година, на 46 години.

Продуценти на филмот се Милан П.Киќевац и Бошко Милосављевиќ, кој е и сценарист и режисер.

Утре ќе биде прикажан чешкиот документарен филм „ŠTREIT: Фотографирам, значи постојам“, на 6 декември рускиот „Сакам да бидам светец“, а на последниот фестивалски ден, 7 декември - Историјата на црквата „Св.Великомаченик Димитриј“ - Скопје, македонски документарен филм.

Мисијата на Фестивалот е да ги негува и шири духовните вредности и да се едуцираат младите генерации во насока на духовност, љубов, добрина и хумани вредности.

Се одржува со благослов на архиепископот Охридски и Македонски г.г. Стефан.

Фудбал

Баерн загуби на домашен терен од Баер, Нојер доби црвен картон

– Баерн Минхен загуби од Баер Леверкузен во осминафиналето од Купот на Германија - 0:1. 

Натпреварот се одигра синоќа на „Алијанц Арената“ во Минхен.

Во 17. минута тимот од Минхен остана во малцинство бидејќи голманот Мануел Нојер доби црвен картон.

Стрелец на единствениот гол беше играчот од средниот ред Нејтан Тел, кој погоди во 69. минута, осум минути откако влезе како замена.

Баер по ждрепката ќе го дознае противникот за четвртфиналето.

притисни ентер