Оние што останаа во Скопје ја почитуваат мерката за забрана.

Коронавирусот најбрзо се шири во скопски Чаир, а ова според здравствените власти, се должи на непочитувањето на мерките. Меѓутоа овој пат воведениот 80 часовен полициски час засега се почитува

Откако се соопшти оти ќе има постојана забрана за движење цели 80 часа, огромен дел од граѓаните од Скопје решија да го напуштат градот, па евидентирани се 20.000 возила што пред стартот на полицискиот час, излегоа од него. Под препоставка оти во едно возило се превезувале најмалку по две лица, се доаѓа до бројка од најмалку 40.000 луѓе што ги напуштеле своите домови во главниот град за да одат во туристичките места, каде што полицискиот час е со паузи од 11 часа.

Но, епидемиолот Даниловски смирува оти ваквата постапка на големиот број граѓани не значи дека заразата ќе се прошири онаму каде што во моментот ја нема.

Според професорот Пановски, пак, овој полициски час нема да направи кој знае каква разлика, оти грешката е веќе направена, а ситуацијата е излезена од контрола.

Поради верскиот празник Задушница, од Владата решија да не се дозволи посета ниту на гробиштата.

За првпат се забрани посета на гробиштата. Вакавата одлука дел од претставниците на МПЦ ја оценија како атак врз нив, а дел ги повикаа верниците да одат во храмовите, онаму каде што нема полициски час.

Кризниот штаб на Владата одлучи повторно воведување на ригорозни мерки по драстичниот раст на кривата за заразени. Плановите за локални карантини за поединечни општини во Скопје каде што има најмногу заразени, паднаа во вода, а Владата реши рестрикцијата да трае 80 часа на ниво на целиот град. Забраната за движење без прекини освен за цело Скопје, важи и за Куманово и Липково, Штип со Карбинци и Тетово со сите околни општини. Во сите останати региони движење е забрането од 16 до 5 часот наутро.