Македонија

Скопје со денови е парализирано од неколку десетици граѓани

Во центарот на Скопје и денеска беа блокирани некои од клучните крстосници во шпицот на денот, што предвикува голема нервоза кај граѓаните.. Синоќа, за малку беше избегнат посериозен инцидент.. Михајло Видмлиски е пред Собранието.

Дванаесет дена центарот на Скопје е блокиран поради што отежнато се одвива сообраќајот низ целиот град. Причина за тоа се протестите кои секојдневно се одржуваат за што низ едната лента од булеварот пред Собрание нема проток на возила.

Приврзаниците на Македонија бојкотира го заземаа дел од паркот Жена борец од први декември кога уставните измени кои произлегоа од Договорот со Грција за името влегоа во собраниска процедура. Но денеска на местото каде што се поставени шаторите беше речиси празно. А група граѓани беа собрани на крстосницата кај Црвен крст. Велат дека протестот е пријавен за четири локации во градот. Намерата им е на овој начин да ги поттикнат и останатите граѓани да се приклучат на нивниот протест и најавуваат дека ќе останат најмалку до Нова година.

Со една блокирана лента сообраќајот се одвива отежнато и на булеварите околу Собрание. Редици од автомобили има на речиси сите улици. Поради метежот возачите се нервозни, мораат да кружат по околните сообраќајници.

Нервозни се и скопјани. Сметаат дека е неоправдано и неиздржливо блокирањето на сообраќајот затоа што во работните денови и со обврските отежнато им е движењето низ централното градско подрачје.

Експертите по човекови права велат дека секој има право на протест. Сепак универзитетската професорка Мирјана Најчевска вели дека нема потреба од менување на законската регулатива. Вели секој може да протестира додека не го загрозува правото на слободно движење на останатите граѓани.

Од МВР велат дека протестите секојдневно се најавуваат, а правото на мирен протест е загарантирано со Устав, па затоа не може да преземе ништо поради блокадите. Според Законот за јавните собири, под јавни собири на повеќе од 20 граѓани, се сметаат собирање на отворен или затворен простор заради остварување на забавни, културни, верски, хуманитарни, социјални, политички, економски, спортски или слични интереси на граѓаните, организирани заради јавно изразување на мислење или протест.

Свет

ЕП започна кампања за поттикнување на излезноста на Евроизборите

Европскиот парламент од денеска започнува кампања за поттикнување на граѓаните на ЕУ да учествуваат на Евроизборите закажани за од 6 до 9 јуни годинава, чија примарна цел е да се зголеми одѕивот на гласачите.

Идејата на кампањата е да се пренесе пораката: „Користете го вашиот глас, не дозволувајте толку лесно да ви биде одземена демократијата. Таа е дадена, вие треба да ја браните“.

Почнувајќи од првите директни избори за европратеници во 1979 година кога одѕивот беше 61,99 отсто, тој беше во опаѓање на секое следно гласање, паѓајќи под 50 проценти на сите избори по 1999 година, за да ја достигне најмалата излезност од 42,61 отсто во 2014 година. На последните избори за членови на Европарламентот во 2019 година, во сенка Брегзитот, одѕивот беше 50,62 проценти.

Во фокусот на кампањата се ставени историјата на демократијата во Европа, руската инвазија врз Украина и антидемократските трендови на континентот, со потсетување на искуствата на Европејците со диктатурте и војните, Холокаустот, Прашката пролет од 1968 година, падот на Берлинскиот ѕид, па се до и достигнувањата на европскиот мир.

- Демократијата е во опасност. Искористете го вашиот глас или другите ќе одлучат наместо вас, повикува Европарламентот.

За спроведување на оваа кампања Европскиот парламент издвои буџет од 37 милиони евра, што претставува 0,08 евра по глава на граѓанин на ЕУ со право на глас на Евроизборите.

Својата последна предвидена пленарна седница во сегашниот состав Европскиот парламент ја одржа минатата недела. /МИА

Забава

Почнаа првите проби за 68. издание на Евровизија

Почнаа првите проби за 68. издание на Евровизија. Клипови од првите проби може да се видат ексклузивно на официјалниот евровизиски профил на ТикТок, а фотографии на официјалната веб-страница на музичкиот натпревар.

Сите 37 песни што ќе учествуваат на натпреварот може да се слушнат и видат на евровизискиот канал на Јутјуб.

Годинава, натпреварот ќе се одржи во Малме, Шведска. На 7 и 9 мај ќе се одржат двете полуфиналиња, а големото финале е на 11. истиот месец.

Во моментов, според обложувалници на интернет, најмногу шанси за победа имаат песните на Швајцарија, Хрватска, Холандија, Италија и Украина. /МИА

Шоу биз

Отфрлена тужбата против Стивен Тајлер за сексуални напади на тинејџерка

Американскиот Федералeн суд на Њујорк го отфрли обвинението против пејачот на „Аеросмит“, Стивен Тајлер, за сексуална злоупотреба на тинејџерка.

Познатиот рокер беше обвинет за нешто што наводно се случило 1975 година кога двапати сексуално ја нападнал Жана Белино, која тогаш имала 17 години, а Тајлер - 27 години. Судијата Луис Каплан изјави дека тужителката која тврди дека пејачот сексуално ја нападнал, не може да бара отштета според законите на Њујорк.

Судот смета дека е залудно да се поднесе и изменета жалба и со тоа трајно го отфрли случајот.

Образложението вели дека случајот не може да се толкува ниту по двете неодамнешни државни регулативи - Законот за возрасни жртви и Законот за деца жртви. Судијата рече дека првиот ги опфаќа само луѓето кои имале најмалку 18 години кога станале жртви, а вториот не ги опфаќа барањата поднесени по август 2021. Белино ја поднела својата тужба во ноември 2023 година.

Стивен Тајлер ги одрече обвиненијата, т.е. наводите дека ја нападнал тужителката во телефонска говорница додека неговите пријатели се смееле во близина и дека ја малтретирал во хотелска соба истиот ден.