Свет

Поранешен амбасадор во САД: Нетанјаху го зајакнуваше Хамас преку Катар

Поранешниот израелски амбасадор во САД, Дени Ајалон, гостувајќи на Скај Њуз, го обвини премиерот Бенјамин Нетанјаху за нападите од 7 октомври, тврдејќи дека тој активно го зајакнувал Хамас, пренасочувајќи им пари преку Катар.

„Нетанјаху е главниот одговорен,“ изјави Ајалон, нагласувајќи дека израелскиот премиер дозволил милиони долари да стигнат до Хамас во готовина, што резултирало со изградба на воената инфраструктура на Хамас.

На прашањето дали Нетанјаху сноси лична одговорност за нападите, Ајалон рече: Апсолутно.

- Тој е оној кој ја надгледуваше или дизајнираше стратегијата за зајакнување на Хамас, обидувајќи се да ја подели палестинската територија меѓу палестинската управа во Јудеја и Самарија и Хамас во Газа. Тој е оној кој дозволи милиони долари да се слеваат во Хамас од Катар во куфери со готовина, кој во основа го изгради Хамас и неговата моќна воена инфраструктура. Мислеше дека ќе може да ја контролира ситуацијата и да го одложи решавањето на проблемот, но се се распадна. Тој е секако одговорен и ќе треба да одговори на многу прашања во оваа насока, изјави Ајалон.

Нетанјаху претходно ги отфрли како „смешни“ тврдењата дека го зајакнува Хамас за да ги подели Палестинците во ривалски политички табори.

„Голема лага е дека сакав да го изградам Хамас. Смешно. Не влегувате во војна со Хамас три пати или не преземате големи воени операции ако сакате да го изградите Хамас“, рече тој. /МИА

Свет

Украинската армија соопшти дека соборила руски борбен авион

Украинските сили објавија дека денеска собориле руски борбен авион, додека Русија тврди дека постигнала напредок во источна Украина.

Руски авион Су-25 бил соборен во близина на градот Константинивка, во областа Доњецк, изјави шефот на воената администрација на градот, Сергиј Горбунов, за украинската јавна телевизија. Објавените фотографии прикажуваат остатоци од авион, откако се урнал врз куќа, предизвикувајќи пожар.

Од своја страна, руските сили објавија дека денеска го зазеле селото Желане Друе, исто така во Доњецката област.

Доколку оваа информација се потврди, тоа значи дека селото паднало под руска контрола само три дена по повлекувањето на украинските сили од градот Угледар, кој се наоѓа на околу 33 километри оддалеченост, каде повеќе од две години се водеа жестоки борби.

Иако загубата на Угледар е малку веројатно дека драстично да го промени текот на војната, таа укажува на влошувањето на позицијата на украинската армија, делумно како резултат на одбивањето на САД да дозволат на Киев да изведува удари длабоко во руската територија, што спречува Украина да ја уништи руската воена моќ, забележуваат американски медиуми. /МИА

Свет

Хамас ја потврди смртта на свој командант при израелски напад во Северен Либан

Палестинската вооружена група Хамас денеска ја потврди смртта на уште еден нејзин командир во Либан.

Саид Аталах Али, еден од лидерите на Бригадите „Изедин ал Касам“ – военото крило на Хамас, е убиен во израелски напад врз бегалскиот камп Бедави, на околу пет километри северно од пристанишниот град Триполи, во Северен Либан, соопшти Хамас.

Либанската новинска агенција ННА објави дека сопругата и двете деца на Али исто така загинале во нападот.

Претходно, либански безбедносни извори информираа дека беспилотно летало погодило стан во палестински бегалски камп во близина на Триполи. /МИА

Фудбал

Манчестер сити без пораз 50 натпревари на домашен терен

Манчестер сити е без пораз на домашен терен 50 натпревари по ред.

Избраниците на Пеп Гвардиола денес го совладаа Фулам во натпреварот од 7. коло на Премиер лигата со 3:2.

Серијата без пораз на „Граѓаните“ на стадионот „Етихад“ трае 50 натпревари. Сити победи 41 пат во сите натпреварувања и девет пати ремизираше.

Последниот пораз на Сити на домашен терен е забележан на 12 ноември 2022 година во натпреварот со Брентфорд (1:2)./МИА

притисни ентер