„Господине Шолц, ве молам, сè уште сум жив. Не е доцна“, вели Рико Кригер додека седи со лисици во ќелијата.
Властите на Белорусија, диктаторска држава каде мачењето и политизираните судења се широко распространети, тврдат дека Кригер (30) минатата есен пристигнал во земјата по наредба на украинската разузнавачка служба, со цел да изврши терористички напад на пругата.
"Ова беше најголемата грешка во мојот живот. Ја признавам мојата вина, без сомнение", вели Кригер во дел од интервјуто. Во текот на 17-минутниот телевизиски пренос неколку пати се расплака. Белоруската тајна служба не ѝ доставила на меѓународната јавност никакви докази за наводните злосторства на Кригер.
Според неговиот профил на LinkedIn, Кригер претходно работел како медицински работник за германскиот Црвен крст и како службеник за безбедност во американската амбасада во Берлин. Германскиот Црвен крст потврдил дека тој работел таму, пишува Гардијан.
Германскиот весник Тагесшпигел го цитираше неговиот поранешен колега од организацијата кој потврдил дека Кригер им кажал дека бил регрутиран да патува во Украина. „Сите претпоставувавме дека оди како болничар“, истакнал колегата.
Белорусите тврдат дека Кригер направил неколку фотографии од чувствителни локации, а потоа поставил ранец со експлозив покрај пругата. Додаваат дека следела експлозија, во која немало повредени. Белорусија е единствената европска земја која ја задржала смртната казна.
Казните се извршуваат со еден куршум до задниот дел од главата, а посмртните останки тајно се закопуваат во необележан гроб. Можно е Белорусија, близок сојузник на Русија, да се надева дека ќе го вклучи Кригер во размената на затвореници меѓу Русија и Западот, за која се разговара веќе неколку месеци.
Се шпекулира дека телевизиското признание е дизајнирано да изврши притисок врз германската влада. „Времето е против мене. Тие во секој момент би можеле да ја извршат казната. Секоја секунда се каам за тоа што го направив“, нагласува Кригер, додавајќи дека не знае зошто германската влада не вложува поголеми напори да интервенира во неговиот случај.
Русија затвори голем број американски граѓани, меѓу кои и дописникот на Волстрит журнал, Еван Гершкович. Претседателот Владимир Путин сигнализираше дека е заинтересиран за договор според кој руските шпиони и атентатори затворени во странство ќе бидат вратени во Москва во замена за западните затвореници во Русија.
Сепак, Русија нема германски затвореници од висок профил, а Путин посочи дека негова главна цел во размената е Вадим Красиков, рускиот атентатор кој уби протеран чеченски командант во берлинскиот парк во 2019 година.
Германските власти не ги коментираа гласините за замена, но германското Министерство за надворешни работи претходно соопшти дека му даваат конзуларна помош на Кригер и дека „интензивно работат со белоруските власти во негово име“.
Денеска портпаролката на германската влада Кристијане Хофман изјави дека Шолц бил запознаен со случајот. „Како и целата влада, Шолц е загрижен за овие случувања, особено во врска со смртната казна“, рече таа на прес-конференција во Берлин.