Регион

Осуден поранешниот градоначалник на Драч, Ванѓуш Дако, претходно прогласен за непожелен за САД

Албанскиот специјален суд против организиран криминал и корупција, попладнево му изрече казна затвор во траење од 2 години и 8 месеци на поранешниот градоначалник на Драч, Ванѓуш Дако.

Под обвинение за „злоупотреба на службената положба“ и „фалсификување документи“, Специјалното обвинителство побарало 4 години, но поради согласноста за скратена судска постапка казната му е намалена.

Дако, кој беше уапсен во јуни годинава, како градоначалник, во 2011 година дозволил изградба на 11-катница во Драч која, според СПАК, била под сите критериуми, технички услови и незаконски и која настрада во катастрофалниот земјотрес во ноември 2019 година.

Второто обвинение се однесува на проектот „Крајбрежно шеталиште“, за кое според СПАК била „потрошена“ десетпати поголема сума пари од онаа што треба да се пресмета врз основа на Одлуката на владата, со што на државата и е нанесена штета од 18 милиони лека.

Тој, поради корупција, е меѓу оние кои до сега се прогласени за непожелни за САД, и е заедно на списокот со поранешниот премиер и екс шеф на државата Сали Бериша, поранешниот главен државен обвинител Адриатик Лала и поранешниот пратеник и бизнисмен Том Доши.

Дако е последователен висок функционер од редовите на владејачките социјалисти осудени по истата основа.

На почетокот на овој месец во случајот „инценератор во Елбасан“ беше осуден поранешниот министер за животна средина Лефтер Кока.

На Кока, кој беше уапсен во средината на декември 2021 година му беше изречена затворска казна во траење од 10 години, но поради согласноста за скратен судски процес, казната му беше намалена на 6 години и 8 месеци.

Во февруари годинава, пак, три години затвор доби поранешниот градоначалник на Кукс, Сафет Ѓици а на крајот на декември минатата година две години затвор доби градоначалникот на општина Булќиза, Лефтер Ала.

На сите осудени, кои се од редовите на владејачката Социјалистичката партија, им е одземено правото да вршат јавни функции во траење од три до пет години. /МИА

Формула

Џенерал Моторс влегува со свој тим во Формула 1

Формула 1 и Џенерал Моторс (ЏМ) постигнаа денеска начелен договор за влез на ЏМ/Кадилак како 11. тим во светскиот шампионат во Формула 1 од 2026 година.

„Посветеноста на Џенерал Моторс и Кадилак на овој проект е важна и позитивна демонстрација на еволуцијата на нашиот спорт. Сигурни сме во целосната соработка и поддршка од сите вклучени страни“, изјави претседателот и извршен директор на Формула 1, Стефано Доменикали.

Од своја страна, првиот човек на ЏМ, Марк Ројс, рече дека влезот во Формула 1 е чест за Џенерал Моторс.

„Како врв на мотоспортот, Формула 1 бара иновации и извонредност што ги поместува границите. Чест е за Џенерал Моторс и Кадилак да се приклучат на врвната светска тркачка серија, а ние сме посветени да се натпреваруваме со голема страст“, рече Ројс.

Тимот треба да го носи името Кадилак Ф1 и ќе користи мотори на Ферари во првите две години додека GM не добие мотор на Кадилак конструиран за натпреварување, почнувајќи од сезоната 2028 година./МИА

Свет

Медиуми: Договорот за прекин на огнот во Либан не предвидува зона на раздвојување

Израелскиот ТВ Канал 12 вечерва ги објави клучните елементи од предложениот договор за прекин на огнот меѓу Израел и либански Хезболах со посредство на САД за запирање на израелската војна во Либан.

Како што е наведено, остануваат да се финализираат само мали детали.

Договорот предвидува меѓусебен прекин на огнот и израелската армија да остане во Либан до 60 дена, а да замине кога ќе биде распоредена либанската армија.

Нема да има зона на раздвојување во јужен Либан и раселените жители од тој дел од земјата ќе можат да се вратат.

Владата во Либан ќе ги провери сите набавки и производство на оружје во нејзината земја, а САД ќе предводат меѓународно тело кое ќе го надгледува спроведувањето на договорот.

Во посебен документ, САД јасно ќе соопштат дека Израел има право да дејствува секогаш кога ќе види непосредна закана од Либан.

Канал 12 објави дека имало речиси едногласна поддршка за договорот од политичари и воени претставници синоќа на безбедносните консултации со кои претседаваше израелскиот премиер Бенјамин Нетанјаху.

На состанокот, Нетанјаху, наводно, рекол дека договорот ќе го остави Хамас изолиран и ќе ги зголеми шансите за постигнување договор за ослободување на заложниците кои се уште се во Појасот Газа. /МИА

Свет

Дипломатите на Г7 претпазливи оптимисти за можниот договор за прекин на огнот во Либан

Самитот во Фиуџи кај Рим е последниот собир на дипломатите на Г7 пред раководството во САД, во сенка на војните во Украина и на Блискиот Исток, да го преземе новата администрација со Доналд Трамп како претседател.

Министрите за надворешни работи на Групата седум (Г7) најразвиени индустријализирани земји во светот денеска изразија внимателен оптимизам за можниот напредок во постигнувањето прекин на огнот во вооружениот конфликт меѓу Израел и либанското милитантно движење Хезболах.

Самитот во Фиуџи кај Рим е последниот собир на дипломатите на Г7 пред раководството во САД, во сенка на војните во Украина и на Блискиот Исток, да го преземе новата администрација со Доналд Трамп како претседател. Прекините на огнот во Газа и Либан се главни на агендата на состанокот.

Италијанскиот министер за надворешни работи Антонио Тајани на отворањето на самитот рече дека „можеби“ е на повидок прекин на огнот во Либан и изрази надеж дека нема да има повлекување „во последен момент“.

На состанокот присуствуваат шефовите на дипломатиите на Канада, Франција, Германија, Италија, Јапонија, Велика Британија и САД, кои последен пат ги претставува администрацијата на претседателот Џозеф Бајден во заминување.

На состанокот за првпат присуствуваат шефовите на дипломатиите на земјите од таканаречениот „арапски квинтет“ – Саудиска Арабија, Египет, Јордан, Обединетите Арапски Емирати и Катар, а учествува и генералниот секретар на Арапската лига.

Тајани рече дека Италија понудила да преземе поголема улога од претходно во мировните сили на Обединетите нации во Либан, со цел да го следи спроведувањето на евентуалниот договор за прекин на огнот.

Пред почетокот на самитот, израелскиот амбасадор во САД, Мајк Херцог, изјави за израелското воено радио дека прекин на огнот може да се постигне „во рок од неколку дена“.

Неколку арапски министри повикаа на прекин на огнот и во Газа и во Либан, каде што се борат израелската армија и Хезболах.

„Арапскиот квинтет“ работи со САД на „ден после“ за Газа и постои чувство на итност да се направи нешто пред администрацијата на Трамп да ја преземе власта во Вашингтон, која се очекува цврсто да ги поддржува израелските интереси на сметка на аспирациите на Палестинците.

Египет на конференцијата повтори дека следниот понеделник ќе организира конференција во Каиро посветена на собирање хуманитарна помош за Газа, каде беснее војната меѓу Израел и палестинското милитантно движење Хамас.