Во пресрет на 23-октомври, Централниот комитет донесе одлука да ги разреши од партиските функции, потпретседателот Митко Јанчев, реформистот и член на ИК, Костадин Богданов, а постапка за исклучување од партијата да поведе за екс-министерот за здравство Тодоров и поранешниот шеф на УБК, Мијалков.

Причините за ваквите разрешувања се поради дејствување спротивно на интересите на ВМРО-ДПМНЕ и организирање на група за притисоци, уцени, закани и поткуп на опозициски пратеници за да гласаат за уставните измени, тврдат од партијата.

Довчерашниот потпретседател на партијата и градоначалник на Кавадарци, Јанчев ги демантира дека на било кој начин влијаел врз пратениците. Во телефонска изјава за Канал 5 вели оти очекува јавно извинување од Николоски за ваквите лажни обвинувања. Неговото разрешување, како што вели, е само поради различните ставови со партсикиот.

Разликите во ставовите со првиот човек на партијата го чинеа исклучување од пратиските органи и реформистот Богданов. Во разговор за Канал 5 вели дека разликите најмногу биле изразени во последните неколку месеци кога се актуелизирал Договорот од Преспа и дека со Мицкоски имаат спротивставени визии околу тоа по кој пат треба да се движи и развива партијата.

ТЕЛОП: Вчерашната т.н катарза ја гледам како ефтин театар за замајување на јавноста и членството, особено по петочниот пораз на агендата за изолација и дестабилизација на државата. Се направи обид таквиот пораз на aнтизападната агенда да се оправда со пресметка со раководството, со поборниците за евроатлатнскиот пат на државата. На тој начин раководството длабоко ја зацврсти својата антизападна реторика и дејствување.

Поранешниот шеф на УБК, Мијалков, одлуката за неговото исклучување од партијата ја смета за неисправна. Во изјава за Прес24 вели оти во овие моменти на партијата и е потребна инклузивност, обединување и разум, а не исклучувања.

„Јас сум убеден дека синоќешната одлука не е исправна, но тоа нема да ме поколеба во мојата определба за натамошна поддршка на модерно, десноориентирано ВМРО- ДПМНЕ, кое заедно со сите сестрински партии ќе ги брани интересите на Република Македонија во Европската Унија“ – изјави Мијалков, поранешниот шеф на УБК.

По синоќешната одлука на Централен за исклучување од партиските тела, се огласи е екс-миниситерот за здравство Тодоров.

„Ме исклучија од трансформираната фракција на ВМРО, трансформирана во Анти-западна, Анти - ЕУ и Анти-НАТО фракција, управувана од луѓе кои се водени и заробени од сопствената суета и кои практикуваат застарени методи на политичко дејствување наметнато од старите удбашки структури кои се уште се поклонуваат на туѓи антимакедонски и антизападни пропаганди и интереси. Во таква антиреформска, антизападна, недемократска и антимакедонска фракција на ВМРО јас не се пронаоѓам“, наведува Тодоров.

Почесниот претседател на партијата, Груевски, останува во ВМРО-ДПМНЕ. За него, како што рече Николоски, засега нема сознанија дека работел спротивно на интересите на партијата.

Ова не се први разрешувања во најголемата опозициска партија. Пред десетина денови еден од најгласните реформисти Петар Богојевски беше разрешен од функцијата заменик генерален секретар на ВМРО ДПМНЕ а од синоќа е и целосно исклучен и од членство во партијата.