Култура

Културен викенд во Ѓорче Петров: Магија на уметноста и фолклорот

Викендов во Ѓорче Петров беше исполнет со култура, уметност и заедништво, што ги обедини сите генерации на едно место. 

Во Домот за култура Ѓорче Петров, граѓаните имаа привилегија да уживаат во спектакуларниот мјузикл „Приказната за генијалната Матилда“, кој ги остави сите без здив. Младите таленти од нашата општина го покажаа својот неверојатен талент и страст, пренесувајќи магија на сцената.

„Оваа изведба беше вистинска гордост за Ѓорче Петров,“ изјави градоначалникот, Александар Стојкоски. „Нашите млади уметници го докажаа својот потенцијал и за нас е чест што ја поддржуваме нивната работа. Ова е уште еден доказ дека културата е силен столб во нашата општина.“

Од музичките нумери како „Гласно“, „Деца на револтот“ и „Училишна песна“, до извонредната актерска игра, вечерта беше исполнета со радост и емоции. Публиката беше фасцинирана од енергијата и креативноста на младите учесници, а Домот за култура беше преполн со поддршка за новата генерација на уметници.

Во неделата, пак, паркот во Ѓорче Петров блесна во духот на македонскиот фолклор со манифестацијата „Од Бистра преку Дервен до Ханриево: На гости во Ханриево“. Учесниците од седум културно-уметнички друштва ја оживеаја македонската традиција преку богати фолклорни танци и игри, создавајќи вистинска фолклорна магија во срцето на Ѓорче Петров.

„Оваа манифестација го покажува нашиот силен дух и нашата љубов кон македонската култура,“ нагласи градоначалникот. „Иако времето не ни беше наклонето, дождот не можеше да ја расипе атмосферата. Заедништвото и радоста што ги донесоа учесниците и публиката беа посилни од сè.“

Настанот заврши со заедничко оро, во кое сите присутни се фатија за раце и ја споделија радоста на фолклорот. Благодарност до сите учесници, организаторите од Едукативното фолклорно здружение „Седум осмини“, и до сите граѓани кои ни се придружија и го поддржаа овој културен викенд.

Општината Ѓорче Петров останува посветена на организирање на вакви настани кои ја промовираат нашата богата културна традиција и го обединуваат локалното население.

Македонија

Јанчев: Интензивно се работи на изградбата на кејот на реката Луда Мара до болницата

Интензивно се работи на изградбата на кејот на реката Луда Мара до Општа болница Кавадарци која ќе го дополни убавиот кеј кој се протега се до с.Ваташа.

Во тек е изградбата на минор коритото, ќе се постави ново улично осветлување и урбана опрема, ќе се продолжи кеј-шеталиштето што претходно беше најзапуштениот дел во нашиот град. Проект од особено значење за овој дел на градот. Финансиската конструкција за овој проект изнесува 1 милион евра.

Кавадарци за сите, објави на ФБ градоначалникот Митко Јанчев.

Шоу биз

Омилениот нискобуџетен филм на Тарантино

 Квентин Тарантино е познат по љубовта кон среднобуџетните и нискобуџетните тн. „Б-филмови“ и слични „жанровски експерименти“.

Оние филмови, пак, коишто тој ги режираше, како „Убиј го Бил“ 1. и 2. дел и „Отпорен на смртта“, се класици што неодоливо потсетуваат на акционите филмови од 1970-тите. Таа страст го навлекла режисерот и на култниот филм „Побрзо, маче, убиј, убиј!“ (Faster, Pussycat! Kill! Kill!) во режија на Рас Мајер, од 1965 година.

А пак, една од глумиците во тој филм - Сузан Бернард имала посебно влијание врз Тарантино. Следствено, нејзиниот син - режисерот Џошуа Џон Милер за „Колајдер“ (Collider) споделува како, додека работел на својот филм „Егзорцизам“, Тарантино неочекувано му се јавил...

- Тој ми рече: „Само што гледав филм со Вашата мајка, и тоа е најдобриот филм што некогаш сум го гледал, и никој не знае за тоа!“, открива Милер.

Тој тоа го сфатил како знак на поддршка и дополнителна мотивација да го заврши својот проект.

Филмот на Милер, во којшто глуми Расел Кроу, имал тежок пат до реализацијата. Снимањето почнало 2019 година, но пандемијата го одложило, па тоа продолжи дури во 2023 година „Егзорцизам“ беше премиерно прикажан на 21 јуни оваа година - на истиот датум, но пет години по смртта на Сузан Бернард. Тарантино, пак, дента го прикажа филмот „Побрзо, маче“ во полноќната програма на неговото омилено кино. Милер се пошегува:

- Ако не Ви се допаѓа филмот, внимавајте - мајка ми ќе дојде по вас.

Иако „Побрзо, маче, убиј, убиј!“ беше критички и комерцијален неуспех по издавањето, подоцна стана култно дело поради субверзијата на родовите улоги во 1960-тите. Очигледно, Тарантино го смета за еден од најдобрите филмови на сите времиња. /МИА

Македонија

Претседателката Сиљановска Давкова го прими Венко Филипче

Претседателката Гордана Сиљановска Давкова денеска го прими Венко Филипче, претседател на Социјалдемократскиот сојуз на Македонија и претседател на Националниот совет за евроинтеграции во Собранието.

На средбата беа разменети мислења за општествениот амбиент, со посебен акцент на политичките и безбедносните состојби.

Во разговорот Венко Филипче ја информираше претседателката за актуелните партиски промени врзани за изборот и конституирањето на новите партиски органи и функционери.

Во својство на претседател на Националниот совет за евроинтеграции, Венко Филипче ја нагласи потребата од активна соработка на Советот со Владата во функција на спроведување на Планот за раст и Реформската агенда.

Претседателката го информираше за нејзиното видување на евроинтеграцијата и можните решенија за отпочнување на преговорите со Европската Унија, соопштуваат од Кабинетот.

притисни ентер