Одсега нема да добиваат државни пари, а на нивно барање, ќе вратат и сума од 2,4 милиони фунти кои ги добија за реновирање на нивната куќа која сепак, ќе остане нивен дом. Во меѓувреме таткото на Меган Маркл, Томас Маркл, ја обвини неговата ќерка дека го „поефтинила“ кралското семејство.
Во интервјуто објавено еден ден откако бакингемската палата соопшти дека Хари и неговата сопруга веќе нема да се дел од монархијата, Томас Маркл, кој не зборува со својата ќерка, за каналот „5“ рекол дека Меган го отфрла „сонот на секоја девојка“.
„Тоа е разочарувачко бидејќи навистина го оствари сонот на секоја девојка. Секоја млада девојка сака да стане принцеза и таа тоа го доби и сега го одбива, а се чини дека тоа го прави за пари“, рекол Маркл.
Томас Маркл го опишал кралското семејство како „едно од најголемите најдолговечни институции“ и додал дека кога Меган се венчала за Хари, презеле обврска дека ќе „бидат дел од кралското семејство и дека ќе го претставуваат“.
Инаку, во соопштението на бакингемската палата,кралицата Елизабета напиша дека таа по состанокот со членовите на кралското семејство на 13 јануари се согласила со желбата на Хари и Меган да водат независен живот и оти е договорен преоден период, во кој тие ќе го поминуваат времето во Канада и Велика Британија.
Војводата и војводтката од Сасекс претходно го изненадија кралското семејство објавувајќи дека сакаат „нов работен модел“, што ќе им овозможи да поминуваат подолг период во Северна Америка и да бидат финансиски независни.