Костадиновска Стојчевска: Вкупната буџетска ставка за фолклорната дејност изнесува 46.8 мил.ден

 Вкупната буџетска ставка за 2023 година за фолклорната дејност изнесува 46.8 милиони денари.

Вкупната буџетска ставка за 2023 година за фолклорната дејност изнесува 46.8 милиони денари, од кои само за поддршка на програма и други корисници се издвоени над 41.5 милиони денари. Ова го истакна денеска министерката за култура Бисера Костадиновска Стојчевска.

Заменикот на претседателот на Владата за европски прашања Бојан Маричиќ, министерката за труд и социјална политика Јованка Тренчевска и министерката за култура Бисера Костадиновска Стојчевска, денеска ја посетија општината Ѓорче Петров.

- Работната посета во општина Ѓорче Петров ја започнавме од Центарот за култура каде остваривме средба со претставниците од едукативно фолкорно здружение „Седум осмини“ и Културно уметничкото друштво „Глигор Прличев“, кои се вистински пример како се чуваат културните вредности, традиција и народните обичаи, со пренесување на своето знаење на најмладите генерации, информираше министерката.

Таа нагласи дека Министерството за култура секоја година ја зголемува поддршката за проекти од областа на фолклорот, проекти кои се национален и државен интерес. Министерката додаде дека износот за финансирање и поддршка на фолклорот во континуитет продолжува да биде значаен дел од поддршката на културата во целост и прават напори за негово зголемување.

Костадиновска Стојчевска рече дека одобрените средства за проекти на конкурс за општини и локални установи, здруженија, културно уметнички друштва, ансамбли и физички лица изнесуваат 24.2 милиони денари, средства чии корисници се и едукативно фолкорно здружение „Седум осмини“ и Културно уметничкото друштво „Глигор Прличев“.

- Инвестираме во културата и се грижиме за традицијата. Вложуваме во едукативно информирање на младите поколенија од областа на фолклорот и запознавање со богатото народно творештво кое го носиме. Тоа е најдобриот начин да продолжат да ги чуваат македонската традиција, корените, јазикот, културата.

Остануваме заедно преку поддршка на проекти да ги поттикнуваме најмладите да станат дел култутрно-уметнички друштва и ансамли и кои ќе продолжат да ја негуваат македонската традиција дома, но и да ја афирмираат надвор од државата преку игри, песни и носии, подвлече министерката.

Таа истакна дека воспоставувањето на ваквата силна врска со сопствената традиција, создава здрава основа за зачувување на македонскиот идентитет.

- Затоа Министерството за култура продолжува и во иднина да помага за зачувување на културата и традицијата и посветено да работи за младите, да продолжат да ја пренесуваат културната традиција на следните генерации и да ја зачуваме атрактивноста и интересот за фолклорот, додаде таа.

Костадиновска-Стојчевска: Процесот на кој се заснова титулата Европска престолнина на културата не е поврзан со реконструкцијата на Универзална сала

Процесот на кој се заснова титулата Европска престолнина на културата, не е поврзан со реконструкцијата на Универзална сала, вели министерката за култура Бисера Костадиновска-Стојчевска.

Како што изјави денеска Костадиновска-Стојчевска, одговорајќи на новинарски прашања по посетата на Општина Ѓорче Петров, откако Скопје ја доби титулата, на властите им било кажано дека за шест месеци ќе дојде првата контрола од Европска комисија за да види што е сработено. Од тоа, потоа, ќе зависи дали градот ќе ја оправда титулата или не.

Според министерката, Универзална сала се уште е во надлежност на Град Скопје. Одлуката со која до завршување на реконструкцијата Универзална сала треба да се пренесе во надлежност на Министерството за култура, се уште не е формално потпишана од градоначалничката Данела Арсовска, иако се прават максимални напори за забрзување на постапката.

-Европска престолнина на културата е титула која културната сцена и културните работници во Северна Македонија и тоа како ја заслужија. Точно е дека носител е Универзална сала како национална установа, но процесот на кој се заснова Европска престолнина на културата, односно целиот тој проект не е поврзан со реализацијата, односно реконструкцијата на Универзална сала. Напротив, тој е поврзан со тоа како ќе работи сега тоа административно тело кое треба да се формира, односно треба носителот на проектот што е определен од Град Скопје да ги почне административните доекипирања на креативниот тим што треба да ја спроведе оваа апликација до крај, изјави Костадиновска-Стојчевска.

Во контекст на тоа, посочи Костадиновска-Стојчевска, потпишавме Меморандум за соработка помеѓу Министерство за култура и Град Скопје каде што, како што појасни, Министерство за култура ги понудило сите ресурси односно просторни и финансиски, настрана од гаранцијата дадена како поддржувачи во Европска престолнина на култура за 2028 година.

-Понудивме креативниот тим да работи во простор што ние ќе го обезбедиме во една наша национална установа, обезбедивме средства за да го помогнеме финансиски тимот, бидејќи сметам дека тука треба да седнат на маса сите заедно и тимот што беше заедно со мене и со градоначалничката во Брисел, тимот што помогна во 2018 година да се поднесе апликацијата, треба да има минимум два надворешни експерта кои треба да се изберат на јавен оглас. Сето тоа е главна задача на носителот на проектот, односно Град Скопје и градската администрација, објасни министерката.

Одлуката, нагласи министерката, се уште не е формално потпишана од градоначалничката Арсовска, што значи дека Универзална сала е се уште во надлежност на Град Скопје, иако е изгласан во Советот на Град Скопје пред околу 2,5 месеци.

-Токму затоа што веќе поминаа 2,5 месеца, ние интензивно, неколку пати, со ургенции се упатувавме до Советот на Град Скопје, до претседателот на Советот на Град Скопје и до градската администрација и до самата градоначалничка, да ја забрзаат целата постапка, бидејќи понатаму следат уште неколку чекори што треба да ги направиме за да може правото на реконструкција да биде пренесено на Министерството за култура. Тоа не е се уште направено и покрај тоа што пред две недели на техничко ниво се одржа состанок на претставници од Министерство за култура и од Град Скопје каде што беше понуден вид договор што не е соодветен со Одлуката што ја донесе Советот на Град Скопје. Затоа, ние повторно нивниот договор го корегиравме во насока на почитување на Одлуката што ја донесоа советниците за да може да се пренесе правото за реконструкција на Министерство за култура до завршување на таа реконструкција и потоа повторно да биде вратена на Град Скопје, но се уште немаме никаков одговор и покрај тоа што редовно целата документација беше испратена и до Град Скопје, и до советниците и до претседателот, рече Костадиновска-Стојчевска.

Како што потенцира, Министерството редовно се обраќа до сите во Градот.

-Ова е процес во кој мораме сите заедно да учествуваме. Универзалната сала и нејзиното нефункционирање навистина многу долго време се чувствува по националните установи и во развојот на културната сцена, напомена министерката.

Вчера и премиерот Димитар Коваќевски рече дека Владата се обидува да ја направи Универзална сала, но засега нема слух од Градот Скопје.

Бајден настапи пред дипломците на Морхаус колеџот во Џорџија

За време на церемонијата со врачувањето на дипломи некои студенти носеа црно-бели палестински шалови во знак на солидарност со Палестинците.

Претседателот на САД, Џо Бајден во денешното обраќање пред дипломците во Морхаус, високообразовна установа од Џорџија каде мнозинството студенти се афроамериканци, прати пораки од неговата предизборна кампања за зацврстување на врските со младите од етничките малцинства.

За време на церемонијата со врачувањето на дипломи некои студенти носеа црно-бели палестински шалови во знак на солидарност со Палестинците.

- Сакам сите да запаметите, кога не избраа први ни велеа дека нема да направиме ништо значајно. Но ние направивме се. Благодарејќи вам … Мошне многу ценам што ми дадовте можност за повторен настап тука, изјави претседателот во обраќањето до дипломците на Морхаус.

Тој говореше и за својот соперник на претстојните избор – поранешниот претседател Доналд Трамп.

- На овие избори многу е ставено на коцка, мошне многу. Станува збор не за мене, туку за алтернативата … Работата е во тоа што тој (Трамп) изложи што имено планира да прави (ако биде избран). И републиканците во Претставничкиот дом ќе кажат и моите колеги ќе кажат, што тие имено ќе прават ако победат, рече Бајден.

Колеџот Морхаус е основан во 1867 година како машки колеџ за школување на црномурести кои скоро биле ослободени од ропство. Еден од они кои дипломирале тука е и Мартин Лутер Кинг помладиот.

Морхаоус е голем град во Џорџија со има значајна улога во претседателската трка во 2024 година. Бајден овде во 2020 година стана првиот кандидат за претседател од Демократската партија кој доби поддршка од оваа држава по Бил Клинтон во 1992 година.

Бајден денеска попладне патува во посета на Мичиген, каде ќе учествува на настан организиран од Детроитски фонд за борба за слобода. /МИА

Алкалоид го освои трофејот во ракометниот Куп на Македонија

Ракометарите на Алкалоид се победници во Купот на Македонија, откако вечерва во финалето одиграно во СРЦ „Борис Трајковски“ во Скопје го совладаа фаворитот Еурофарм Пелистер со 25:23 по изведувањето пенали.

Ова е прв трофеј во својата куса историја за младиот тим на Алкалоид кој на завршниот турнир ги совлада најголемите две имиња во македонскиот ракомет, Вардар и Еурофарм Пелистер.

Во финалето двете екипи во повеќе наврати се менуваа во водство, највисокото беше четири голови разлика, за на крај победникот да биде решен по пенал-рулетот во кој се истакна голманот на скопскиот тим Иван Галевски.

Токму Галевски беше прогласен за најдобар голман на завршниот турнир, наградата за најдобар стрелец отиде кај Богдан Радивојевиќ, а за МВП Филип Кузмановски (двајцата од Еурофарм Пелистер).

Претходно во текот на денот, во женското финале, Ѓорче Петров го победи Чаир со 36:24. /МИА

Курти ѝ се пожалил на американската државна потсекретарка за заканите од Србија кон Косово

Курти ја изрази својата загриженост поради постојаните закани на Србија кон косовската држава.

Косовскиот премиер, Албин Курти на денешната средба со потсекретарката за јавна дипломатија на Стејт департментот на САД, Елизабет Ален, која престојува во Косово, ја изрази својата загриженост поради постојаните закани на Србија кон косовската држава, јави дописникот на МИА од Приштина.

Како што соопшти владината служба за информирање, Курти на средбата со Ален рекол дека „авторот и водач на терористичката и паравоена српска група“, која го изврши нападот во Бањска во северно Косово во септември минатата година, Милан Радоичиќ, сè уште е на слобода во Србија.

Косовскиот премиер изразил и жалење што барањето на Косово за членство во оваа институција не е ставено на агендата на Комитетот на министри на Советот на Европа за 17 мај.

„На средбата се разговараше и за односите меѓу Косово и Србија и за процесот на дијалог со посредство на Европската унија. По ова прашање премиерот Курти ја истакна важноста од целосно и безусловно спроведување на основниот договор и неговиот анекс. Во однос на патот на Косово кон евроинтеграциите, премиерот Курти изрази жалење што Комитетот на министри на Советот на Европа одби да го вклучи Косово во агендата за гласање на 17 мај, со оглед на тоа што Косово ги исполни сите критериуми за членство“, се вели во соопштението од кабинетот на премиерот.

Во текот на разговорот, Курти ја запознал Ален со „случувањата во земјата, напредокот во владеењето на правото, социјалните политики кои ги поддржуваат жените и децата, реформите во образованието со цел поврзување на образованието со пазарот на трудот, како и политиките и инвестициите во енергетиката“.

Курти изјави дека САД се сојузник и историски партнер на Косово и очекува зајакнување на меѓусебните односи во иднина, особено на полето на економијата и трговијата.

Пред да се сретне со Курти, американската дипломатка, Ален претпладнево се сретна и со претседателката на Косово, Вјоса Османи, со која потпиша договор за разбирање меѓу владите на САД и Република Косово, против манипулациите со информации од други држави. /МИА

притисни ентер