Вакцинацијата е најголемата заштита на здравјето од тешките заразни заболувања, порачуваат од службите за имунизација и епидемиолозите од Прилеп. Моменталната ситуација бележи пад на процентот, главно поради пандемијата и најмногу се чувствува кај првачињата.
Инаку, лани од 749 деца, се вакцинирале 713. Проблем настанува за втората доза кај првачињата.
- Корона пандемијата си го направи своето. Тие две-три години имаше помал опфат на вакцинација. Кај децата од прво-второ одделение има намален процент и кај девојчињата на 12 годишна возраст. Тоа е за ХПВ вакцината. Тука е најмал процентот на вакциирани. За безбедност да има на населението, треба да има 95 насто вакцинирани. Кај предшколските деца кои се во градинките, вакцинацијата е солидна и има висок процент на вакцинирани. За неделата на вакцинација, со повеќе активности ја спроведуваме кампањата. По градинките поделивме флаери, брошури, одржувавме едукации за да се поттикне свеста кај граѓаните за значењето на имунизацијата. Континуирано праќаме покани и се јавуваме телефонски. Од Министерството за здравство добивме и донација на два лаптопа за потребите на службите за имунизација, вели Зорица Шојлеска, главна сестра во Здравствен дом Прилеп.
Епидемиолшката состојба во градинките и училиштата е стабилна. Има само зголемен број на случаи на овчи сипаници со лесно прележување и не подлежи на вакцинација.
-Овој период е најчест за вирусните заболувања и за варичелата. Зголемено е отсуството на децата од градинките и училиштата токму поради вирусните инфекции и поради овчите сипаници. Пред ковидот во просек годишно се регистрирале околу 400 случаи на овчи сипаници. Од почетокот на оваа година се 238 случаи. Најмногу има овој месец и од почетокот на април се регистрирани 96 заболувања. Разбирливо, за време на пандемијата имаше мал број случаи, од 30 до 50 поради мерките. Најопфатени се децата до 14 години. Нема место за паника, бидејчи ова заболување е многу полесно кај децата и препорачливо е што порано да го прележат. Варичелата не подлежи на задолжително вакцинирање во календарот, објаснува епидемиологот Тања Мургоска Станимировиќ од Центарот за јавно здравје.
Во два века се покажа дека вакцинацијата е најдобра здравствена заштита и за искоренување на повеќе тешки заболувања. Пандемијата предизвика и епидемии во некои европски и соседни земји. Поради прекиот или одложената имунизација. Кај нас нема никаков проблем и опасност за епидемија.
-Како резултат на пандемијата во некои европски земји беше прекината вакцинацијата или одложена, како што е примерот со малите сипаници па се појавија епидемии. Кај нас, во Македонија, се потврди само еден случај на мали сипаници. Нема никаков проблем и епидемиолошката слика е ставбилна. Како што е случајот во Прилеп, вели Мургоска Станимировиќ.
Здравствените работници ги упатуваат граѓаните да се обратат кај нив за секаква информација кога е во прашање имунизацијата, зашто какви било информации на кои ќе наидат, особено на интернет, не го даваат вистинскиот одговор за значењето на вакцинацијата. Календарот за имунизација е задолжителен.