ЈСП: Тепачка во автобус бр.7, апелираме до политичките партии да ја смират тензијата

Вечерва во автобусот на линија бр.7 на автобуската постојка кај комплексот Банки се случи уште еден инцидент, поттикнат од политички тензии.

Апелираме до политичките партии да ја смират својата реторика во предизборниот период, да делуваат одговорно и да не користат реторика која ги потпалува тензиите меѓу граѓаните по кој било основ.

Истовремено, апелираме до МВР и техничкиот министер Панче Тошковски, кој е надлежен за спроведување на мирни, фер и демократски избори, да преземе одговорност и соодветни мерки за спречување на ваквата потпалувачка кампања која предизвикува нетрпеливост кај најмладите.

Апелираме, МВР да ги засили своите контроли во возилата од јавниот превоз, како и на автобуските постојки.

За среќа, во овој настан нема тешко повредени, а причинета е само минимална материјална штета (скршен прозорец) на автобусот која ќе се покрие со осигурувањето на возилото, соопштуваат од ЈСП Скопје.

Министерот Шаќири демантира дека основал медицински факултет на Универзитетот на Мерко

Од одредени политички субјекти сум прозван дека сум основал Факултет за здравствени науки при Меѓународниот универзитет во Струга. 

Некои пак споменуваат Факултет за медицински науки, а тоа се два различни поими. Нема да навлегувам во причините за ваквите објави, дали се тенденциозни или од незнаење, но оваа информација категорично ја демантирам.

Би сакал да појаснам дека министер не може да основа високообразовна установа. Тоа е цела постапка во која се инволвирани повеќе надлежни институции и органи, а меѓу нив и Министерството за образование и наука кое во суштина, има најмалку надлежности.

Основањето на една високообразовна установа, во случајов факултет во состав на веќе постоечки универзитет започнува со иницијатива на самиот универзитет, која најпрво треба да добие позитивно мислење, односно согласност од Владата. Потоа, Одборот за акредитација при Агенцијата за квалитет на високото образование го акредитира проектот доставен од универзитетот. Понатаму, следи носење на акти за основање и работа на факултетот од страна на матична комисија при универзитетот и дури потоа, по завршување на овие фази, врз основа на мислење на комисија за увид во исполнетост на условите за работа, во рамки на МОН, министерот за образование и наука носи одлука за исполнетост на условите и дозвола за почеток со работа. Во меѓувреме, Одборот за акредитација спроведува постапка за акредитирање на студиските програми, до чие завршување факултетот не може да запишува студенти. Оваа постапка е во тек.

Инаку, како и за повеќе други факултети, така и за овој – Факултет за здравствени науки каде ќе има тригодишни студиски програми за медицински сестри, а не студии за доктори, по доставениот извештај од страна на комисијата во МОН, потпишав Решение за исполнетост на условите за почеток со работа на високообразовната установа. Ништо противзаконски и ништо самоволно.

Министер за образование и наука

Доц. Д-р Јетон Шаќири

Претседателката Сиљановска Давкова се сретна со турскиот министер за надворешни работи, Фидан

Претседателката Гордана Сиљановска Давкова денеска во Скопје оствари средба со министерот за надворешни работи на Република Турција, Хакан Фидан, кој учествува на Самитот на шефови на држави и влади на учесниците во Процесот за соработка во ЈИЕ.

На средбата беа разменети мислења за севкупните билатерални односи меѓу двете држави, кои негуваат традиционално пријателски односи, со развој на соработката во повеќе сфери од заемен интерес, во духот на стратешкото партнерство и сојузништво во НАТО Алијансата.

Претседателката Сиљановска Давкова се заблагодари за севкупната поддршка што Турција ја дава на нашата држава, како на билатерален, така и на мултилатерален план и изрази очекување таа да продолжи и во иднина.

На средбата беше истакната и важната улога на турската заедница во земјата, што дополнително ги засилува добрите врски со Турција.

Претседателката Сиљановска Давкова и министерот Фидан разменија мислења и информации се актуелните состојби во поширокиот регион, како и за предизвиците по однос на македонските аспирации за членство во Европската Унија, соопштуваат од Кабинетот на претседателот.

Аџиите во Мека денеска кружеа околу Каба- веќе се собрале над 1,5 милиони верници

Муслиманските аџии во саудискиот град Мека денеска ја обиколија Каба, еден ден пред да се упатат кон блискиот пустински регион Мина за официјално да го отворат Хаџ, годишниот исламски аџилак што ги води верниците по патот на пророкот Мухамед.

Во областа околу Големата џамија во Мека напладне имаше голема гужва, додека верниците се молеа и правеа таваф, односно обиколка околу Каба, пренесува АП.

Според саудиските власти, од вторникот во земјата пристигнале повеќе од 1,5 милиони аџии.

Се очекува повеќе луѓе, а стотици илјади Саудијци и други кои живеат во Саудиска Арабија исто така ќе им се придружат кога официјално утре ќе започне аџилакот.

Големата толпа која кружи околу Каба ќе трае до утре, првиот ден од хаџот, кога аџиите заминуваат за Мина, по што ќе се упатат кон планината Арафат на ден на богослужба.

Хаџот потоа продолжува до Муздалиф, карпеста рамнина на неколку километри.

Таму, аџиите собираат камчиња за да ги користат во Мина, во симболичното каменување на столбовите што го претставуваат ѓаволот.

Еден од најголемите верски собири во светот, хаџот е еден од петте столбови на исламот, а од сите физички и финансиски способни муслимани се очекува барем еднаш во животот да одат на аџилак.

Оние кои се на хаџ го гледаат аџилакот како можност да ја зајакнат својата вера, да ги избришат старите гревови и да започнат одново.

притисни ентер