Мерцедес денеска во Силверстоун го претстави новиот автомобил W15. Британските медиуми пренесуваат дека челниците на Мерцедес се надеваат дека тимот оваа година би можел да им парира на возачите на Ред Бул.
Хамилтон, кој во кариерата освои седум титули во Ф1, на крајот од сезоната ќе се пресели во Ферари, додека другиот возач ќе биде Џорџ Расел.
- Претходната недела беше емотивна. Надреално е да се биде овде. На тимот му се приклучив во 2013 година. Јас сум со тимот 11 години и почнувам 12. Привилегија е да се работи со оваа група луѓе, кои вложуваат многу работа во текот на зимата. Тоа е највозбудливиот дел од сезоната, кога сите промовираат нови автомобили. Возбудливо е да ги испробувам на патеката“, рече Хамилтон.
Минатата сезона Мерцедес не оствари ниту една победа, што се случи за прв пат во последните 11 години.
- Целта е тимот да се врати таму каде што беше некогаш. Имавме неколку тешки години, кои беа наш темел и ни помогнаа да се прегрупираме – додаде британскиот возач.
Шефот на Мерцедес, Тото Волф, изјави дека е направен целосно нов дизајн на автомобилот.
- Имавме неколку приоритети за овој болид, ќе видиме дали го направивме вистинскиот чекор. Ова ќе биде последна сезона со Луис и сакаме да направиме брз болид. Знаеме дека ни претстои напорна работа, искачување на планина, на секое поле. Во овој спорт нема чуда, но нашата амбиција и одлучност се силни - изјави Волф.
Новата сезона во Ф1 започнува на 2 март со Големата награда на Бахреин.