Угостителите во Белгија на оригинален начин укажаа на своите проблеми ,бидејќи хотелите, рестораните и кафулињата се затворени скоро два месеци поради пандемијата на коронавирус.
Белите униформи на готвачите, одделени со низа црни, беа поставени во прави редови за да личат на гробишта на централниот плоштад во Брисел.
Корали Михаелс, една од организаторите на протестот, рече дека угостителите сакаат да ги посочат проблемите во овој сектор, што носи во белгиската економија околу 18 милијарди евра годишно и каде што работат 10 проценти од 11,5 милиони жители на Белгија.
„Треба да знаеме какви се мерките и да можеме да ги испланираме активностите во иднина“, рече Михаелс, чие семејство го поседува Restauration Nouvelle, компанија за ресторани и угостителство.
Белгија започна да ги олеснува рестриктивните мерки. Од понеделник, сите продавници ќе можат да бидат отворени. Сепак, баровите и рестораните ќе останат затворени барем до јуни.
Рестораните сè уште можат да нудат храна за надвор или да ја испорачуваат, а некои избрале да ги хранат бездомниците за време на карантинот. Други им доставуваат храна на здравствените работници.