Свет

Гершкович поднесе жалба до судот во Москва за продолжувањето на притворот

Американскиот репортер Еван Гершкович денеска поднесе жалба до московскиот суд во врска со последната одлука за продолжување на притворот за обвинение за шпионажа, која тој ја негира.

Гершкович, репортер на „Волстрит Џурнал“, беше уапсен на 29 март во градот Екатеринбург во регионот Свердловск, во централна Русија, за наводна шпионажа, што во Русија е кривично дело казниво до 20 години затвор, пренесуваат британските медиуми.

Не е одреден датум за судење, но минатиот месец притворот на Гершкович беше продолжен до 30 ноември. Тој е во притвор во московскиот затвор Лефортово.

Неговите две претходни жалби поднесени до руските судски власти во април и јуни не вродија плод.

САД тврдат дека Русија го користи Гершкович за да ја спроведе, како што велат, „заложничката дипломатија“ во време кога односите меѓу двете земји паднаа на најниско ниво во последните 60 години поради конфликтот во Украина, наведуваат британските медиуми.

Македонија

Состојба на патиштата

Интензитетот на сообраќај на патните правци надвор од градските средини е зголемен. 

СОСТОЈБА: Сообраќајот на државните патишта се одвива непречено, по суви коловози.

ФРЕКВЕНЦИЈА: Интензитетот на сообраќај на патните правци надвор од градските средини е зголемен. Се бележи поголем интензитет на сообраќај на граничните премини Богородица и Табановце.

На останатите гранични премини од македонска страна, нема подолги задржувања за влез и излез од државата.

ВНИМАТЕЛНО: АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани –Делчево.

АМСМ ИНФОРМАТИВЕН ЦЕНТАР

Тел. (02)15-555

Фудбал

Гвардиола: Не исклучувам дека ќе ми биде продолжен договорот

Тренерот на англискиот фудбалски шампион Манчестер сити, Пеп Гвардиола не ја исклучува можноста за продолжување на договорот.

- Разговараме со клубот многу години. Не исклучувам дека договорот ќе биде продолжен. Реков дека би сакал да останам затоа што навистина го мислам тоа. Девет години во еден клуб е вечност. Сакам да бидам сигурен дека ова е вистинската одлука за клубот, за играчите, изјави Гвардиола за британските медиуми.

Шпанецот го води тимот од 2016 година. За тоа време, Манчестер сити шест пати стана шампион на Англија, а ја освои и Лигата на шампионите, Суперкупот на Европа и Светското клупско првенство.

Свет

Во Франција и утринава нарушен железничкиот сообраќај

Одредени возови во Франција и денеска беа во прекин, еден ден по „масовниот и добро подготвен“ напад врз мрежата на брзите возови (ТГВ), извршен неколку часа пред церемонијата на отворање на Олимписките игри (ОИ) во Париз.

Состојбата се подобрува, но железничкиот сообраќај и денеска ќе биде нарушен, со доцнење на возовите од најмалку еден час.

Француската железница СНЦФ синоќа соопшти дека ќе биде обезбеден превоз за олимписките спортисти и нивниот персонал.

Неколку пожари избувнаа ноќта меѓу четвртокот и петокот на мрежата на ТГВ. Пресечени и запалени се некои кабли, а запалени се и сигнални кутии. Таа опрема покрај специјалната пруга за тој тип возови дава безбедносни информации за машиновозачите.

СНЦФ го означи нападот како саботажа, а париското обвинителство отвори истрага.

Нападот се случил неколку часа пред церемонијата на отворање на Олимпијадата, во време кога многу патници планирале да патуваат во Париз.

За време на викендот околу 800.000 патници ќе бидат погодени од нарушениот железнички сообраќај, кој е омилено и најпрактично превозно средство за Французите.

притисни ентер