Македонија

Евробарометар: Мнозинството македонски граѓани имаат доверба во ЕУ

Мнозинството граѓани на Македонија или 56 отсто имаат доверба во Европската Унија, покажуваат резултатите од есенското истражување на Евробарометар за 2024 година. 

Исто ниво на доверба кон ЕУ како македонските државјани, изразуваат и граѓаните на Босна и Херцеговина. Меѓу останатите земји кандидати за членство, довербата кон ЕУ е најголема во Албанија со 81 отсто, пред Црна Гора со 75, Косово со 70 и Грузија со 58 проценти. Пониска доверба кон ЕУ од македонските државјани изразуваат Молдавците и тоа од 52 отсто, што сепак укажува дека мнозинството граѓани на Молдавија, како и на останатите споменати земји кандидати веруваат во Унијата.

Пониска доверба кон ЕУ од 50 отсто имаат државјаните на Турција и тоа од 42 проценти и граѓаните на Србија од 38 отсто. Сепак, и ова податоци претставуваат пораст на довербата во ЕУ за четири проценти во Турција и за два отсто во Србија споредено со овогодишното пролетно истражување.

Доверба кон ЕУ од 38 проценти изразуваат и жителите на Велика Британија, што претставува пораст за шест отсто.

Кога станува збор, пак, за граѓаните на ЕУ, мнозинството од нив или 51 отсто веруваат во Унијата, што претставува највисоко измерено ниво на доверба на Европејците кон блокот во последните 17 години.

Според овие податоци, на рекордно највисоко ниво е и поддршката на Европејците за еврото, тие имаат пооптимистички поглед кон иднината и би сакале да видат посилна и понезависна ЕУ, особено во услови на актуелните глобални предизвици. Најголема поддршка кон ЕУ или 59 отсто од испитаниците искажале младите Европејци на возраст од 15 до 24 години.

Иста поддршка како кон ЕУ од 51 отсто, Европејците изразуваат и кон Европската комисија, со што таа е на највисоко ниво од 2007 година.

Речиси три четвртини од испитаниците или 74 проценти од државјаните на земјите членки на ЕУ изјавиле велат дека се чувствуваат како граѓани на ЕУ, што претставува највисоко ниво во повеќе од две децении, додека 61 отсто од Европејците се оптимисти околу иднината на ЕУ.

Речиси седум од десет испитаници или 69 отсто се согласуваат дека ЕУ има доволно моќ и инструменти за да ги брани економските интереси на Европа во глобалната економија, а ист процент се согласуваат дека Европската Унија е место на стабилност во денешниот проблематичен свет.

Една третина од Европејците или 33 отсто сметаат дека главен приоритет на дејствувањето на ЕУ на среден рок треба да бидат безбедноста и одбраната, 29 проценти тоа треба да биде миграцијата, за по 28 отсто економијата и животната средина, а за 27 проценти здравјето. Во исто време, 44 отсто од европските граѓани сметаат дека обезбедувањето мир и стабилност ќе има највисоко позитивно влијание врз нивниот живот на краток рок, следено со обезбедување на храна, здравствена заштита и индустриски резерви и со справувањето со миграцијата, со по 27 проценти.

Кога станува збор за специфични области за дејствување на ЕУ во областа на заштитата на животната средина, 38 отсто од Европејците веруваат дека приоритет треба да се даде на користењето на енергија од обновливите извори, 31 проценти на инвестициите во одржливо земјоделство, а по 28 отсто во изградба на енергетска инфраструктура и инвестирање во чиста технологија.

Истражувањето регистрира и досега најголемата поддршка за заедничката европска валута, која на ниво на цела ЕУ изнесува 74 отсто и само во Еврозоната 81 процент. Кога станува збор за перцепцијата за состојбата на европската економија, 48 отсто од Европејците сметаат дека таа е добра, додека 43 проценти оценуваат дека е лоша.

Дури 76 отсто од европските испитаници сметаат дека руската инвазија врз Украина претставува закана за безбедноста на ЕУ.

Од таму, 87 проценти од анкетираните се согласуваат со обезбедување хуманитарна поддршка на луѓето погодени од војната во Украина, 71 отсто ги поддржуваат економски санкции кон руската влада, компании и поединци, а 68 проценти се согласуваат со обезбедување финансиска поддршка за Киев. Околу 60 отсто од Европејците одобруваат ЕУ да и додели кандидатски статус на Украина, а 58 проценти се согласуваат Унијата да го финансира купувањето и снабдувањето со воена опрема за земјата.

Ова есенско истражување на Евробарометар е спроведено помеѓу 10 октомври и 5 ноември во 27-те земји членки на ЕУ, во девет од земјите кандидати и потенцијални кандидати за членство во Унијата (сите освен Украина), како и во Велика Британија. Само во ЕУ со анкетата биле опфатени 26.525 граѓани.

Македонија

Пренџов: Иако Владата наследи рекордни 12 милијарди долгови, БДП бележи раст од 3%

„Во изминатиот период од 2017-2024 година, според Светска банка, македонската економија растела во просек со 1,1% годишно. “

„Честопати од оваа говорница зборував дека да не постои влада, да не постои државна управа, економијата сама од себе ќе расте повеќе од 1,1% во просек годишно. Она што ме интересира е она коешто беше објавено, она коешто е добро и позитивно, а тоа е дека конечно БДП не е 1%, како 7 години секоја година по еден процент“, изјави пратеникот од редовите на ВМРО-ДПМНЕ, Љупчо Пренџов, на седницата посветена за пратенички прашања и постави 3 прашања кон претседателот на Влада, Христијан Мицкоски.

Пренџов, во однос на првото прашање зборуваше во делот на економијата, односно она што значи подобар живот за граѓаните. Објасни дека иако Владата наследила рекордни 12 милијарди долгови и блокирани сметки, сепак БДП повеќе не е 1% и дека забележан е раст од 3% што значи движење во правилна насока.

„Она што ме интересира е она коешто беше објавено, она коешто е добро и позитивно, а тоа е дека конечно БДП не е 1%, како 7 години секоја година по еден процент. За само неколку месеци имаме 3% раст. Имаме најава и се објавени 8 нови инвестиции во рамки на македонската економија, се ветуваат поголеми плати, се реализираат поголеми пензии“ , дециден е Пренџов.

Пренџов објасни дека изминатиот период само се слушале најави, дека “ќе“ се гради нешто, но не виделе ништо реализирано, нешто од кое граѓаните ќе имаат корист, а повеќе од 30 милијарди евра биле потрошени. Оттука, Пренџов праша што во следната година ќе биде готово, што ќе биде реализирано, во поглед на инфраструктура, во енергетика, токму во интерес за граѓаните. Третото прашање се однесуваше токму за расчистување на криминалот и корупцијата и дали ќе продолжи со исто темпо.

„Она коешто покрај економијата, покрај подобриот живот, а граѓаните се интересираат тоа е право правда и расчистување со криминалот и корупцијата. Почитуван премиер, имавме многу јавно обелоденети сознанија и документи во изминатиот период за криминал во РЕК Битола, покрај овој епски криминал со Лотарија, разбивање на терористички ќелии и други девијантни појави коишто се случувале во македонското општество, а никој не ги пресекол. Ме интересира за случајот РЕК Битола, дали јавноста ќе дознае на кој начин се испумпувале парите на граѓаните од страна на РЕК Битола и нивното тогашно раководство“, заклучи Пренџов.

Шоу биз

Се огласи хрватската полиција за апсењето на српската пејачка Гога Секулиќ

Пејачката Гога Секулиќ и пејачот Александар Мисојчиќ, попознат како Ксандер, се приведени синоќа на граничен премин во Хрватска.

Како што потврдија од Сплитско-Далматинската полиција, тие илегално ја преминале границата на преминот каде што е дозволено само со валидна гранична пропусница, објави Телеграф.

- Лицето е сопрено веднаш при влез во Република Хрватска од страна на полициски службеници од граничната полициска станица Вргорац. Од проверка на идентитетот е утврдено дека се работи за 32-годишен државјанин на Република Србија. При понатамошна проверка, констатирано е дека наведеното лице илегално ја преминало границата на премин на кој минување е дозволено само на лица кои поседуваат важечка гранична пропусница, што е јасно означено со истакнати натписи. Поради опишаниот прекршок, сторен спротивно на член 5 од Законот за контрола на државната граница, на 32-годишната ѝ е изречена прекршочна наредба - наведуваат во соопштението од Сплитско-далматинската полиција.

Да потсетиме, Гога Секулиќ и нејзиниот колега Александар Мисојчиќ, попознат како Ксандер, синоќа доживеале непријатност на граничниот премин меѓу Босна и Хрватска.

Пејачката била приведена на граница на 25 декември, додека Ксандер бил накратко уапсен поради недоразбирање.

Гога проговори и ексклузивно откри за Телеграф што всушност се случило синоќа на границата:

- Точно е, имавме проблем на граница. Поточно дошло до недоразбирање. Навигацијата нѐ доведе до граничен премин кој не работи, тоа не го знаевме. Рампата беше спуштена, видовме полициска кола. Во меѓувреме ни се јавија сопственикот и менаџерот да прашаат кога пристигнуваме на проба на звукот, бидејќи целиот клуб е распродаден, бидејќи денес им е празник. Инаку читам секакви работи по порталите, јас сум една од омилените пејачки во Хрватска, а сега пишуваат дали сме имале работни дозволи откако сме се обиделе да влеземе пешки, сето тоа е невистинито. Вистината е дека дојдовме до граница која не работи и еден колега мавна на полицијата да праша и во тој момент влезе и тие рекоа дека Ксандер е уапсен. Ни рекоа дека ако преминеме и нас ќе нѐ уапсат и дека ќе платиме голема казна. Потоа ми рекоа мене и остатокот од тимот да дојдеме во станицата.

Пејачката рече дека сите имале уредни документи и работни дозволи. Таа откри колку долго останал нејзиниот колега и колку пари требало да плати за казната.

- Тој беше таму неколку часа, а ние останавме додека го проверуваа бидејќи бевме со неговиот автомобил. Шефот пристигнал на станицата да го земе и Ксандер ја платил казната. Отидовме во клубот на проба за звук и буквално почнуваме да пееме за една минута.

Казната што ја платил пејачот, како што изјавила Гога, била околу 500-600 евра, само затоа што ја пречекорил границата. Пејачката изјави дека истото би го поминала доколку направела чекор понатаму како колешка.

- Бидејќи постојано нè прашуваа кога ќе пристигнете, јас реков „Ајде да ја кренеме рампава да поминеме. Среќа што не го направив тоа, мислам дека немаше да излеземе до следната година“ – низ смеа вели таа и потоа додава:

- Беа премногу љубезни, не можам ништо да кажам. Само рекоа: госпоѓице Гого Секулиќ, оди на главниот премин, колегата Ксандер е приведен и те чека во станица. Беа потребни неколку часа.

Како што вели, Гога со уште еден музичар и возач го чекала колегата да излезе од станицата и потоа се упатиле на главниот премин за да стигнат до закажаниот настап.

- Потоа отидовме на главниот премин каде што беа Босанците, тие беа љубезни...а и тимот на хрватската граница беше многу љубезен. Тие рекоа дека им е жал што не можат да дојдат на шоуто бидејќи работеле. Им честитавме Божиќ и чекавме да излезе нашиот колега. За среќа колегата Ксандер е мирно момче, сѐ помина во најдобар ред – истакнува Гога и потоа на шега додава:

- Размислувам, Боже, само нека ме уапсат за да се одморам малку од оваа брзање и стрес.

Пејачката вели дека само ги прашале вработените на граница како да стигнат до тој град и дека нејзиниот колега само направил чекор, поради што лошо си поминал. Гога уште еднаш истакнала дека имаат соодветни работни дозволи и дека ги чекал полн клуб каде едвај чекаат да настапат.

Свет

Истрагата покажа дека руската против воздушна одбрана го соборила авионот во Казахстан (ВИДЕО)

Прелиминарните резултати од истрагата потврдија дека азербејџанскиот патнички авион на компанијата АЗАЛ, кој вчера се урна во Казахстан, бил соборен од рускиот противвоздушен систем Панцир-С.

Овој шокантен инцидент предизвика сериозни реакции и го покрена прашањето за безбедноста на цивилниот воздушен сообраќај во близина на конфликтните зони.

Авионот Е-190, на компанијата АЗАЛ, кој летал на релација Баку - Грозни, бил погоден додека се приближувал до Грозни. Според порталот Caliber.az, рускиот систем Pancir-S истрелал проектил кон авионот, додека системите за електронско војување ги парализирале комуникациите на авионот. Како резултат на тоа, авионот исчезнал од радарите додека бил во рускиот воздушен простор и повторно се појавил над Каспиското Море.

Екипажот, дезориентиран од електронските пречки и оштетувањето на авионот, се обидел да го пренасочи леталото на безбедна дестинација. Аеродромот во Грозни одбил да го прими авионот, а слична ситуација имало и на аеродромите во Махачкала и Минерални Води. Авионот на крајот бил насочен кон Актау, Казахстан.

Видео снимката од внатрешноста на авионот покажува двајца патници повредени од шрапнели, додека очевидци пријавиле експлозии надвор од авионот. Се шпекулира дека целта била авионот да се урне во Каспиското Море, со што би биле елиминирани сите сведоци, но засега тоа останува непотврдена теорија.

Во моментот на инцидентот, руската противвоздушна одбрана била фокусирана на соборување на украински беспилотни летала кои, според Хамзат Кадиров, претседателот на Советот за безбедност на Чеченската Република, го нападнале Грозни утрото на 25 декември. Иако нема жртви или материјална штета, се поставува прашањето зошто руските власти не го затвориле воздушниот простор за цивилни летови, со што би се избегнала ваква трагедија.

За азербејџанската страна ситуацијата е јасна. Баку инсистира Русија официјално да ја признае одговорноста за соборувањето на авионот, да му се извини на народот на Азербејџан и да спроведе темелна истрага за да ги изведе одговорните пред лицето на правдата.

Иако руските власти директно не го коментирале инцидентот, шпекулациите за намерно прикривање ја разбрануваа меѓународната јавност. Во моментов, многу аналитичари ја доведуваат во прашање безбедноста на цивилниот воздушен сообраќај во конфликтните зони.

Овој инцидент укажува на итната потреба за подобра координација меѓу цивилните и воените власти во контролирањето на воздушниот простор, особено во близина на конфликтните области. Непочитувањето на меѓународните протоколи и непрогласувањето зона на забранети летови дополнително ги загрозува патниците и екипажот.

притисни ентер