- Вчера во 14 часот во Кочани, полициски службеници го лишиле од слобода О.Ц., на возраст од 38 години. Тој се сомничи дека околу 12.30 часот во угостителски објект во Кочани се однесувал агресивно и со пиштол удрил едно женско лице, појаснуваат од МВР.

Подоцна, при претрес во неговиот дом и во неговото возило „ауди“, извршен со судска наредба, биле пронајдени и одземени пиштол калибар 7,65 мм, 25 куршуми - калибар 7,65 мм и лисици за врзување.

Лицето било задржано во полициска станица. По целосно документирање на случајот, против него ќе биде поднесена соодветна пријава.

Граѓаните од кумановската населба „Перо Чичо“ бараат од јавното претпријатие за железничка инфраструктура Железници на Република Македонија да го прошири тротоарот на улицата „Ѓорче Петров“ под надвозникот кој е дел од изградбата на трасата од пругата кон Бељаковце. Тие велат дека тротоарот е претесен и не можат да се разминат двајца пешаци, ниту пак да поминат родители со колички за деца или пак лица со попреченост кои користат колички за движење.

Од ЈП ЖРСМ велат дека направената експертиза на постоечкиот подвозник покажала дека не ја задоволува носивоста и е неопходна санација на постоечкиот или изградба на нов подвозник.

- Работите се одвиваат согласно ревидиран и одобрен проект. Сообраќајот под подвозникот е регулиран и се одвива согласно одобрен сообраќаен проект за времен режим од страна на СВР Куманово и Општина Куманово, и е во интерес на безбедноста на патничкиот сообраќај, информираа од претпријатието.

Оттаму наведуваат дека градежните активности ќе завршат до средината на јуни, годинава.

Вкупната должина на железничката пруга која поминува на подрачјето на Куманово изнесува 12, 5 километри.Дел од активностите се одвиваат во густо населено подрачје.

Една од трасите поминува низ населбата Бавчи, од над маркет сè до Спомен костурницата. Таму општината предвиде изградба на улица, но поради стратешкиот проект ќе почека на реализација. Од општина Куманово информираа дека за овој дел од изградбата на стратешкиот и националниот проект веќе се одржани средби со претставници на претпријатието.

Планираниот надвозник во населбата „Перо Чичо“, ќе овозможи лесна и безбедна комуникација на населбата со останатиот дел од градот.

Шпанија, Малта, Ирска и Словенија наскоро официјално ќе ја признаат државата Палестина, што би можело да ги поттикне и другите земји од ЕУ да го сторат истото, изјави денеска високиот претставник на Европската унија за надворешна политика и безбедност Жозеп Борел.

Тој потврди дека добил гаранции од шпанскиот министер за надворешни работи Хозе Мануел Албарес дека Мадрид официјално ќе ја признае Палестина на 21 мај. Борел рече дека Белгија сега нема да ја признае „независна Палестина“, но оти Брисел „не ја исклучува“ таа можност во иднина, пренесува шпанска РТВЕ.

Министерката за надворешни работи на Словенија, Тања Фајон, вчера изјави дека словенечката влада ја почнала процедурата за „признавање на независна, суверена држава Палестина“.

Фајон објасни дека одлуката на словенечката влада се заснова на „границите меѓу Израел и Палестина од 1967 година, што значи дека територијата на Палестина би ги опфаќала Појасот Газа, Западниот Брег и Источен Ерусалим“.