Македонија

Честитка за Божик од МАЕИ и градоначалникот на Пустец

Честитка по повод Рожедството Христово - Божик упатија единствената македонска партија во Албанија, Македонска алијанса за европска интеграција (МАЕИ) и градоначалникот на општина Пустец Пали Колефски.

-Почитувани Македонци од православна вероисповед во Албанија, во овие свети денови кога го славиме Рождеството Христово – Божик, Ви упатуваме искрени честитки исполнети со топлина, љубов и надеж, посакуваат од МАЕИ.

Овој празник на светлината и мирот, се додава, нека ги исполни вашите срца со радост, а вашите домови со благосостојба, здравје и хармонија.

Порачува дека Божик е време за сплотување, зајакнување на семејните вредности и за прославување на нашата вековна македонска традиција и идентитет.

-Македонска алијанса за европска интеграција, како единствената политичка партија која го претставува и штити македонскиот народ во Албанија, останува посветена на зачувување на нашето културно наследство и на унапредување на правата на Македонците. Нека оваа година биде година на нови успеси за македонската заедница, на повеќе единство и солидарност меѓу сите нас. Со Божји благослов и со радост во срцата, ХРИСТОС СЕ РОДИ, стои во честитката потпишана од партискиот лидер, Васил Стерјовски.

Во честитката во негово и име на Советот на општина Пустец и општинската администрација, Колефски потсетува дека е „прекрасна традиција одбележувањето на Божик- Рождеството Христово".

-На сите наши сограѓани и на сите што го слават овој свет ден им посакуваме здравје, среќа и хармонија во нивните домови! Нека биде овој ден извор на благослови за сите, стои во честитката на Колефски.

Овој еден од најголемите празници го честиташе и македонското друштво „Илинден"-Тирана.

Култура

Отворен конкурс за пријавување за седмото издание на „Филмај“

Фестивалот на краток филм „Филмај“ соопшти дека е во тек конкурсот за пријавување за седмото издание, што се организира од фото-кино клуб „Козјак” – Куманово.

Преку платформите „FilmFreeway“ и „festhome“ може да се пријават кратки играни филмови со траење до 20 минути и завршени по 1 јануари 2023 година. Конкурсот е отворен до 15 март 2025 година.

Како што соопштија од фестивалот, филмовите може да конкурираат за награда „Лазар Ѓорѓевиќ” за најдобра режија, награда „Радислав Ристевски” за најдобра фотографија/кинематографија, награда „Koзјак” за најдобрo сценарио и награда „Филмај" за најдобар краток филм. Македонските домашни филмови кои ќе се пријават, освен за најдобар македонски филм, истовремено влегуваат и во меѓународна конкуренција за горенаведените награди.

Тековните новости и информации ќе бидат објавени на фејсбук страницата на фестивалот.

Свет

Во израелски воздушни напади во Газа загинаа најмалку пет лица, меѓу кои две бебиња

Во израелските воздушни напади загинаа најмалку пет лица во Газа, вклучително и две бебиња, објавија денеска палестинските здравствени власти.

Еден проектил погоди куќа во централниот град Деир ал Балах, при што загинаа двајца мажи и една жена, соопшти болницата Ал Акса.

Болницата објави дека го примила и телото на четиримесечното момче кое беше убиено во напад на неговата семејна куќа во блискиот бегалски камп Буреиј.

Во градот Газа тринеделно бебе е убиено во воздушен напад на куќа во населбата Шеик Радван, соопшти Министерството за здравство, кое е под контрола на Хамас.

Израелската војска тврди дека е насочена само кон милитантите, кои ги обвинува дека се кријат меѓу цивилите./МИА

Македонија

Неготино доби современо фудбалско игралиште

Реализиран уште еден инфраструктурен проект на министерството за спорт.

Министерот за спорт Борко Ристовски заедно со градоначалникот на општина Неготино, Горан Стојанов, денеска го пушти во употреба реконструираното фудбалско игралиште, уште еден во рекордно време реализиран проект на Министерството за спорт за подобрување на спортската инфраструктура.

Реконструираното фудбалско игралиште во Неготино направено е по сите стандарди на ФИФА и ќе биде достапно за граѓаните во секој период од годината.

-Над 15 вакви игралишта планираме да бидат готови до крајот на летото. Еден убав проект, една убава работа што почнавме да ја правиме, а тоа е да создадеме услови за најмладите што е особено важно. Ние не можеме да бараме резултати, ниту пак зголемување на интересот на децата за спортот, во конкретниов случај за фудбалот, доколку не им создадеме услови. Ова е една наша акција што ќе продолжи и во иднина, ќе реконструираме што е можно повеќе спортски игралишта низ целата држава. Цениме дека тоа е патот по кој треба да се развива спортот затоа што ова има значење за сите граѓани, прво на локално, а потоа и на централно ниво. Затоа што прво ние треба да направиме масовност кај дечињата, да создадеме услови за што повеќе дечиња да се занимаваат со спорт, а потоа од таа масовност и квантитет да добиеме и квалитет – истакна Ристовски.

Министерот Ристовски изрази задоволство од брзата реализација на уште еден инфраструктурен проект на Министерството за спорт упатувајќи благодарност до градоначалникот на општина Неготино, Горан Стојанов за добрата соработка

-Му честитам и му благодарам на градоначалникот на општина Неготино за добрата соработка за брзо отпочнување на реконструкцијата на ова фудбалско игралиште и посакувам што повеќе млади спористи да го користат овој терен – рече Ристовски.