Битола подготвена за завршниот Ф8 турнир во купот „Благоја Георгиевски-Буштур“

По 17 години Битола ќе биде домаќин на кошаркарскиот Куп на Македонија „Благоја Георгиевски-Буштур“.

Во организација на кошаркарскиот клуб Пелистер, од 15 – 17 февруари во салата „Боро Чурлевски“ осум екипи ќе се борат за вредниот трофеј во македонската кошарка.

На денешната прес-конференција, претставници на екипите учесници на турнирот ги искажаа своите очекувања за претстојните четвртфинални средби.

Бранителот на трофејот, МЗТ Скопје Аеродром во четвртфиналето ќе се соочи со Гостивар.

- Одиме на 12 титула во купот. Гостивар има искусен тренер и знае како се играат вакви натпревари. Нема да биде лесно. Сепак одиме на победа и трофеј, рече Марко Миловановиќ, талентираниот играч на аеродромци.

Јордан Давитков, тренерот на Гостивар, очекува неизвесни натпревари.

- Екипите се доста изедначени. Ќе мора сите да се помачат за да дојдат до победа. На крај нека победи најдобриот. Во купот нема фаворити. Се случувало и многу послаби екипи да извојуваат победи. Имаме проблеми со повредени играчи. За МЗТ Скопје илузорно е да се трошат зборови. Во последните години тие се најдобра екипа. Ќе се обидеме да дадеме отпор, па ќе видеме на крајот што ќе се случи.

Дебитантот на купот, Чаир ќе се сретне со Еуро Никел.

- Во четвртфиналето имаме противник со извонредни индивидуалци. Ние сме во серија од три победи во домашното првенство. Доаѓаме во Битола да се натпреваруваме, а не со бело знаме, истакна Недим Мустафица, играчот на Чаир.

Тренерот на Еуро Никел, Атанас Манев очекува тежок натпревар.

- Задоволство што сме помеѓу осумте најдобри. Изминатите четири-пет дена имавме два тешки натпревари. Сега сме фокусирани на четвртфиналето со Чаир кон кого имаме максимален респект. Ние исто како и тие имаме своја математика. Ни преостанува да се подготвиме добро и да се претставиме во најдобро светло.

Тимот на Работнички за да стигне до 11 трофеј ќе мора во четвртфиналето да го совлада ТФТ кој има амбиција за втора куп-титула.

Горан Самарџиев, тренерот на Работнички изјави: „Како играч го освојував купот многу пати. Сега сум во друга улога. Работнички секогаш оди на победа. Ќе дадеме максимум за да дојдеме до трофејот.

Неговиот колега од ТФТ, Ботро Смилковски изјави: „За нас купот секогаш ќе остане специјално натпреварување. Одговара на менталитетот на нашата екипа. За некој да го освои купот треба да е физички добро подготвен. Противник ни е Работнички кој се чини дека се враќа на старите патеки. Ние се фокусираме на натпреварот со нив, а сонуваме финале и трофеј. Моменталниот скор со нив ни е 1-1 во четвртфиналињата. Се надевам дека ќе им поведеме во меѓусебните средби.

Последната двојка е Пелистер – Феникс.

Дарко Радуловиќ, тренерот на Пелистер посакува победа пред домашната публика.

- Очекувам тродневен спортски маратон со убави натпревари. Феникс традиционално е незгоден противник на Пелистер. Ние изминатите две недели одигравме 5-6 натпревари и сме истрошени физички. Се надевам дека во овие неколку дена ќе се подготвиме добро и размислуваме само на четвртфиналето. Очекувам со победа да ја израдуваме нашата публика.

Предводникот на Феникс, Денис Дервишевиќ, исто така изрази амбиција за највисок пласман.

Ние лани игравме финале, оваа година дојдовме да го освоиме купот. Пелистер е квалитетна екипа, натпреварот ќе биде тежок, но нашата цел е трофејот.

Успешни настапи на сите учесници на турнирот им посака градоначалник на Битола, Тони Коњановски.

-Се надевам дека ќе имаме убав спортски викенд и полна сала на натпреварите во купот. Повик до сите љубители на кошарката во убав и спортски амбиент да Битола е еден од градовите кои издвојуваат многу за спортот. Битола е град на спортот, а така ќе биде и понатаму, нашата поддршка продолжува, истакна Коњановски.

Организаторот на турнирот се одлучи за популарни цени на билетите - 100 денари за целодневна програма, односно за 300 денари може да се следат сите седум натпревари на целиот турнир.

Алегри прв тренер кој освоил 1000+ бодови во Серија А

Предводникот на Јувентус, Масимилијано Алегри е првиот тренер кој стигнал до повеќе од 1.000 бода во Серија А.

Јувентус денес на домашен терен славеше над Фросиноне (3:2) во 26. коло од Италијанското фудбалско првенство.

Ова е 301. победа на Алегри на турнирот, со 99 нерешени и 96 порази. Тој има 1.002 бода во Серија А.

Да потсетиме дека Серија А започна во сезоната 1929/30. Пред сезоната 1994/95 во Италија за победа се доделуваа 2 бода, а оттогаш по три.

Масимилијано претходно беше тренер на Каљари, Милан, Сасуоло и Удинезе. /МИА

Украинскиот премиер побара од САД економска помош во износ од 11,8 милијарди долари оваа година

Украина очекува да добие 11,8 милијарди американски долари економска поддршка оваа година, изјави денеска нејзиниот премиер Денис Шмигал.

Киев се соочува со буџетски недостиг од 37 милијарди долари во 2024 година поради двегодишната руска инвазија и се потпира на западните партнери за оваа витална помош.

Шмигал изрази надеж на форумот во Киев по повод втората годишнина од руската инвазија дека американските пратеници ќе ја одобрат долгоочекуваната економска и воена помош.

„Длабоко сме убедени дека САД нема да ја напуштат Украина“, рече тој, мислејќи на помошта од 60 милијарди долари што со месеци беше блокирана во американскиот Конгрес. /МИА

Абас го повтори своето противење на плановите на Израел за операција во Рафа

Абас денеска во разговор со јорданскиот крал Абдула Втори во Аман изјави дека се противи на израелските планови за воена операција во Рафа.

Претседателот на палестинската управа Махмуд Абас денеска во разговор со јорданскиот крал Абдула Втори во Аман изјави дека се противи на израелските планови за воена операција во Рафа, најјужниот град во Појасот Газа, каде што има повеќе од милион Палестинци.

Повеќето од тие Палестинци заминале во Рафа бегајќи од борбите во другите делови на енклавата, објавија медиумите на арапски јазик.

Абас и јорданскиот крал разговараа за последните случувања во војната меѓу Израел и Хамас во Газа, како и за напорите за зголемување на количината на хуманитарна помош за Палестинците во енклавата, особено нејзиниот северен дел.

Во разговорот беше истакната потребата да се дозволи слобода на вероисповед за Палестинците во џамијата Ал Акса за време на претстојниот Рамазан, откако минатата недела беше објавено дека израелската влада размислува да го ограничи бројот на луѓе на кои ќе им се дозволи да влезат, објави Тајмс оф Израел. /МИА

притисни ентер