Признанието го прими на настанот „Women in Music“ во Њујорк.
- Мојот успех е што ја завршив турнејата и што секоја вечер имав настап. Меѓутоа, мајчинството беше мој најголем предизвик. Да се биде добра мајка и уметник - тоа е предизвик - рече Мадона.
Таа продолжи во свој стил, сосема искрено.
- Ви благодарам што ја признавте мојата способност да ја продолжам кариерата 34 години, во лицето на бруталниот сексизам, константното насилништво и злоупотреба!
Мадона ја раскажа својата приказна и потенцираше дека се излажала кога мислела дека е слободна во индустријата. Има едни правила за мажите а други за жените.
Ако си жена, рече Мадона, дозволено ти е да бидеш убава, не смееш да старееш и не смееш да бидеш многу паметна. Треба да бидеш од оние жени на кои им е добро само покрај маж. Никако не смееш да ја покажуваш својата сексуална фантазија. Мажите можат, се разбира!
Прв пат почувствувала голема омраза од сите, кога се развела од Шон Пен.
- Ме нарекуваа ку..а, вештерка. Тогаш сфатив дека жените ги немаат истите слободи како мажите.
- Мислам дека најконтроверзната работа што ја направив е што сум уште овде. Мајкл го нема, Витни ја нема, Принс, Тупак, ги нема, Ејми Вајнхаус ја нема, Дејвид Боуви го нема. Но јас сум уште тука. Јас имам среќа и секој ден ги бројам благословите!
Таа рече дека жената мора да застане на своите нозе, да не бара поддршка и одобрување од мажите.
- Жените биле толку притиснати што мислат дека е важно што имаат мажите да кажат за нив. Има и мажи што вредат но не затоа што се мажи, затоа што се луѓе што вредат. Како жени, мора да ја цениме нашата вредност и вредноста на другите жени. Најдете силна жена да се спријателите со неа, да земете инспирација и поддршка од неа, да учите од неа, да соработувате, да ја поддржувате, да бидете просветлени! - повика Мадона.
Мадона заплака во текот на говорот, кога се заблагодаруваше на поддршката од фановите сиве овие години.
- Не е толку важно за наградата колку за можноста да застанам овде и да се заблагодарам. Не знаете колку значи поддршката! Но и сите што ме мразеа и велеа нема да можам, не смеам да можам, сите тие ме направија борец каков што сум денеска, жена каква што сум денеска. Ви благодарам!
/извор: billboard.com