Премиера на „Секс, лаги и љубомора" во Струмичкиот театар

Во Народниот театар „Антон Панов" од Струмица утре премиерно ќе биде изведена класичната фарса „Секс, лаги и љубомора" од Марк Камолети во режија на Синиша Евтимов, кој ја потпишува и сценографијата за претставата.

Според режисерот Евтимов, станува збор за текст напишан во шеесетите години од минатиот век и до денес повеќе од успешно живее на сцените ширум светот.

-Ова е мое трето доаѓање тука во последните шест години и тоа што е променето кај мене, од последниот пат кога работев овде, е што успеав да се профилирам во работењето на одреден жанр, што сметам дека во моментот најмногу ме возбудува и токму поради тоа се занимавам сериозно со него, и тоа е дел од еден омнибус мои претстави кои можат да се видат ширум сцените во Македонија. Многу сум задоволен од целокупниот процес и од екипата, составена од претежно млади актери и ретко кога јас сум најстар во екипата и навистина уживавме додека ја работевме претставата, рече режисерот Синиша Евтимов.

Актерката Јасмина Вучкова истакна дека во процесот на подготовката на претставата имале голема слобода во работата со режисерот.

-Морам да истакнам дека првпат работам со режисер кој дава толку голема слобода на актерот во процесот на работа. Уживав во процесот затоа што слободно го креирав и го градев ликот кој го играм во претставата, рече актерката Вучкова.

Во комедијата настапуваат и Анкица Бенинова, Јулија Милкова, Стојан Велков Трн, Коста Ангов и Танкица Стојанова.

Според раководителот на струмичкиот театар, Драган Маџиров, билетите за двете премиерни изданија за утре и в четврток се продадени, а за петок е закажана трета изведба./МИА 

Денеска продолжува судењето за случајот „Рекет“

Денеска ќе може да се слушнат разговори помеѓу првообвинетиот во случајот „Рекет“, Бојан Јовановски и осудениот Зоран Милевски Кичеец.

 Откако вчера шефицата на обвинителството за борба против организираниот криминал и корупција, Вилма Рускоска, се согласи да се презентираат и снимките кои минатата недела беа прикажани на судење затворено за јавноста, заради заштита на приватноста.

Јовановски бараше и на  минатото рочиште бараше да се прикажат  сите докази пред новинарите од УСБ-то на Кичеец, велејќи дека на тој начин ќе се отвори Пандорината кутија во судскиот процес, а се согласи новинарите да ги слушнат и неговите приватни разговори со Кичеец затоа што така ќе дознаело како Милевски манипулирал со него.

И поранешна специјална јавна обвинителка Јанева бараше јавно да се прикажат сите снимки според кои ќе се видело кој нуди поткуп, а кој рекетира.

Владата ќе ја одржи редовната 10. седница

Владата денеска ќе ја одржи редовната 10-та седница на која меѓу точките е и разгледување на годишниот извештај за работата на Дирекцијата за безбедност на класифицирани информации за 2019 година.

На предлог на Министерството за економија на седницата, која е предвидено да започне во 12:00 часот, е и извештајот за работата на Националниот комитет за олеснување на трговијата согласно обврските од Спогодбата за олеснување на трговијата во рамки на Светската трговска организација.

Владата на седницата ќе го утврдува и текстот на предлогот за закон за ратификација на Спогодбата помеѓу Владата на Република Македонија и Владата на Република Србија за заедничко признавање на доверливи услуги кои се користат во Република Македонија и Република Србија.

На предлог на Министерството за правда за оваа седница е предвидена и презентацијата на информацијата со извештај за реализација на Програмата за обесштетување на дете кое е жртва или е оштетено со дејствие кое со закон е предвидено како кривичнo делo на насилство и на други акти на индивидуално или групно насилство за 2019 година.

Медиумите кои сакаат реклами за изборите, да се регистрираат и да достават ценовник до ДИК

 Течат роковите за предвремените парламентарни избори закажани за 12 април.

 До утре на полноќ радиодифузерите, печатените медиуми и интернет порталите, доколку обезбедуваат платено политичко рекламирање за учесниците во изборната кампања за предвремените избори за пратеници во Собранието се должни да се регистрираат во ДИК.

Тие треба да достават барање за упис во регистар на радиодифузери, печатени медиуми и интернет порталите до ДИК, а кон барањето задолжително се приложува тековна состојба издадена од Централниот регистар.

Врз основа на поднесените барања за упис, ДИК ќе изготви Регистар на радиодифузери, печатени медиуми и интернет портали кои ќе даваат услуги на платено политичко рекламирање за време на предвремените избори за пратеници. Регистарот по прифаќање на барањата на седница ќе биде јавно објавен на интернет страната на Комисијата.

Медиумите се должни во рок од пет дена од денот на распишувањето на изборите да утврдат ценовници за платено политичко рекламирање за изборите. Ценовниците се доставуваат до ДИК најдоцна на 21 февруари на полноќ.

На првата седница на ДИК во неделата по распишување на изборите, претседателот на Комисијата Оливер Спасовски ги соопшти највисоките и најниските цени за политичко рекламирање за медиумите.

За секунда за телевизија највисока цена за платено политичко рекламирање е 112 денари (евро и 83),  а најниска е 12, 30 денари (0,2 евра), за секунда за радио 40, 50 денари (0,66 евра), а најниска 2 денари (0,03 евра). Во весниците, 24.907 денари за една внатрешна црно бела страница или 32.628 (530, 53 евра) една внатрешна во боја, а најниската е 19.372 (315 евра) за една внатрешна црно бела страница или 25.953 денари (422 евра) за една внатрешна страница во боја.

Сумата која може да се исплати на еден електронски медиум (интернет портал) и печатени медиуми од еден учесник во изборниот процес, не може да биде поголема од 15.000 евра во денарска противвредност.

Медиумите се должни ценовниците за платено политичко рекламирање да ги порименуваат и за време на изборната кампања и притоа цената по секунда за платено политичпко рекламирање и цената за закуп на рекламен простор во печатениот медиум да не ја надминува просечната цена на рекламирање пресметана во последните пет изминати изборни циклуси. Ценовниците не смеат да се менуваат до конечно завршување на изборниот процес.

Од парите што ги има ДИК за платено политичко рекламирање за учениците на изборите 45 отсто отпаѓаат за партиите од коалициите на власт, 45 отсто во опозиција и 10 отсто за останати вонпарламентарни партии и групи избирачи.

Медиумите кои нема да се регистрираат во ДИК и нема да бидат во Регистарот и кои нема да достават ценовници во предвидениот законски рок, нема да имаат право да користат финансиски средства за платено политичко рекламирање за изборите 2020 обезбедени од Буџетот.

Според известувањето од ДИК, учесникот во изборната кампања не може да нарача платено политичко рекламирање од медиумите кои не се регистрирани во Регистарот и да ги исплати од средства на трансакциската сметка за изборна кампања.

притисни ентер