Живот

„Ефектот зора“ може да биде опасен – Еве кој сè мора да биде внимателен од 3 до 8 часот наутро

Со ова нарушување не смеете да си играте.

„Ефектот зора“ е нарушување кое најчесто ги погодува дијабетичарите, а се работи за нагол скок на шеќерот во крвта во периодот од 3 до 8 часот наутро. Овој ефект може да биде опасен за вашето здравје, поради што лекарите забележуваат дека е многу важно да се утврди дали страдате од утринска хипергликемија.

„Ефектот зора“ е ненадејно зголемување на нивото на шеќер во крвта по будењето, а влијае не само на дијабетичарите, туку и на други луѓе со метаболички заболувања. Овој феномен често се забележува кај пациенти со слабо контролиран дијабетес тип 1, деца во фаза на растење, како и кај луѓе со проблеми во функцијата на контрарегулаторните хормони.

Кај луѓето кои немаат дијабетес, панкреасот произведува доволно инсулин во овој период од денот за да го регулира нивото на шеќер во крвта.

Меѓутоа, кај дијабетичарите панкреасот не произведува доволно инсулин, а дополнително отежнувачки ефект е инсулинската резистенција, пишува „my.clevelandclinic.org“.

Причини за појава на овој ефект

Физиолошкото ослободување на хормоните како што се хормонот за раст, кортизолот, адреналинот и глукагонот помеѓу 3 и 8 часот наутро игра клучна улога во зголемувањето на нивото на шеќер во крвта. Овој ефект може да предизвика опасни компликации кај луѓето со дијабетес и бара внимателно следење и контрола.

Како да го препознаете „ефектот зора“?

За да се утврди дали се борите со утринска хипергликемија, се препорачува редовно да го мерите шеќерот во крвта помеѓу 2 и 3 часот по полноќ неколку дена. Доколку резултатите потврдуваат високо ниво на шеќер, важно е да побарате стручен совет и да ја прилагодите исхраната и физичката активност за да го намалите овој ефект.

Како да го спречите „ефектот зора“

Правилната исхрана, која вклучува вечера богата со протеини, малку јаглехидрати и масти, како и редовен појадок, може да помогне во контролата на „ефектот зора“. Исто така, зголемената физичка активност, особено утринскиот тренинг, може позитивно да влијае во намалувањето на утринската хипергликемија.

Важно е да се напомене дека не постои универзално решение за овој проблем, но промените во исхраната и начинот на живот може да имаат значително влијание врз намалувањето на ваквиот ефект кај луѓето со дијабетес и други метаболички нарушувања.

Свет

Фон дер Лајен: Нападите на Хамас врз Израел донесоа огромно страдање на израелскиот народ

Нападите на Хамас врз Израел донесоа огромно страдање на израелскиот народ и невините Палестинци.

Не може да има оправдување за терористичките акти и варварски напади на Хамас врз Израел, кои уште еднаш најсилно ги осудувам, наведе претседателката на Европската комисија, Урсула фон дер Лајен, по повод годишнината од ланските напади на палестинската исламистичка група врз израелската територија во кои беа убиени 797 цивили, меѓу кои 36 деца и 379 припадници на безбедносните сили, околу 3400 лица беа ранети, а 251 Израелец беа одведени како заложници.

- На 7 октомври 2023 година, светот се разбуди со ужасни слики на неискажливо дивјаштво, сцени кои засекогаш ќе останат врежани во нашите умови. Тие донесоа огромно страдање не само на народот на Израел, туку и врз невините Палестинци. На оваа трагична годишнина сакам да оддадам почит на жртвите. Европската Унија жали за сите невини луѓе чии животи се уништени од тој кобен ден, наведе Фон дер Лајен во изјавата.

Таа потсетува дека ЕУ постојано повикува на итен прекин на огнот во Газа, безусловно ослободување на сите заложници и за прекин на конфликтот, како и дека ги поддржува тековните дипломатски напори за постигнување сеопфатен договор

Според Фон дер Лајен, една година подоцна, хуманитарната ситуација во Газа е ужасна, па затоа ЕУ ќе продолжи да прави се што е во нејзина моќ за да обезбеди финансиска поддршка и да ја олесни испораката и дистрибуцијата на хуманитарна помош, како до палестинскиот народ, така сега и во Либан.

- Терористичките напади на Хамас врз Израел поттикнаа спирала на насилство што го доведе целиот регион во состојба на екстремна тензија и нестабилност. Сите страни мора да дејствуваат одговорно, воздржано и да се ангажираат за деескалација на сегашните тензии, наведува претседателката на ЕК.

Фон дер Лајен потенцира и дека додека работи на справување со сегашната криза, Европската Унија настојува да помогне да се подготви теренот за идните чекори во мировниот процес.

- Ќе ги поддржиме сите напори за постигнување услови за траен мир, што ќе доведе до решение за создавање две држави - Израел и Палестина, кои ќе коегзистираат една покрај друга во мир и безбедност. Тоа е единствениот остварлив пат напред за конечно да се стави крај на страдањето, нагласува Фон дер Лајен.

Таа, исто така, истакна и дека ЕУ сочувствува со еврејските заедници ширум светот во услови на нагло зголемување на антисемитските инциденти.

- Мора колективно да се бориме против ова зло каде и да се шири - вклучително и онлајн. Ќе продолжиме да ја имплементираме, а по потреба и да ја ажурираме, нашата Стратегија за борба против антисемитизмот. Ќе посветиме повеќе ресурси за оваа цел. Секој треба да биде слободен да ја исповеда својата вера во нашата Унија. Се гордееме со нашата различност. Мораме да ја заштитиме по секоја цена, додава Фон дер Лајен во пораката по повод годишнината од ланските напади на Хамас врз Израел.

Свет

Во Мексико убиен градоначалник само шест дена по преземање на функцијата

Алехандро Аркос, градоначалник на Чилпанцинго, главниот град на мексиканската држава Гереро, беше убиен вчера, помалку од една недела по преземањето на функцијата, потврди гувернерот на државата.

Британските медиуми пренесуваат дека Аркос е убиен само шест дена откако стана градоначалник на Чилпасинго, град во југозападно Мексико со околу 280.000 жители.

„Поради неговото убиство, целата заедница на државата Гереро тагува и не исполнува со гнев“, рече гувернерката Евелин Салгадо во изјавата споделена на социјалните мрежи.

Јавното обвинителство на сојузната држава Гереро, каде што насилствата зајакнаа, соопшти дека е покрената истрага за убиството на градоначалникот на Чилпансинго.

Македонија

ЦУК: Два пожара на отворено, во Гостивар водата не е за пиење

ЦУК: Два пожара на отворено, во Гостивар водата не е за пиење, а во Тетово има редуцирано водоснабдување.

Во последното деноноќие се регистрирани два пожара на отворено - во Скопје бил запален градежен отпад на ул. „Његошева“ во Општина Карпош, и во во Село Рдауша каде што имало запалено ѓубре, соопшти ЦУК.

ЈКП „Шар“ од Тетово информира поради загаденоста на водата во изворите на Лешница, системот на филтер станицата на засега е целосно затворен. Градот Тетово се снабдува со намалено количество вода, а екипи на ЈКП „Шар” се на терен за брзо решавање на проблемот. Ограничување на водата во градскиот водовод ќе има од 13.00 до 15.00 часот и во период од 01.00 до 04.00 часот.

Од ЈП „Комуналец“ од Гостивар, пак, е добиено известување во ЦУК дека поради контаминација предизвикана од обилните врнежи од дожд, најновите физичко-хемиски и микробиолошки анализи потврдуваат дека водата од јавната водоводна мрежа во моментов не е безбедна за пиење.

притисни ентер