Завршија „RoboMac“ и „RoboMac junior 2024“

Со финалниот натпревар во пет различни категории на Факултетот за електротехника и информациски технологии заврши овогодинешното 12-то издание на RoboMac.

На натпреварот учествуваа студенти од Факултетот за електротехника и информациски технологии - ФЕИТ, Машинскиот факултет и Факултетот за информатички науки и компјутерско инженерство, распределени во 22 тимови. Студентите Ана Софрониевска и Емилија Чешмеџиевска победија во категоријата „Robotic Arm Challange“, натпревар каде секој тим градеше кула со претходно дефиниран код. Оценувањето се базираше на освоените поени од објектите од кои е изградена кулата, скалирани во однос на нејзината висина, така што тимот кој имаше највисока кула ги добива сите освоени поени, додека секој тим со пониска кула добиваше само одреден процент од поените.

Во наредниот натпревар, со наслов „Sense the color select the line“, составен модел на автономно возило следи исцртана црна патека со пет кружни текови. Пред секој кружен тек на одредено растојание од десната страна на правецот на движење на возилото беше поставен колор маркер (црвен или зелен). Ако возилото детектира црвен маркер, треба да се движи по десната патека од кружниот тек, а ако детектира зелен маркер – да се движи по левата патека. Возилото треба да застане откако ќе детектира пет црвени маркери. Возилото на тимот во состав Анамарија Илиева, Даниел Мојсоски, Ангел Затуроски стигна до целта за најкратко време со точно детектирање на бои и со застанување на возилото во зоната на маркерот.

Колички возеа по мапа со сива боја во натпреварот „Self-racing cars“, каде почетокот и крајот беа означени со црно-бела шаховска шара. Тука победи најбрзата и најпрецизната количка, која направи четири успешни кругови на тимот Лазар Ванчов, Ива Паризовска и Елеонора Петковска.

Во категорија Chatbot challenge учесниците имаа задача да реализираат систем за гласовна команда на мобилен робот Џет Бот на македонски јазик. Задачата е тешка од повеќе аспекти: тие требаа да направат модел за препознавање на македонски јазик од нула и да го научат да работи за различни гласови, во различни акустични средини и во услови на шум и бучава. Победници во оваа категорија се студентите Максим Пановски и Илина Лефкова.

Во категоријата „AI Football“ се одвиваше фудбалски натпревар меѓу тимови од по три играчи (агенти програмирани со вештачка интелигенција). Секој од четирите тимови играа по еден натпревар со останатите меѓусебно. Победници во категоријата се: Леонид Трајкоски и Благоја Николоски.

Паралално, на ФЕИТ се одржа и Робомак Јуниор за ученици од средните училишта од Македонија, во организација на ФЕИТ и студентскиот огранок на ИЕЕЕ. На овој натпревар учествуваа 54 учесници од четврта година од 26 средни училишта од Македонија. Учениците се натпреваруваат во две категории: Автономна мобилна роботика и Паметна електроника за автономни возила. Во двете категории беа доделени златни, сребрени и бронзени медали.

Робомак 2024 се одржа по 12-ти пат, со голем број учесници, кои во неколку дена им дадоа дополнителни знаења и вештини на студентите.

Едноставен и лесен трик што ќе ве воодушеви, а ќе изгледате како да сте посетиле фризер!

За жените кои не знаат како да се фенираат...

Една корисничка на Инстаграм споделила како бргу да ја стилизирате вашата коса.

Стилизираната и бујна коса е желба на секоја жена, но бидејќи времето е кратко, а обврските бројни, жените речиси и немаат време да посетат фризер, а од друга страна, многумина не се вешти во фенирањето, па повеќето се принудени да бараат друго решение. Стоењето пред огледало со четка и фен во рака не ѝ се допаѓа речиси на ниту една жена бидејќи не само што ѝ одзема време, туку и нема да ја обликува косата како што сака.

Ако сте меѓу оние дами кои не знаат да се фенираат, немаат време за тоа или причината е нешто сосема друго, една „инфлуенсерка’ понуди одлично решение што ќе ги воодушеви сите дами. Сара Садија покажа како со помош на чорап го решава проблемот со стилизирање на косата за само минута-две.

На видеото, девојката покажува како ја врзува косата во опавче, потоа прска лак за коса, па зема еден памучен бел чорап и постепено ја завиткува косата со него од врвот на опавчето до коренот, и на крај го врзува чорапот и со него ја покрива „пунџата“. Вака врзаната коса ја остава некое време, а кога ќе го извади чорапот од косата, таа добива бујна коса со крупни кадрици.

На бујната и убаво обликувана коса таа нанесува капки за коса со кои ја стилизира фризурата без многу труд.

Фризурата ги воодушеви лицата што ја следат на оваа социјална мрежа кои навеле дека ќе го пробаат овој трик. Оваа инфлуенсерка им открила на дамите дека користела балсам во спреј за коса, но и дека обична вода делува одлично. Сара, инаку, на Инстаграм споделува трикови и идеи за стилизирање на косата и шминкање, како и општо разубавување.

Една од корисничките на мрежата изјавила дека оваа техника ја користи уште од 80-тите години и дека ѝ го дава токму тој изглед. Други дами признале дека ги испробале сите можни начини да направат слична фризура, но главно, неуспешно. Повеќето се согласиле дека овој трик со чорапот не само што дава одлична фризура и целосно автентичен изглед, туку ви заштедува време и струја.

Причината за шокантните промени кај едно момче не била откриена цели 18 месеци

Неговото насилно однесување ги збунило и лекарите...

ПАНДАС – откриен од неврологот на детската болница

До деветгодишна возраст, Оливер бил дружељубив и популарен во своето училиште. Тој бил претседател на училишниот совет, но сè се променило во јануари 2020 година кога се вратил дома од училиште и делувал потивко од вообичаено. Неговата загрижена мајка Меган го проверувала во текот на ноќта и била шокирана од промената. Според неа, „како да бил вклучен прекинувач“. Оливер се соблекол по гаќи, се нишал среде соба, со вклучен вентилатор среде зима и отворен прозорец. Викал и тврдел дека кожата му е жешка. Преку ноќ станал психотичен. Ова насилно однесување ги збунувало медицинските стручни лица цели 18 месеци.

По долгомесечното барање одговор, Меган ја пронашла веб-страницата на добротворната организација „PANS PANDAS UK“. Нејзиното откритие довело до тоа на Оливер во октомври 2021 г. да му биде дијагностициран ПАНДАС од невролог во детската болница во Бирмингем. На Оливер му препишале комбинација од антибиотици, антиинфламаторни лекови и терапија, но тој не излегува од дома веќе две години, од последниот прием во болницата. Сега, на 14 години, тој не носи ништо освен прекривка, не поднесува човечки допир и комуницира со своите родители од врвот на скалите, пренесува британски Сан.

ПАНС И ПАНДАС - Ретка медицинска состојба која брзо ги погодува децата

ПАНДАС (педијатриско автоимуно невропсихијатриско нарушување поврзано со стрептококни инфекции) е состојба која се јавува ненадејно и може да влијае на физичкото и менталното здравје кај децата и младите. ПАНДАС специфично се активира од стрептококна инфекција од групата А, која може да предизвика погрешен имунолошки одговор и воспаление на мозокот. Децата погодени од оваа состојба може да бидат на возраст од три години, кога ќе се појават првите симптоми, но овој синдром може да се појави до пубертетот.

Според „PANS PANDAS UK“, во моментов не постои начин да се дознае колку точно деца се погодени од оваа состојба во Велика Британија. Проф. Рајат Гупта консултант детски невролог на Детската клиника во Бирминген, кој ја дијагностицирал состојбата на Оливер изјавил дека со ваква состојба се дијагностицирани околу 100-тина деца. Постои мала свест кај медицинските професионалци во Велика Британија за оваа состојба.

- Децата кои се однесуваат вака може да имаат состојба која лесно може да се лекува со кратка двонеделна терапија со антибиотици - изјавил професорот Рајат.

Работната група и истражувањето „PANS PANDAS“

Работната група PANS PANDAS е основана во 2022 година и се состои од невролози, имунолози и педијатри. Целта на групата е да ги подобри стандардите за грижа на луѓето со ваква состојба и да постигне национален консензус за тоа како да се дијагностицираат и третираат овие состојби. Групата исто така е во процес на спроведување на истражување низ Велика Британија со цел да добие појасна слика за тоа колку луѓе се погодени од оваа состојба.

Д-р Минг Лим, консултант педијатриски невролог во Детската болница Евелина во Лондон, кој е дел од работната група, навел дека една од причините поради кои ПАНДАС е контроверзна состојба е тоа што не постои специфичен биомаркер - како што е скенирање на мозокот или тест на крвта – кој би потврдил дека некој ја има таа состојба.

Ели, случај на ПАНДАС со брз одговор на терапијата

Родителите на едно 13-годишно девојче, исто така погодено од ПАНДАС, ги опишале нејзините први суптилни симптоми пред брзото влошување. Ели имала болки во грлото, а нејзините родители ѝ дале лек за оваа нелагодност со надеж дека ќе закрепне. Меѓутоа, откако се вратила од училиште, доживеала напад на паника, била преплашена и изгледала како да ќе земе нож од кујнската фиока и ќе се прободе во градите. Ели имала и други симптоми, но бргу закрепнала со помош на терапијата.

притисни ентер