Земјотресот со епицентар во Кумбре виеја, од каде со денови блика лава, е почувствуван во 7 часот и 24 минути по локално време, соопшти Националниот географски институт (ИГН). Секој ден се чувствуваат десетина земјотреси, но досега најсилниот бил 4,9 степени според Рихтеровата скала.

За време на продолжениот викенд по повод Денот на сите светци, во Ла Палма се очекуваат околу 10.000 посетители кои сакаат во живо да ја следат сцената со ерупцијата на лава. Билетите за бродовите и авионите за овој викенд се распродадени, објави локалната туристичка канцеларија.

Туризмот сочинува 20 отсто од БДП на островот, но откако вулканот еруптира на 19 септември, капацитетот на хотелите се намалил од 70 на 40 отсто. Денеска, пак, исполнетоста скокнала на 90 проценти.

И додека некои пристигнуваат да му се восхитуваат на феноменот, други ги напуштија своите домови во подножјето на кратерот. Околу 7.000 жители мораа да се иселат од погодената област. Кон крајот на следната недела првите семејства привремено сместени во хотели треба да се вселат во 18 објекти за домување на настраданите. До крајот на годината или почетокот на 2022 година, сите евакуирани треба да добијат нови домови.

Лавата зафати површина од 941,5 хектари, но нема загинати или повредени.