Поради невремето и поплавите што ја погодија земјата во која живеат околу 10,9 милиони луѓе, речиси 340.000 луѓе се раселени, а 141 лице се уште се водат како исчезнати, соопшти Цивилната заштита.
Обилните дождови предизвикаа неколку реки и езера во регионот да го достигнат своето највисоко ниво досега, додека поплавите ги блокираа улиците и ја нарушија логистиката, предизвикувајќи недостиг на основни продукти во одредени области.
Метеоролошката служба МетСул објави дека во повеќето градови во Рио Гранде до Сул ќе продолжи да врне дожд, додавајќи дека постои висок ризик од невреме.
Земјата се наоѓа на географската точка на судир помеѓу тропската и поларната атмосфера, што создаде временска шема со периоди на интензивен дожд и периоди на суша.
Локалните научници веруваат дека моделот се интензивира поради климатските промени.
Во Каноас, еден од најтешко погодените градови во близина на главниот град Порто Алегре, повеќе од 6.000 луѓе престојуваат во сала на унверзитет, претворена во засолниште.
Апарецида де Фатима Фагундес рече дека не може да заспие бидејќи не може да престане да размислува за најлошиот ден во нејзиниот живот.
„Постојано се сеќавам на луѓето кои викаат „помош“, „помош““, рече таа. „Беше ужасно.
Владата соопшти дека повеќе од 385.000 луѓе се без вода, додека околу 20 градови се без телекомуникациски услуги.
Во четвртокот, федералната влада објави пакет мерки за помош за Рио Гранде до Сул, кој вклучува забрзување на исплатата на социјалните бенефиции и обезбедување поевтини заеми за земјоделците и компаниите.
Гувернерот Едуардо Леите изјави претходно оваа недела дека првичните пресметки покажуваат дека на Рио Гранде до Сул ќе му требаат најмалку 3,68 милијарди долари за обнова од штетите што се проширија на земјоделските области околу главниот град.