"Мислам дека сме на добар пат. Во моментов вакцинираме околу милион граѓани на ден и ако продолжиме вака, има причина за оптимизам", рече Сандра Циесек, директор на Институтот за медицинска вирусологија на Универзитетот во Франкфурт..
Таа објасни дека факторите како што се зголемените вакцинирања и тестирања и променетото однесување на луѓето со доаѓањето на потопло време и подолг престој на отворено заеднички влијаат на опаѓачкиот тренд на бројот на нови инфекции.
„Секогаш е комбинација од многу влијанија“, рече Циесак.
Таа ја повтори оптимистичката проценка на здравствениот портпарол на владејачката Социјалдемократска партија на Германија (СПД), Карл Лаутербах, кој вчера рече дека „летото ќе биде добро“.
Промената е индицирана и со растечките отстапки во некои сојузни покраини.
Баварија на крајот на мај најави отворање хотели за престој на туристи, а некои други федерални држави, како Мекленбург-Западна Померанија и Бранденбург, најавија отворање за угостителство.
Германскиот министер за здравство Јенс Шпан ги повикал федералните провинции „претпазливо да се отвораат“ во угостителската индустрија, што пред се се однесува на понудата на отворено.
Оваа недела треба да бидат донесени и одредби за изземање од мерките против пандемија за вакцинираните. Одредбата, која би можела да стапи на сила уште овој викенд, се однесува и за оние кои го прележале коронавирусот, со некои исклучоци, така што се ослободуваат од карантинските обврски по враќањето од странство, како и мерките за ноќно ограничување.
Седумдневната инциденца вчера била 132,8, што е за речиси десет единици помалку од претходниот ден. Минатата среда, инциденцата била 160.
Вирусолозите се задоволни и од падот на бројот на пациенти во единиците за интензивна нега.
„Очекуваме бројот на пациенти на одделите за интензивна нега значително да се намали до крајот на месецот“, рече Гернот Маркс, претседател на Германското здружение за интензивна нега.