Управата за јавни приходи утре треба да го објави списокот на фирми кои ги исполнуваат бараните критериуми.
На сметките на 21 542 компании ќе легнат средствата од 14 500 денари по работник за исплата на априлската плата, соопштија од Владата. Не е познато колку работници ќе бидат опфатени и колку пари од буџетот се одвоени за оваа намена.
Парична помош чекаат и околу 6 илјади самостојни вршители на дејност, занаетчии, земјоделци.
Да се ослободат од плаќање данок на доход побараа 800 лица, а од данок на добивка над илјада даночни обврзници.
Сепак, најпогодените сектори се со најмал број апликации. Од 4 500 регистрирани угостители , помош побарале 2 377, од секторот туризам 253, транспорт 2 177, а останатие 16 илјади се од други сектори.
Од Владата се задоволни од реализацијата на економските мерки - велат дека доколку е потребно ќе се применуваат и понатаму. Информираат и дека во тек е подготовка на трет сет мерки насочени кон реконструирање и заживување на македонската економија.
Сепак - угостителство, туризмот и транспортот иако беа мапирани како најпогодени сектори, се и најнезадоволни од економските мерки. 95% од угостителите изразија незадоволство, и постојано алармираат дека им е потребна поголема финансиска помош.
Кафулињата и рестораните скоро 2 месеци не работат воопшто. А, откако Комисијата вчера не препорача олабавување на мерките, останува неизвесно до кога угостителите ќе бидат со клуч на врата. Сепак, тие секојднево во изминатите неколку недели, можеше да се забележи дека полека ги подготвуваат објектите за пречек на гости.