Македонија

Тупураинен: ЕУ нема да му го сврти грбот на Балканот

Проширувањето останува жив процес, порачаа министрите на ЕУ од состанокот во Брисел. Реформата на методологијата предложена од Франција ќе ја чека новата Европската Комисија.

Прв пат по француското вето, Брисел се наврати на проширувањето. Но, освен реафирмативните пораките дека процесот за Македонија и Албанија останува жив, на денешниот Совет на општи работи не се донесоа никакви формални заклучоци. На маса не се најде ниту францускиот „нон-пејпер“, кој треба да го трасира новиот пристап на преговарање. Финската министерка за Европа, актуелен претседавач со Европската Унија, појасни дека до формирањето на новиот состав на Европската Комисија следниот месец, практично рацете на земјите членки се врзани за какви било официјални предлози.

-Денеска не разговаравме за францускиот предлог. Секако дека го слушнавме предлогот, има земји кои го поздравија, а има и земји кои изразија загриженост. Заедничка позиција е дека ќе треба ја почекаме новата Комисија да го почне мандатот што поскоро, изјави Тити Тупураинен, министерка за Европа на Финска

Франција и денеска цврсто застана на ставот дека актуелниот модел на преговарање е нефункционален и оти е неопходна реформа на процесот. Министерката за Европа, Де Моншален ги отфрла критиките дека Париз преку ноќ одлучил да ги смени правилата. Вели искуствата на проширување од минатото покажаа дека мораме да го приближиме нивото на земјите - кандидатките со она државите – членки не само во правниот, туку и од економски, социјален и културен аспект.

-Ние не ги менуваме правилата среде игра што започнала. Гледаме дека процесот не функционира затоа што е екстремно бавен за тие кои учествуваат во него. Процесот не е политички раководен, има автоматизам и народите пред се не се пронаоѓаат во него. Гледате колкава емиграција има, колкав одлив на мозоци од Србија, Црна Гора, а пред нив и од Бугарија, Романија и Хрватска кога преговараа., Амели де Моншален, министерка за Европа на Франција.

Според најавите од Париз, новата методологија треба да биде финализирана најдоцна до март догодина, за што треба да има консензус од сите 28 земји членки. Францускиот нон – пејпер предвидува своевидна преговарачка нишалка – од една страна процес на реверзибилност, кој може да ја врати неколку чекори назад земјата – кандидат и од друга страна, низа поволности, како пристап до структурните фондови и столче во Брисел во областите, во кои е евидентиран напредок.

Македонија

Мицкоски верува дека ќе има мнозинство–Ковачевски обвинува дека така се загрозува ЕУ иднината

Лидерот на ВМРО-ДПМНЕ, Христијан Мицкоски верува дека неговата партија е блиску до мнозинство во Парламентот и не би се изненадил ако освои 61 пратеник.

Во изјава за медиумите по завршување на литургијата во Соборниот храм „Свети Климент Охридски“ Мицкоски изрази уверување дека во среда тие ќе слават двојна победа и на претседателските и на парламентарните избори, без да даде конкретен одговор што би било неуспех за партијата на двојните избори.

-На сите им е јасно дека ВМРО-ДПМНЕ на овие избори е блиску до мнозинство во парламентот. Не би се изненадил ако имаме 61 пратеник. За мене неуспехот не е неуспех. За мене е успех пред се она што се случи во првиот круг. Верувам дека во среда ќе имаме убедлива двојна победа, Гордана Силјановска Давкова ќе биде идниот претседател на Македонија, а коалицијата Твоја Македонија и ВМРО-ДПМНЕ ќе имаат 61 пратеник, изјави Мицкоски.

Неговиот политички ривал, лидерот на СДСМ, Димитар Ковачевски, пак, од синоќешниот митинг во Македонски Брод порача дека доколку ВМРО-ДПМНЕ и Силјаноска ја добијат власта, европската иднина на државата ќе биде загрозена, а земјата изолирана. Ги потсети граѓаните дека изборот на 8 мај е во нивни раце и тие одлучуваат во каква Македонија сакаат да живеат.

-Слушнете ги само изјавите на Мицкоски и неговата кандидатка Силјановска и ќе ви стане јасно дека немаат никаква намера да ја водат државата кон ЕУ. Напротив, ќе нè изолираат, ќе нè затворат, ќе нè скараат и со соседите и со меѓународната заедница. Јас можам цврсто да ви гарантирам дека СДСМ никогаш нема да се откаже од европска Македонија и ќе работиме сè додека таа цел не стане реалност, порача Ковачевски.

Двојните избори ќе се одржат во среда. Ден претходно, е изборен молк, а изборната кампања завршува в понеделник на полноќ.

Фудбал

Клоп: Ливерпул ќе продолжи да се развива и откако ќе си заминам

Менаџерот на Ливерпул, Јирген Клоп изрази уверување дека тимот ќе продолжи да се развива и по неговото заминување на крајот од актуелната сезона.

Германецот помина девет многу успешни години на „Енфилд“, а за негов наследник се очекува да биде избран Холанѓанецот Арне Слот кој моментално го води Феенорд.

Веќе на крајот од минатата сезона започна подмладување во Ливерпул. Големи фигури како Роберто Фирмино, Џејмс Милнер, Фабињо и долгогодишниот капитен Џордан Хендерсон го напуштија тимот, заедно со Садио Мане, кој замина една година порано, додека беа донесени Алексис Мекалистер, Доминик Собослај, Рајан Гравенберг и Ватару Ендо.

-Секако дека би сакал да се разделам на поинаков начин со Ливерпул. Пет или шест бода повеќе ќе не држеа во трката за титулата. Но, ако ја споредите ситуацијата сега со кога дојдов пред девет години, ќе видите голема разлика. Во моментов го имаме Ливерпул 2.0, кој нема да престане да се развива со моето заминување, можеби и ќе започне нов проект, изјави Клоп.

Беше категоричен дека доколку останел на „Енфилд“ уште една година, нема да можел доволно добро да ги извршува обврските.

-Сигурен сум дека да не ја донесов оваа одлука сега, следната година ќе беше многу тешка. Мора да бидете полни со енергија за ваква работа. Да се биде на 80 проценти не е доволно. Тоа е вистината. Тоа е работа 24/7. Да, има поважни работи во животот, но ако се грижиш, тогаш работиш 24/7 според стандардите што ги има еден клуб како Ливерпул, изјави поранешниот тренер на Борусија Дортмунд.

Македонија

Православните верници го слават Велигден

Едногласно да воскрикнеме пред сиот свет Христос Воскресе – Навистина воскресе.

Со овој поздрав православните христијани ширум светот го одбележуваат најголемиот христијански празник Велигден. Христовото воскресение беше објавено во сите храмови на Македонската православна црква на полноќ, а утрово се одржуваа воскресенски литургии. Централната богослужба се одржа во Соборниот храм „Св. Климент Охридски“ во Скопје , каде чиноначалствуваше поглаварот на Македонската Православна Црква – Охридска Архиепископија Господин Господин Стефан.

Оттаму беше испратена порака до верниците за спотеност, спокојство и меѓусебно почитување.

-Што е можно побргу да се освестиме и да се обединиме како народ и молитвено да притекнеме кон Бога. Со кое право некои сеуште се обединуваат да ни ги одрекуваат историјата и традицијата, јазикот и верата кога сета Македонска почва е напоена со просветителските дејанија на Македонските црковно просветни дејци. Како што не потклекнаа нашите прадедовци така и ние како нивни потомци и како доследни носители на аманетот доверен од нив да не дозволиме отсапки пред оние кои што постојано посегнуваат по нашето најсвето, вели отец Сашо.

На полноќ со прогласувањето на Христовото воскресение, заврши и седум неделниот велигденски пост. По причестот, верниците утрово се помолија за здравје и благодет.

- Посакувам прво здравје, среќа, љубов, благосостојба, мир.

- Здравје, среќа за семејството и мир насекаде да има.

- Многу желби имаме, здравје, многу здравје, пред се здравјето е најбитно., Христос Воскресе, дојдовме за здравје за убавини за мир и нека биде се добро.

Според Христијанското учење Велигден е празник на љубовта и мирот, триумф на животот над смртта, на доброто над злото и ден кога Исус Христос воскреснал од мртвите, подарувајќи вечен живот на оние што веруваат во него. Велигден според јулијанскиот календар, покрај во Македонија и соседството се слави и во Украина, Молдавија, Русија, Либан, Египет и Етиопија како и меѓу останатите православни верници во Африка и блискиот исток.