Дали се работи за пилотска грешка, неисправност на леталото или силниот ветар ќе покаже истрагата. Остатоците од превртениот хеликоптер на МВР од типот МИ 17 се подигнати од старата платформа кај старата зграда на скопскиот аеродром по завршениот увид на самото место. Ќе се чува во посебен хангар.
Од Обвинителството велат дека ако се утврди пропуст од човечки карактер ќе отвори кривична постапка.
- Обезбедени се видео записите од камерите на аеродромот, како и аудио снимките од комуникацијата на пилотот со контролата на летот. Извршен е првичен разговор со пилотот и со уште четири лица од екипажот на хеликоптерот. Во зависност од обезбедените докази како и од наодите во извештајот на Комитетот за истрага на воздухопловни несреќи и сериозни инциденти, ќе изготви извештај за незгодата, и во зависност од обезбедените докази ќе бидат утврдени причините за хеликоптерската несреќа.-ЈОРМ.
Полицискиот хеликоптер откако наполнил гориво на резервоарот падна кратко по полетувањето на планираниот тренажен лет. Во него имало петмина припадници на МВР, а само еден помина со полесни телесни повреди.
Станува збор за транспортер набавен во 2009та а бил од руско производство. Иако од нашите институции нема официјален одговор, српскиот воздухопловен портал Танго 6 пишува дека тешко оштетениот МИ 17 е еден од двата хеликоптера во сопственост на македонското МВР кои во 2017 и 2018 биле на ремонт во Воздухопловниот институт Мома Станјловиќ во Батајница. Руската компанија Руски хеликоптер била главен изведувач на ремонтот, додека српскиот Завод бил подизведувач.
Ова е трет хеликоптер од типот МИ 17 кој падна, но за среќа не однесе човечки жртви. Првиот во 2008та кај Катлановско Блаце во кој загинаа 11 припадници на АРМ, потоа во 2014та од истиот тип во сопственост на МВР хеликоптер МИ 17 се урна кај индустриската зона во Струмица кога загинаа четворица припадници на МВР.