Здравје

Таравари го оцени јавниот здравствен систем со осумка, вели се дава максимум

Таравари го оцени јавниот здравствен систем со осумка, вели се дава максимум и се добиваат квалитетни услуги.

Министерот за здравство Арбен Таравари денеска одговарајќи на новинарски прашања, рече дека здравствениот систем, од пет до десет, би го оценил со осумка, и порача се дава максимумот за подобро и оти смета дека сепак се добиваат квалитетни здравствени услуги во јавното здравство.

Во врска со компресорските станици, одговори дека инсталациите се веќе поставени. Се работи интензивно со компанијата што работела, тоа треба да заврши некаде кон крајот на јануари.

- Практично, останат е само апаратот што треба да се постави и добро е тоа што сега ќе имаме бек. Практично новата инсталација и новиот апарат ќе функционираат, а стариот апарат ќе го поправиме и тоа ќе биде секогаш како поддршка. Доколку се случи нешто на новиот апарат, да не чекаме повторно шест месеци додека се направат одјави, па се најде фирма, па повторно да се работи. Така да, ако се расипе новиот апарат после 10, 15, 20 години, стариот апарат ќе биде тука за да помогне веднаш да се вклучи, појасни министерот.

Операциите, рече, продолжуваат без никаков застој во полна пареа.

Тој посочи дека секаде во регионот, човечките ресурси се проблем, посебно во здравството.

- Што можеме ние како Влада да направиме, да подобриме услуги и плати, тоа континуирнао го правиме. Не случајно, често специјализанти, потоа нов колективен договор. Ќе видиме сега за идната година и бодовите односно капитацијата за докторите по семејна медицина, некаде во април да се покачат за да бидат мотивирачки, тие да останат да работат и да дадат нивен максимум како здравствени работници. Тоа можеме како МЗ и како Влада. Друго не зависи од нас, истакна Таравари.

Тој се осврна и на тоа дека има и доктори, кои работат во разни европски држави, а се заинтересирани да се вратат во државата.

- Јас мислам дека ова е доста мотивирачки за нас. Можеби бројката е симболична, тројца. Мислам дека сериозно ќе треба како МЗ и како Влада да размислиме да ги отвориме вратите, барем тие што се поблиску од Хрватска или од Словенија и од другите европски држави. Доколку имаат, на пример, тригодишно работно исксутво во тие држави, си заминале, да бидат отворени вратите во сопствената држава, да се вратат и да ги интегрираме во нашиот здравствен систем, рече министерот.

Таравари се надева дека веднаш по Нова година ќе се формира комисијата за промени во системот „Мој термин“.

- Јас се надевам дeка комисијата веднаш по Нова година ќе се формира. Нон стоп работиме на „Мој термин“, ги пoдобруваме секогаш работите по барањата на пациентите. Времето на чекање јас мислам дека е многу помалку сега, во однос на тоа што беше пред шест месеци. Меѓутоа, никогаш не е идеално. За дигитализација треба сериозно да се размислува, тоа беше и една од поентите што сме ги кажале од почеток. Така да, ќе дадеме наш максимум што помалку да биде времето на чекање и што порганизиран да биде „Мој термин“ како софтвер што се користи во здравствениот систем, одговори министерот.

Тој најави и стратегија, да се види што недостасува и по тие области да се дадат поголем број специјализации, со можности за младите. Се размислувало и за мотивирачки елементи во конкурсот. Како еден млад доктор, на пример да биде мотивиран да оди на патологија.

- Дајте ни време и ние размислуваме во тој правец, како еден млад успешен, лекар кој завршил медицина, да му кажеме, убаво е да помогнете и да работите, да бидете иден добар патолог во државата кој ќе помага на пациенти. Меѓутоа, дајте ни време да видиме како би можеле тоа да го направиме за да тие се насочат према радиологја, патологија, тоа што ни треба најмногу во државата, нагласи министерот.

Таравари изрази оптимизам дека идната година ќе започнат доградувањето и завршувањето на болниците во Штип и во Кичево, а се осврна и на неколку други приоритети на брифингот со медиумски работници со заменик министерот Јовица Андовски и државниот секретар во Министерството, Бесим Мемеди.

Македонија

Девојче е првото родено бебе во Куманово

Првото бебе во Куманово е девојче, второ дете во семејството Асанови од Крива Паланка. Мајката Хамиде и новороденчето се во добра здравствена состојба.

Девојчето е родено вчера во 17:10 со царски рез, тешко е 3,6 килограми, долго 49 сантиметри.

-Посакувам да биде здраво, живо и среќно, изјави мајката.

Претставници од општинската власт и од болницата и однесоа соодветни подароци.

-Ѝ посакав прво таа да се опорави, девојчето да е живо, здраво и среќно. Да си ја сака државата, да си остане овде да придонесува, изјави претседателката на Советот на општина Куманово, Ивана Ѓорѓиевска.

Надлежните од болницата очекуваат плодна година, зголемување на трендот на раѓања на акушерскиот оддел во болницата.

- Раѓањето на женски плод наговестува плодна и бериќетна година. Имаме тренд на намалување на раѓањата, за жал и се надевам дека ова е предзнак и за зголемување на бројот на раѓањата, рече директорот Стефан Трајановски.

Началничката на одделот, д-р Софија Трајковиќ појасни дека тимот има седум специјалисти, добиваат помош од лекари од Скопје и со тоа, успеваат да го покријат 24-часовното работење.

- За ден и половина имаме две бебиња, двете се женски пол, двете се добри, мајките се, исто така, добри. Моментално има една пациентка во предпородилна сала, изјави Трајковиќ.

Минатата, 2024 година имало 688 раѓања во кумановската болница, што е тред на опаѓање зашто во 2023 имало 730, а кумановската општа болница е единствено родилиште за североисточниот регион.

Регион

Пленковиќ: Денеска ќе го потпишеме Протоколот за подигање на безбедносните мерки во училиштата

Хрватскиот премиер Андреј Пленковиќ на првата седница на Владата годинава најави дека попладне во Министерството за образование ќе биде потпишан Протоколот за зголемување на безбедносните мерки во училишните институции.

Хрватскиот премиер Андреј Пленковиќ на првата седница на Владата годинава најави дека попладне во Министерството за образование ќе биде потпишан Протоколот за зголемување на безбедносните мерки во училишните институции, а една од мерките е вработување лица со потребните вештини за заштита.

По трагедијата што се случи на последниот ден од првото полугодие во загрепското основно училиште „Пречко“, Комисијата подготви предлог за основни мерки за зајакнување на степенот на безбедност во училиштата, а како што најави премиерот Пленковиќ на седницата на Владата, попладнево Протоколот за безбедносни мерки ќе го потпишат министерот за образование, наука и млади Радован Фукс и сите вклучени засегнати страни.

„Заедничка цел е да се подигнат безбедносните мерки во сите училишни институции. Она што го оценивме како најдобро долгорочно решение е во училишните институции, преку систематизација и едукација, да се вработат оние лица кои ги имаат потребните вештини за заштита, а истовремено се специјално сензибилизирани и едуцирани за работа со деца, родители и наставници и кои потоа трајно би помогнале безбедноста на училиштата да се подигне на повисоко ниво по оваа голема трагедија што се случи во основното училиште Пречко“, рече Пленковиќ.

„Брзите мерки како заклучување на вратите, менување врати, нови безбедносни системи се веќе во тек, а тимовите на локалната полиција ќе одржат состаноци со директорите на училиштата за безбедносни прашања“, додаде хрватскиот премиер.

Македонија

Од утре обилни врнежи на дожд и снег

УХМР информира дека под влијание на влажен бран, утре во попладневните часови во западните делови ќе има врнежи од дожд во пониските места и снег на планините.

Во текот на ноќта кон сабота и во сабота претпладне врнежите ќе се прошират во поголем дел од земјата и наместа ќе бидат пообилни (20 л/м2).

Според УХМР, поради спуштање на постудена воздушна маса со засилен северен ветер врнежите ќе преминуваат во снег на повисоките и на некои од пониските места. На планините снежната покривка ќе се зголеми, а помала снежна покривка ќе се формира и на некои од повисоките места.

Во Скопје утре во вечерните часови ќе има повремени врнежи до дожд, а во текот на ноќта и во сабота претпладне во повисоките делови од котлината врнежите ќе преминат во снег. Во сабота ќе дува умерен, повремено засилен северен ветер.