Исламската држава од Хорасан, која со години извршува смртоносни напади во Авганистан и Пакистан, ја презеде одговорноста за нападот во четвртокот во близина на аеродромот во Кабул, каде илјадници луѓе се собраа да ја напуштат земјата откако талибанците ја преземаа власта на 15 август.

Во нападот загинаа околу сто луѓе, вклучувајќи 13 американски војници, само неколку дена пред крајниот рок за повлекување на американските сили на 31 август, по 20 години војна во земјата.

Групата, исто така, ја презеде одговорноста за денешниот ракетен напад на аеродромот во Кабул.

„Се надеваме дека Авганистанците под влијание на Исламската држава ќе се откажат од своите дејствија кога ќе се формира исламска влада без странски сили“, рече викендов главниот портпарол на талибанците, Забихула Муџахид, во интервју за АФП.

„Ако предизвикаат воена состојба и продолжат со своите дејствија, исламската влада ќе се грижи за нив“, предупредил тој.

САД извршиле неколку напади врз позиции на Исламската држава во текот на викендот. Вчера тие уништиле едно од нивните возила со експлозив што му се заканувал на аеродромот.

Но, талибанците се лути. "Тие немаа дозвола за такви операции. Нашата независност мора да се почитува", рекол портпаролот.

Талибанците ветија дека ќе формираат „инклузивна“ влада, но само кога странските сили ќе ја напуштат земјата.

"Важно е да се формира влада, но тоа бара многу трпение. Во моментов одржуваме консултации за формирање влада на одговорен начин", рече тој.

Во меѓувреме, земјата живее тешко. Банките, државните служби и другите јавни институции се во голема мерка затворени.

Талибанците ветиле дека ќе ја подобрат економската состојба во земјата, но без меѓународна помош и пари што ги поседува авганистанската централна банка во странство. Иднината на земјата, една од најсиромашните во светот, е многу комплицирана.