„Со оглед на зголемувањето на социјални собири, поголема мобилност на населението и големите фестивали и спортски натпревари во наредните денови и недели, СЗО Европа повикува на претпазливост“, рече шефот на СЗО за Европа, Ханс Клуге на брифинг со новинарите.
"Ако одлучите да патувате, сторете го тоа одговорно. Бидете свесни за ризиците. Бидете водени од здравиот разум и не го загрозувајте она што е тешко да се постигне", рече Клуге.
Бројот на нови случаи на ковид-19, смртни случаи и хоспитализации се намалува во последните два месеци, а 36 од 53 земји во регионот започнаа со ублажување на мерките за контрола на инфекцијата.
„Бројот на пријавени инфекции минатата недела беше 368.000, петтина од неделните случаи пријавени за време на врвот во април оваа година“, рече Клуге.
„Сите треба да го признаеме напредокот постигнат во повеќето земји во регионот, но исто така мора да признаеме дека во никој случај не сме надвор од опасност“, нагласи тој.
Клуге рече дека т.н. варијанта делта, која за прв пат е идентификувана во Индија, е причина за загриженост. Оваа варијанта „покажува зголемена заразност“ и многумина кои припаѓаат на ранлива популација над 60 години сè уште не се заштитени.
Со оглед на тоа што само 30 проценти од населението во регионот ја примило првата доза на вакцината, тоа не е доволно за да се спречи нов бран на вирусот, рече тој.