Ова се фотографиите од неколку патишта во Кембриџ и Манчестер, како потврда за најтоплиот јунски ден во последниве 40 години што го живее островот. Во Лондон се измерени 35 степени, а температурата пет дена во низа не паѓа под 30-иот. Со слични горештини се соочуваат и Франција, Португалија и Шпанија, каде што е прогласена портокалова фаза. Ако по утрото денот се познава, алармираат од Светската метеоролошка агенција, Европа ја чекаат убиствени топлотни бранови.
- Делови на Европа, Блискиот Исток, Северна Африка и САД се соочија со рекордни температури во мај и во јуни. Се плашам дека сме блиску до нови рекорди и во текот на летото, изјави Омар Бадоур, метеоролог во ОН.
А, летото втор ден е безмилосно и во западниот дел на САД. Најжешко е во Аризона, каде што вчера беа регистрирани 49 степени, а десетици летови и денеска се откажани на аеродромот во Феникс. Базените се преполни со капачи, улиците со штандови за медицински препораки, а мајсторите за климатизери со полни раце работа.
- Луѓето се очајни и не прашуваат за цена, вели мајстор за клими.
- 30 проценти од светската популација живеат во смртоносни услови 20 дена во годината, како резултат на глобалното затоплување, а половина планета сериозно ги чувствува последиците од е климатските промени, вели Комило Мора, експерт за климатски промени од Хаваи
И покрај актуелното глобално затоплување, апсолутниот рекорд од 56.7 степени го држи Смртоносната долина во САД, измерен во далечната 1913-та.