Стотици мигранти итаат кон гранците на Грција и кон Бугарија во обид да влезат на нивна територија. Дел од нив, како што објавуваат турските медиуми, со бротчиња веќе се истовараат на грчкиот остров Лезбос, а синоќа беа регистирани поголеми групи мигранти кои тргнале да ја напуштат Турција.
-Турската полиција ни каже дека границата е отворена. Ни рекоа дека можеме да ја поминеме. Сакаме со бродчиња да преминеме во Грција, изјави мигрант од Сирија.
Анкара официјално не потврдува дали навистина ги отворила границите и само соопшти дека нема промена на нејзината политика кон бегалците. Грција соопшти дека ја зајакнува безбедноста на границата, исто како и Бугарија. Премиерот Борисов оцени дека актуелните настани можат да предизвикаат нова мигрантска криза, како во 2015-тата.
-Добивме информации дека во Одрин веќе има групи мигранти. Зборував со министрите за внатрешни работи и одбрана и веќе дислоциравме полиција на границата, со што максимално ја засиливме границата, како и морето. Вознемирувачко е што турските граничари се повлекоа од функциите што досега ги извршуваа, изјави Бојко Борисов, премиер на Бугарија
Ваквиот пресврт следи откако синоќа 33-ца турски војници беа убиени во воздушен напад на силите на претседател Асад во сириската провинција Идлиб. Турција изрази сомнеж дека за нападите знаела, но не алармирала Русија, која е близок сојузник со режимот на Асад. Турските сили почнаа одмазничка акција врз околу 200 цели на владините сириски сили. Попладнево Ердоган и Путин телефонски разговараа, Брисел стравува од ескалација од пошироки меѓународни размери, НАТО свика вонредна седница, давајќи и поддршка на Анкара за случувањата во Идлиб.
-Нашата позиција е многу јасна. Ги повикуваме Русија и режимотна Асад неодложно да ги сопрат нападите и да придонесат кон мировно решение за кризата во Сирија., изјави Јенс Столтеберг, генерален секретар на НАТО
Проценките се дека во Турција се згрижени 3,7 милиони сириски бегалци. Според договорот постигнат со Европската Унија пред четири години, Анкара треба да го контролира бранот мигранти, за што Брисел издвои шест милијарди евра.