Во изминатите 3 години со посветен ангажман, чесно и транспарентно работење, општина Неготино успеа да одговори на потребите на граѓаните преку реализација на бројни проекти, активности и настани во делот на подобрувањето и унапредувањето на севкупните услови за живеење.

За непречено функционирање на локалната самоуправа покрај проектите, најважна е финансиската кондиција на општината, остварените и реализираните приходи и капиталните расходи.

Во изминатите 3 години реализираните приходи од основниот Буџет се движеа од 75 до 90 проценти, додека во 2025 година очекуваме 95 проценти реализација на Буџетот. Капиталните расходи во истиот период се движеа од 63 до 73 проценти.

Од поголемите капитални инвестиции би ја истакнал изградбата на новиот градски пазар од затворен тип која е во завршна фаза за што од Буџетот на општина Неготино издвоивме 26 милиони денари, по што градот за прв пат од постоењето ќе добие модерен и функционален градски пазар според највисоките стандарди.

Со средства од 15 милиони денари уредивме цела нова населба со плански опфат за домување во Урбан блок 5 со поставување водоводна, фекална и атмосферска мрежа, изградба и асфалтирање на улици во должина од 500 метри и поставување на улично осветлување со што на околу 200 семејства кои живеат на овој потег им овозможивме услови за непречено функционирање. Предвидена е реализација и на втора фаза од овој проект за што од Владата на Македонија се обезбедени средства во висина од 31 милион денари.

Со цел за искористување на 3-те индустриски зони на територијата на нашата општина, како и за отворање на нови работни места, донесовме одлука за стимулирање на инвеститори, при што преку стимулативни мерки се обидуваме и успеваме да привлекуваме домашни и странски инвеститори

Како што ветивме, како локална самоуправа го решивме најгорливиот проблем на граѓаните на Неготино и на дел од населените места водоснабдувањето. После долги години наназад во кои секојдневието во населението се состоеше од постојани редукции на водата за пиење кои некогаш траеја и подолго од 12 часа во едно деноноќие, со огромна посветеност и реализација на неколку паралелни проекти заедно со Комуналец успеавме да го стабилизираме водоснабдувањето, што пак резултираше со континуирано 24 часовно водоснабдување на граѓаните во изминатите три години, во дел од населените места поставивме нови пумпи, од нови бунари обезбедивме дополнителни количини вода во системот, а граѓаните на располагање имаат и алтернатива во делот на трошењето на водата преку користење на вода од паралелниот систем за наводнување на дворните површини.

Преку проектот Подобрување на водната инфраструктура во општините, општина Неготино доби 725.000 евра кои ќе се реализираат за реконструкција и поставување на атмосферска, водоводна и фекална мрежа, реконструкција на куќни приклучоци на 7 улици во градот.

Значителни средства инвестиравме и во патната инфраструктура со реконструкција или изградба на нови улици како во градот, така и во населените места во општината. Во градот приоритет дававме на уредување на улиците со најголеми оштетувања, а со гордост можам да истакнам дека во населените места Криволак, Пепелиште, Војшанци, Тремник, Тимјаник, Долни Дисан, Курија, и Црвени Брегови реконструиравме или изградивме по најмалку 2 улици во должина од 170 до 500 метри, а во некои населени места и повеќе, на големо задоволство на тамошното население.

Општина Неготино доби Владина поддршка од 130 милиони денари следниве 4 проекти

-реконструкција на локален пат од Долни Дисан-општина Неготино до границата со општина Кавадарци кај месноста Белград.

-изградба на дел од УЗ 5 со поставување на водоводна, фекална и атмосферска мрежа, улично осветлување и асфалтирање на улици

-уредување на детски парк со реквизити на површина од над 3.000 м2

и уредување на тротоар на главната улица во должина од 580 метри со поставување бекатон плочки и спуштени тротоари

Работевме и на тампонирање на улици и патишта, нивно уредување со бекатон плочки, градевме нови и реконструиравме постоечки тротоари, пробивавме патишта за полесен пристап до земјоделски површини, со гребен асфалт саниравме улици, градевме потпорни ѕидови онаму каде што требаше.

Со цел за подигнување на нивото на хигиената во градот и населените места, општина Неготино набави ново специјализирано возило попознато како » метларка“, набавен е повеќенаменски камион самоподигач за прифаќање и транспорт на големите индустриски контејнери за отпад, а истиот располага и со опрема за чистење на снег и кран за подигање товар, ЈП Комуналец заедно со сопствена изработка на компоненти од урбана опрема со поставување 200 корпи за отпадоци, набавивме околу 100 контејнери за селектирање на отпад и 150 канти за собирање смет, се врши континуирано хортикултурно уредување на јавните и парковските површини, како и други тековни активности со кои придонесуваме да имаме чист, уреден град.

Во делот на уредувањето на парковски површини и реконструкција и изградба на детски игралишта, извршивме уредување на околината на споменикот Саат-кула со средства од 6 милиони денари и поставување урбана опрема, реквизити, паркинг простор и осветлување на просторот,

Реконструиран е и ставен во функција паркот на влезот во Неготино кај споменикот на Манчо Малиминов, реконструирани се и поставени се нови реквизити, осветлување и други елементи на детските игралишта во населбата Саат кула и кај Музејот на град Неготино, реконструирани се детските игралишта и поставени нови реквизити во најголемиот дел од населените места.

Општина Неготино продолжи со одржување на постоечкото осветлување и поставување на енергетски ефикасни светилки во градот и населените места, а таквиот пристап придонесе последната година потрошувачката на електрична енергија за јавното осветлување во општината да се сведе на најмала мера од 360.000 киловат часови.

Реализација на проект за енергетска ефикасност реализиравме и во средното општинско училиште и во двете основни училишта, осветлен е и оспособен за ноќни тренинзи градскиот фудбалски стадион во Неготино, како и сите позначајни јавни површини.

Општина Неготино изработи проект и преку програма ко-финансирана од Европската унија доби грант од 170.000 евра за набавка на возило комбе за превоз на лица со попреченост, урбана опрема за велосипедски парк, 10 електрични велосипеди, 5 електрични трицикли за лица со попреченост, набавка на 5 полначи за електрични велосипеди, изработка на истражување за велосипедска патека во Неготино, развој и изработка на стратегија за урбана мобилност во општината и слично.

Во изминатиот период од 3 години исплатени се средства и тоа:

-по 7.000 денари за секое новороденче

-по 3.000 денари за секое прваче

- субвенционираше по 7.000 денари за набавка на инвертер клими

-од Буџетот се исплатија средства за субвенционирање за набавка на велосипеди

- на ментори и ученици им беа доделени парични награди од 5.000, 4.000 и 3.000 денари

За непречено функционирање на спортистите и спортските клубови за 3 години од општинскиот Буџет се исплатени 18 милиони денари

Општина Неготино го финансира одржувањето на бројни манифестации како што е одбележувањето на празникот на лозарите и винарите Свети Трифун, го организира традиционалниот Неготински панаѓур, првоаприлскиот маскенбал, настанот „ Среќен почеток на новата учебна година", а исто така поддржува и учествува во организирањето и на други настани и манифестации со кои се збогатува културно-забавниот живот во градот и селата.

ГОРАН СТОЈАНОВ, ГРАДОНАЧАЛНИК НА ОПШТИНА НЕГОТИНО

Центар за комуникации на ВМРО-ДПМНЕ