Здравје

Сте слушнале ли за емоционална исцрпеност? Осум клучни знаци на оваа скриена состојба!

Дали чувствувате постојан песимизам и незаинтересираност за вашиот личен живот? Можно е да страдате од емоционална исцрпеност, тоа е чувство дека немате повеќе енергија да изразувате емоции.

Оваа психолошка состојба се јавува кога постојано сте изложени на стрес.

Експертите велат дека постојаното слушање или справување со туѓите трауматични ситуации може да остави трајни последици на вас, бидејќи тоа значи преземање на туѓите страдања.

-Кога постојано сочувствувате со другите, физички и емоционално се исцрпувате. Постојаното изложување на проблеми може негативно да влијае на менталното здравје и благосостојба на поединецот - вели Џејд Џејмс, психотерапевт.

Истражувањето на Британското здружение за советување и психотерапија покажа дека луѓето кои страдаат од емоционална исцрпеност доживуваат промени во расположението и депресија. Последиците можат да бидат и физички, вклучувајќи замор, несоница, недостаток на апетит и главоболки. Симптомите можат да влијаат и на социјализацијата, бидејќи може да се оддалечите од блиските, велат експертите.

Треба да побарате помош ако почувствувате некој од следниве симптоми:

-Беспомошност и чувство на немоќ

-Чувство на отуѓеност, рамнодушност и емоционална дистанцираност

-Губење интерес за активности во кои некогаш сте уживале

-Неможност да ги извршувате секојдневните задачи/губење на продуктивноста

-Промени во расположението

-Депресија

-Анксиозност

-Чувство на напнатост

-Замор

-Несоница или други нарушувања на спиењето, на пример, кошмари

-Занемарување на грижата за себе

-Социјална изолација

-Недостаток на апетит

-Главоболки

-Неможност да го одвоите професионалниот живот од личниот

Психолозите тврдат дека поголема е веројатноста да ја развиете оваа состојба ако сте во улога во која им помагате на другите. Ова значи дека оние кои работат во емоционално интензивни полиња, како што се домовите за стари лица, болниците и единиците за ментално здравје се изложени на поголем ризик.

Стручните лица советуваат да побарате емоционална поддршка и да одржувате здрави односи надвор од работното место за да си олесните емоционално.

Македонија

Приведен кавадарчанец по распишана централна потерница

Кавадаречката полиција ноќеска околу 1 часот по полноќ го лишила од слобода Д.А. (36) од Кавадарци, кој бил баран по централна потерница издадена врз основа на судска наредба за издржување на затворска казна во времетраење од две години.

Како што информираат денеска од МВР, лицето било спроведено во Казнено – поправната установа Затвор Гевгелија за издржување на казната.

Фудбал

Баерн ќе се обиде да го привлече Бруно Фернандеш доколку Тухел остане

Баерн Минхен е заинтересиран за играчот од средниот ред на Манчестер Јунајтед, Бруно Фернандеш, тврди „Билд“.

На тренерот на баварците, Томас Тухел му се допаѓаат квалитетите на португалскиот репрезентативец и ќе инсистира да го привлече на „Алијанц арената“ доколку тој самиот ја задржи функцијата.

Се поверојатна изгледа опцијата Тухел да остане на кормилото на баварците. На крајот на февруари беше најавено дека стручњакот ќе замине на крајот на сезоната, но со оглед на големиот број имиња кои одбија да го заменат на клупата, и двете страни со задоволство би ја продолжиле соработката.

За да се согласи да остане во Баерн, Тухел сака да му биде продолжен договорот и да има збор во изборот. Бруно Фернандеш е меѓу новите засилувања кои ги посакува Германецот. На списокот на Тухел се наоѓаат и Тео Ернандез од Милан и Жоао Палиња од Фулам. Јосип Станишиќ по позајмица ќе се врати во Баер Леверкузен.

Според различни информации, во трансфер плановите на Баерн се и Френки де Јонг, Чави Симонс, Асан Ведраого, Крис Фирих, Андре Онана и Јонатан Та.

Живот

Дејвид Коперфилд обвинет за сексуална злоупотреба од повеќе жени

Повеќе жени го обвинија американскиот илузионист Дејвид Коперфилд за сексуална злоупотреба. Настаните се случувале во распон од неколку десетлетија, објави британски „Гардијан“.

Од 16 жени, некои биле и помлади од 18 години кога наводно се случило она што го тврдат. Коперфилд беше обвинет за недолично однесување и во 2018 година, кога жена по име Бритни Луис тврдеше дека тој ја дрогирал и сексуално ја нападнал три децении претходно. Натаму, три жени тврдат дека Коперфилд ги дрогирал пред секс. Настаните, според можните жртви, го опфаќаат периодот од доцните 1980-ти до 2014 година.

Коперфилд (67) одрекува каква било злоупотреба и „никогаш не постапувал несоодветно кон никого, а не пак, кон малолетник“, нагласуваат неговите адвокати.

Коперфилд претходно беше „под лупа“ и поради неговите врски со обвинетиот сексуален подведувач Џефри Епстин, кој почина во затвор во 2019 година.

„Нашиот клиент не беше свесен за грозоморните злосторства на Епстин... Како и остатокот од светот, и тој дозна за тоа од печатот“, тврдат адвокатите на Коперфилд.

Друга жена, која доби псевдоним во печатот, сведочи дека го запознала илузионистот по еден негов настап, кога имала 15 години. Таа раскажува дека следниве години, тој ѝ се јавувал доцна во ноќта и ѝ испраќал подароци, а кога наполнила 18 години, вели, двајцата имале консензуални односи.