Имено, градските власти уплатиле околу 185.000 евра за џиновската скулптура за промовирање на локалната туристичка индустрија.
Локалните весници ги цитираат градски власти дека „летачката лигња“ е замислена како дел од туристички објект за да и се помогне на економијата погодена од епидемијата на коронавирус. Розово-белата статуа со раширени пипци е поставена за љубопитните луѓе да можат да се фотографираат.
Многу региони во Јапонија доживуваат голем пад на бројот на туристи поради пандемијата „ковид-19“, а градот Ното, каде што лигњите се вистински деликатес, наводно добиле значителна финансиска поддршка од владата за надминување на кризата, пренесува „Гардијан“.
- Скулптурата можеби ќе може да го поттикне туризмот на долг рок, но мислам дека би било подобро ако тие пари беа потрошени за медицинските работници на кои очајно им треба поддршка во моментов - вели еден жител на Ното.
Јапонскиот туризам тешко дека ќе се опорави толку брзо. Минатиот месец, премиерот Јошихиде Суга прогласи вонредна состојба во Токио и Осака, а владата сега размислува за продолжување на мерките за префектурите Хјого и Кјото.
Рестриктивните мерки, кои вклучуваат затворање на рестораните и големите продавници, треба да завршат на 11 мај, нешто повеќе од 70 дена пред отворањето на Летните олимписки игри во Токио.
Хирофуми Јошимура, гувернерот на префектурата Осака, каде капацитетот на болницата за пациенти со тешка форма на ковид-19 веќе надминал 99%, ќе побара од централната влада да ги продолжи итните мерки, бидејќи инфекциите не се намалуваат толку брзо како што се очекувало.
Покрај тоа, досега се вакцинирани помалку од 2% од населението во земјата. Јапонија вчера пријавила повеќе од 4.100 нови случаи - сега имаат 614 000 заболени, а бројот на смртни случаи се искачи на 10 500.