По инцидентот со излевањето на цистерната во дворот во која што претходно бил складиран отровниот Метил Акрилат Мономер јавноста дозна дека оваа фабрика крие и уште поопасен отров - винил-хлорид сместен во стара цистерна која претставува темпирана бомба, тврдат експертите за хемија.

Винил хлоридот, објаснува професорот од Институтот за хемија Јане Богданов, има реакција со воздух, светлина или при контакт со метали, и ако малку се изгуби контрола веднаш доаѓа до пожар или екполизија. Исклучително штетна е за здравјето на луѓето со високо канцерогени својства.

За безбедно отстранување на опасната хемикалија едно од најдобрите решенија според професорот Богданов е стручни лица постепено да ја третираат и со хемиски реакции да ја претворат во пластика, за што и примарно се употребува винил хлоридот.

Надлежните, од друга страна, тврдат дека и натаму бараат решение за отровот во ОХИС. Скопскиот градоначалник Шилегов уверува дека иако примарната надлежност и одговорност ја има државата, Градот заедно со Министерството за животна средина преземаат чекори што е можно побрзо да се исчисти земјиштето од разните видови отрови распослани во дворот на фабриката за да не дојде до еколошка катастрофа.

Во меѓувреме, се уште се испитува еко-инцидентот во „ОХИС“ од петокот кога во кругот на фабриката истече контаминираната вода од цистерна со високо токсична материја, прецизираат надлежните. Тврдат опасните хемикалии се под надзор, но потребен е елаборат за нивниот состав за да почне постапката за нивно дислоцирање.