Изградбата на вештачката акумулација над градот Штип ќе стартува оваа година, но со намалени средства имајќи ја предвид пандемијата и кратењето на буџетските средства за капиталните инвестиции во Министерството за транспорт и врски, посочи градоначалникот на Општина Штип, Благој Бочварски.
Министерството за транспорт и врски за изградбата на браната за оваа година имаше издвоено 200 милиони денари.
– Јас немам информации колку средства се скратени во овој момент за изградбата на овој проект. Но, важно е да има една стартна сума на пари којашто ќе можеме да ја започнеме во 2020, еден дел од нив да се потрошат, реализираат. Така што за нас во овој момент многу е важно да го добиеме одобрението за градење, да се распише тендерот, да биде успешен и да ја воведеме во работа фирмата. До крајот на годината сигурно неможат да се реализираат толкава сума на пари, но важно е да започне и да реализираме што е можно повеќе, вели Бочварски.
Тој очекува веќе 2021 година со поголемо темпо да се гради браната на река Отиња, за штипскиот градоначалник важно е да се почне изградбата.
– Ова се нови моменти, нови времиња, коишто не се предвидливи и токму поради тоа неможеме да форсираме некаква брза изградба или голема реализација во текот на оваа година, но важно е да опстоиме на проектот и да сите се согласиме дека тој и во едно вакво време треба да продолжиме да го буткаме и да го реализираме, рече Бочварски.
Во тек е постпката за добивање на градежната дозвола за изградба на брана на река Отиња. Бочварски вели дека забелешките кои ги имале од Министерството за транспорт и врски се отсранети, а деновиве ќе работат на забелешките од ИЗИС.
-Кога ќе бидат завршени и забелешките во однос на барањето на ИЗИС повторно ќе биде аплициран проектот за одобрение за градење во Министерството за транспорт и врски, со што ќе очекуваме одобрение за градење и потоа и распишување на тендерот, јавната набавка, вели Бочварски.
Овој капитален проект, кој штипјани го чекаат со децении ќе чини околу 7,5 милиони евра, а се очекува изградбата да трае од две до две и пол години. Средствата се обезбедуваат од буџетот на Република Македонија. /МИА