Тениската легенда Серена Вилијамс, воедно и модна икона, но и мајка на двегодишно девојче, дизајнираше фустан што според неа одговара на „секого и сечие тело“.
Позната по своите смели модни потези на теренот и на црвениот тепих, Серена лансираше нова модна колекција со цена за фустани од 107 евра, која веднаш е распродадена. Таа го претстави фустанот со заврзан преден дел на својот Инстаграм профил. Седум жени со различни облици на тело позираат во црвен фустан, а најважната карактеристика на фустанот е, како што истакнува Серена, дека им одговара на сите жени без оглед на формата на телото во кои можат гордо да ги истакнат нивните облини.
Во моментов, фустанот е достапен на веб-страницата Серена Вилијамс во само две, најголемите димензии 2X и 3X.
Иако многумина го фалат последниот потег на Серена Вилијамс бидејќи крши табуа и испраќа силна порака, не сите се воодушевени од „фустанот што им одговара на сите“. Коментарите како „Ниту една жена не изгледа добро со голем јазол среде стомакот“ може да се прочитаат на Твитер.
Познатата тенисерка е добро позната како поборник за природна убавина, која не ја пропушта можноста да ја истакне важноста за прифаќање на сопственото тело со сите свои недостатоци.
Неодамна таа беше на насловната страница на модниот магазин Harpers Bazaar во златен фустан , што ги истакна нејзините облини .