Свет

Сѐ помали се надежите дека ќе бидат пронајдени Лука и Кристијан, изгубени на планина во Италија

Италијанските медиуми денеска објавија дека има сѐ помалку надеж дека ќе бидат спасени двајцата италијански планинари кои од 22 декември се заробени на планината Гран Сасо.

Кристијан Гвалди и Лука Перачини доживеале несреќа додека планинареле кога се лизнале и паднале во бездна, а се претпоставува дека еден од нив е повреден.

Напорите на спасувачките екипи да стигнат до нив, како и претходните денови, се отежнати поради лошите временски услови и опасноста од лавина, а само хеликоптер можеше да се обиде да ги пронајде доколку се подобри времето, објави АНСА.

Како што се наведува, најголемиот ризик со кој се соочуваат планинарите е хипотермијата и дека потрагата ќе продолжи штом се подобрат временските услови.

Кристијан Гвалди и Лука Перачини се од регионот Емилија Ромања. Се вели дека тие се заглавени во клисурата на Вале дел Пеколно, под масивот Гран Сасо, откако се лизнале додека се обидувале да стигнат до врвот Корно Гранде, кој е на 2.914 метри. Инаку, планината Гран Сасо се наоѓа на околу 150 километри источно од Рим, во регионот Абруцо, во близина на градот Аквила.

Моменталната температура во регионот е минус 10, а дува ветер со неверојатна сила од дури 140 километри на час. Иако техничарите успеале да го решат проблемот кој ја блокирал жичарницата, временските услови не дозволиле да се спуштат.

Фудбал

Без регистрација - дали Дани Олмо заминува од Барселона?

Повторно се појавија проблеми околу регистрацијата на шпанскиот репрезенативец  Дани Олмо во тимот на Барселона.

Неговиот понатамошен настап во натпреварите од шпанската Ла Лига е доведен во прашање, бидејќи Каталонците не ги исполнија условите потребни за регистрација.

Последната шанса да ја промени ситуацијата на подобро Барселона ќе ја има на 30 декември кога ќе има ново рочиште во врска со жалбата која беше поднесена.

Каталонскиот великан има рок за регистрација на Олмо до 31 декември, покрај Дани Олмо со забрана за регистрација се соочува и Пау Торес .

Инаку, Олмо сезонава забележа 15 настапи во сите натпреварувања, постигна шест гола и даде една асистенција, додека Торес играше 23 пати.

Свет

Кина воведе санкции за западните компании

Имотот на овие компании во Кина, како што се наведува, ќе биде замрзнат, а на кинеските субјекти им е забрането да соработуваат со нив.

Кинеската влада денеска одобри воведување санкции против седум западни компании како одговор на неодамнешните најави на САД за продажба на оружје и воена помош за кинескиот регион Тајван, соопшти денеска Министерството за надворешни работи во Пекинг.

Имотот на овие компании во Кина, како што се наведува, ќе биде замрзнат, а на кинеските субјекти им е забрането да соработуваат со нив.

Во соопштението на Министерството за надворешни работи се вели дека потезите на САД ги прекршуваат договорите меѓу двете земји за Тајван, се мешаат во внатрешните работи на Кина и го поткопуваат суверенитетот и територијалниот интегритет на нацијата.

Американскиот претседател во заминување Џозеф Бајден минатата недела одобри воена помош од 571 милион долари за Тајван, а Пентагон објави продажба на оружје во вредност од 295 милиони долари на островот.

Македонија

За дочекот на Нова година градот организира прослава на плоштадот Македонија

Град Скопје го прекина молкот. Пет дена пред највеселата ноќ соопшти дека на градскиот плоштад во Скопје ќе има новогодишна прослава.

Екипи на терен веќе почнаа со поставување на сцената, на која на 31-декември ќе настапат познати македонски поп, рок и етно музичари.

Дел од граѓаните со кои разговаравме, се завоволни од програмата на градскиот плоштад. Дел од нив ќе дојдат на прославата, дел ќе останат во домашен амбиент или некаде во домашните туристички места.

Од Здравствен дом - Скопје апелираа, особено до помладите, да внимаваат на консумирањето на алкохол и употребата на пиротехнички средства, а хронично болните да се придржуваат до терапијата.

Од таму информираа дека на новогодишната ноќ достапни ќе бидат дежурните ординации за здравствена заштита во трета смена - Поликлиниките Јане Сандански, Чаир, Ченто, Шуто Оризари, Ѓорче Петров , Драчево и Бит Пазар. Овие поликники ќе работат и во неделите и во празничните денови.

притисни ентер