Нови 115 потврдени случаи од 1032 тестирани во последното деноноќие. Заразата најмногу се шири во Скопје, па речиси половина – 53 случаи, се регистрирани во метрополата. Во Струга во последните 24 часа има 13, а во Тетово 8 новодијагностицирани.
Во дневниот корона биланс впишани се 40 оздравени пациенти. Но, болничките кревети како се празнат, така одново се полнат, па во Инфективната клиника има 88 пациенти, повеќе од половина од нив, 54 пациенти, се на кислородна поддршка.
Во „8 Септември“, првиот ковид центар во земјава, сега, згрижува 123 пациенти позитивни на Ковид, а петмина од нив се борат за живот, приклучени на респиратор.
Најмладиот пациент заразен со коронавирусот е бебе старо само дваесет дена. Девојчето заедно со својата мајка е сместено во вториот ковид-центар, Институтот за белодробни заболувања кај деца Козле.
Освен бебето, во болницата „Козле“ хоспитализирани се уште 4 деца со своите мајки, сите позитивни на КОВИД 19, а во овој ковид-центар, се лекуваат и 26 возрасни, од нив двајца се на кислородна поддршка.
КОВИД 19 не ги обиколува лекарите, па заразата се шири и помеѓу нив. Вирусот ја зеде и првата жртва од здравстените работници. Од компликации од коронавирус во болницата „8 Септември“ почина 64-годишниот доктор Деари, уролог од Тетово, кој 15 дена лежел во болница, првично поради невролошки проблеми, но бил и позитивен на ковид-19, потврди министерот Филипче.
Вирусот во последното деноноќие зеде уште 7 жртви, па сега црниот биланс е 341.