„Секако, Русија ќе го поддржи ваквиот пристап“, рече Путин на телевизискиот состанок за пандемија, барајќи од руската влада да работи на тоа.
„Во сегашните околности, како што реков многу пати, не треба да се размислува за тоа како да се заработи што повеќе, туку за тоа како да се гарантира безбедноста на луѓето“, рече тој.
Русија досега произведе четири вакцини, почнувајќи од главната, Спутник V, како и „лесната“ верзија што е одобрена денеска од здравствените власти со една наместо две дози.
Така Путин им се придружи на Соединетите држави, кои се залагаат за укинување на патентите.
Путин, сепак, воопшто не го спомнал предлогот на Вашингтон, дури рече дека идејата потекнува од Европа.
Мислам дека „заслужува внимание, со тоа мислам на едноставно укинување на заштитата на патентите за вакцината против ковид-19“, додаде тој.
Европската унија денеска соопшти дека е „подготвена да разговара“ за ова прашање, што ќе се најде на дневниот ред на утрешниот самит на 27 земји-членки во Порто, но изразиле сомнеж за успехот на таквата мерка за забрзување на вакцинацијата ширум светот. ЕУ досега се спротивставувала на таквата идеја.
Францускиот претседател Емануел Макрон денеска исто така рече дека е „безусловно за укинување на заштитата на интелектуалната сопственост“, а Германија вели дека се „отворени за дебата“.