Македонија

Прилепски „Пазари“ со милионски долгови и сомнителни продажби на имоти

Прилепското јавно претпријатие „Пазари“ има наследено долгови од околу пет милиони денари и доведено е во прашање неговото работење, вели новиот директор Кристијан Илиески, кој на денешната средба со новинарите ја поретстави, како што рече, крајно тешката финансиска состојба на претпријатието.

Илиески вели дека фирмата била без денар на сметката и со неисплатени плати за 27-те вработени кога во ноември бил назначен за директор.

- Кога дојдов на чело на претпријатието затекнав долгови од околу пет милиони денари. Само по основ на ДДВ на УЈП претпријатието ѝ должеше преку два милиона денари и уште 300.000 денари камати. Имаше долг од 300.000 денари за неплатен данок на имот, на вработените за неостварени права според колективниот договор за 2015 година им должеше 700.000 денари и уште 460.000 за минатата година. Претпријатието има обврски за плаќање од 550.000 денари, а сѐ уште не се знае кому и што должи, вели Илиески.

Новиот директор на ЈКП „Пазари“ нагласува дека досега успеал од обврските да исплати 2,9 милиони денари кон вработените и за неплатен ДДВ.

За Илиески голема непознаница се состојбите со поранешниот млечен пазар и „Сточниот пазар“ каде е Терминалот. Посебно сомнителна е, вели, продажбата на млечниот пазар во центарот на градот наспроти големиот зелен пазар.

- Продажбата на „Млечниот пазар“, или популарниот поранешен Пазар за сирење е сомнителна и допрва ќе се истражува. Претпријатието го загуби тој простор и не е сѐ уште сфатливо зошто тогашниот Управен одбор на „Пазари“ се откажал од просторот во корист на општината. Прво, беше продаден на „Кам-маркетите“, а потоа на „Тинекс“, а претпријатието не доби ниту денар од тоа, вели Илиески.

Во прилепски „Пазари“ отворено се поставува прашањето каде се парите од продажбвата на Млечниот пазар, но и од сомнителните трансакции за „Сточниот пазар“.

- За уредувањето на овој пазар, претпријатието инвестираше 4 милиони денари, за потоа, со промена на деталниот план, општината да им го одземе имотот. Освен тоа, угостителскиот објект во сопственост на ЈКП „Пазари“ е продаден за екстремно ниска цена од околу 13.000 евра, објаснува Илиески.


Според него, ЈКП „Пазари“ не може да функционира доколку не добие субвенции од општината од четири милиони денари.

- Наш основач е Општината. Неопходни ни се субвенции од 4 милиони денари за состојбата да се доведе до „позитивна“ нула“ и претпријатието полека да застане на свои нозе. Сакаме да го вратиме сјајот на зелениот пазар надалеку познат во регионот и да почнеме рентабилно да работиме. За тоа дека недомаќински претходно работеле директорот Пецо Димоски и поранешниот градоначалник Марјан Ристески, покрај натрупаните долгови, е и фактот што зелениот пазар четири пати се препокривал, рече Илиески. /МИА

Свет

Си Џинпинг упати сочувство до Иран: Кина загуби добар пријател

Кинескиот претседател Си Џинпинг упати сочувство до Иран, изразувајќи жалост за смртта на Ебрахим Раиси и Амир Абдолахиан, соопшти Министерството за надворешни работи на Пекинг.

Си рече дека Раиси во голема мерка придонел за мирот и стабилноста во Иран и одиграл важна улога во консолидирањето на кинеско-иранското стратешко партнерство, соопшти Министерството.

„Неговата несреќна смрт е голема загуба за иранскиот народ, а Кина загуби добар пријател. Кинеската влада и кинескиот народ го негуваат пријателството меѓу Кина и Иран. Кина ќе продолжи да го продлабочува и развива ова партнерство. Кина покажа голема загриженост поради овој инцидент и вети дека ќе го поддржи Иран на кој било начин“, се додава во соопштението.

Македонија

Еко-свест испрати писмо со предлози до новата Влада за заштита на животната средина

Еко-свест, како што наведуваат, го дава својот приднес кон програмата на новата Влада и ги образложува мерките за секоја од компонентите за заштита и унапредување на животната средина.

Центарот за истражување и информирање за животната средина Еко-свест Скопје денеска испрати писмо со предлози за новата влада, кои како што велат, ќе придонесат кон видно подобрување на квалитетот на живот и благосостојба на луѓето и мора да станат главен приоритет за новата Влада.

- Здравата и чиста животна средина, која е уставно загарантирано право на секој граѓанин на Македонија, зачувувањето на природата и подобрувањето на еколошките стандарди, како и амбициозните мерки за климатска акција кои ќе придонесат кон видно подобрување на квалитетот на живот и благосостојба на луѓето мора да станат главен приоритет за новата Влада, се вели во соопштението.

Еко-свест, како што наведуваат, го дава својот приднес кон програмата на новата Влада и ги образложува мерките за секоја од компонентите за заштита и унапредување на животната средина.

Како приоритети ги наведува важноста за преземање мерки и активности насочени кон декарбонизација и климатска акција, обезбедување на „паметна“ енергија за сите, расчистување на историските жешки точки, подобрување на квалитетот на воздух, обезбедување на соодветна заштита за природата и водите и реализација на проектите кои ќе овозможат развој на циркуларната економија во земјата.

Според нив, граѓаните во последната деценија станаа видно загрижени за состојбите со животната средина бидејќи тие влијаат врз нивното здравје. Потребно е во новата Влада, како што нагласуваат, фокусот да се стави на заштитата на човекото здравје преку заштита и унапредување на животната средина, како и зголемување на стандардите кои ќе придонесат кон превенција на загадувањето на природата.

- Секоја политика и одлука која влијае врз животната средина, е политика која влијае на нашето здравје. Носењето одлуки во интерес на заштитата на здравјето на граѓаните на Македонија треба да е врвен приоритет на новата Влада која ќе се формира по Парламентарните избори 2024 година, се вели во писмената изјава на Ана Чоловиќ Лешоска, извршна директорка на Еко-свест.

Од Здружението Еко-свест додаваат дека со своите стручни познавања стекнати во текот на 22 години работа на полето на заштита на животната средина и климатска акција се отворени за дискусија и помош во имплементација на најдобрите политики и мерки во овие области.

Македонија

За поднесените претставки околу уривањето на стадионот Касами дознал од јавноста

За поднесените претставки околу уривањето на стадионот Касами дознал од јавноста, смета дека нема дискриминација и прекршување на законите.

Градоначалникот на Тетово, Биљал Касами вели дека знае од медиумите за претставките поднесени од граѓаните околу стадионот, но во Општина Тетово не стигнале документи од институциите.

За поднесената претставка за дискриминација кон Македонците кога имаше организирано манифестација за најава на градежните работи, Касами во еден подолг одговор рече и дека организацијата била моноетничка и дека не била направена дискриминација.

На прашањето дали согледува дека Општината направи дискриминација кон Македонците, одговори со „Не, во ниту еден случај“.

- Тоа беше јавен настан. Доколку би имало интерес и од Македонци да присуствуваат и во делот на организирање и во делот на присуство сигурно дека и нивните барања би биле почитувани. Во секој јавен настан јас во ниту еден момент не правам дискриминација, ги почитувам сите граѓани. Еве во овој денешен настан каде што има Македонци ученици, комуницираме и ги почитуваме и нивните потреби и барања. Таму беше едноставно организирањето од страна на публиката и на тифо групите на Шкендија и согласно тоа беше целото сценарио. Инаку кога би имало такво барање во следните фази сигурно ќе има и процедури за изградба, рече Касами.

На новинарска забелешка дека тоа не треба да биде по барање на граѓаните туку автоматски општината тоа треба да го прави за сите, Касами рече дека согласно публиката се прави организирањето.

- Ако нема граѓани кој би присуствувале и би побарале за да и тие бидат дел од тоа. Ние и во организирање на други активности, согласно публиката одиме со организирање. Каде што има и Албанци и Македонци одиме и албански и македонски заедно го организираме. Каде што има само Македонците одиме на македонски. Согласно барањата така и ние одговараме. Во следните фази на изградба доколку би имало барање да тоа биде на граѓанско ниво, на сите и би учествувале сите, сигурно ќе има и албанска и македонска музика. Имаме и такви примери на организирање на Културно лето, има и Албанци има и Македонци и се. Во други активности никого не дискриминираме. Но организацијата беше во тој правец моноетничка и така беше настапот. Инаку во следните фази доколку има барање и потреба да биде мултиетничка во служба на сите граѓани, ние сме подготвени да одговориме, истакна Касами.

Тој смета дека не направиле прекршување на законите околу тендерите.

- Општината нема таква информација. Ние ја слушнавме од јавноста. Ќе треба да се обратиме до Владата дали треба и што процедура треба, ако треба нешто посебно. Според нашиот правен сектор сме ги почитувале сите процедури на тендерирање и јавни процедури за да се изгради тој стадион. Ако требало нешто плус или ако треба нешто посебно сме подготвени тоа до крај, рече Касами.

На 12 април Општина Тетово организираше активност со цел презентација на новиот изглед на овој објект откако претходно беше распишан тендер за избор на фирма која ќе направи целосна реконструкција или изградба на нов објект. Покрај видео презентацијата на новиот изглед на стадионот имаше ревијален фудбалски натпревар и настап на музичари. Градоначалникот самиот изврши симболично уривање на дел од трибините.

Во текот на април постапка за дискриминација поведе Даријан Сотировски, жител на Тетово и директор на Комисијата за односи меѓу верските заедници и религиозни групи. Во мај тој побара Државното правобранителство да го штити државниот имот Градски стадион Тетово од Општина Тетово, која како траен корисник, нема сопственост и не смее да ја менува или располага стварта која ја користи.

притисни ентер