Нови четири смртни случаи со кои бројот на умрени се зголеми на девет предизвика паника во Карачи и загриженост дека ситуацијата е надвор од контрола на градските власти кои не успеале да го идентификуваат изворот на течење, ниту видот на гасот, иако службениците ги отфрлиле сомнежите за саботажа.
Стотина луѓе се разболеле од неделата навечер кога населбата Камари на брегот, прв пат беше зафатена со гас без мирис кој предизвикува сериозни проблеми со дишењето а луѓето одеднаш почнале да се јавуваат во локални болници.
Властите соопштиле дека имале намера до денес вечер да ги евакуираат жителите на Камари бидејќи е најблиску до главното пристаниште во Карачи.
Шефот на локалната полиција Адил Малик рекол дека околу 150 луѓе се јавиле во болница до понеделник со исти симптоми а од утрото кога се пријавени пет смртни случаи, до вечерта тој број е зголемен на девет.
Од болницата е соопштено дека повеќе од 650 лица добиле помош, а сите разболени се жители на Камари. Немало пријавено случаи на труење во самото пристаниште.
Од пристаништето во Карачи тврдат дека немало никакво течење на гас од нивните простории.
Карачи е најголем град во Пакистан и трговски центар на таа земја. Во близина има рафинерија за нафта а таму е исто така сместен и главниот објект на пакистанската воена морнарица.