Македонија

Почна комисиската расправа за предлог буџетот за 2025 година

За власта развоен и реален, за опозицијата расипнички и недомаќински, предлог-буџетот за 2025 година влезе во собраниска процедура со поднесени 307 амандмани од политичките партии.

Во експозето на комисиската расправа министерката за финансии Димитриеска Кочовска изјави дека распределбата на парите ќе овозможи непречено функционирање на институциите, вистинска борба со сивата економија, економски раст и одржливост на подолг рок.

Во име на опозициската СДСМ лидерот Филипче повтори дека неговата партија нема да даде поддршка бидејќи според нив се работи за неодговорно трошење, се крати во клучните сектори и дополнително се оптоварува администрацијата.

Со критики за одвоените буџети во правосудството се огласија и државниот обвинител Коцевски и претседателката на Судскиот совет Дамева. Се пожалија дека и за следната година за нив не биле предвидени пари за нови вработувања, опрема и обуки кои велат дека им се неопходни за независен и ефикасен правосуден систем.

Во предлог буџетот, владата планира да потроши 6,5 милијарди евра, а да собере 5,8 милијарди, односно дифицититот ќе биде речиси 700 милиони евра. На високо ниво се прокетирани и капиталните инвестиции, нешто над 800 милиони евра.

Според новиот деловник комисиската расправа за буџетот може да трае до крајот на овој месец, а според најавите од собранискиот спикер Гаши на пленарна седница најверојатно ќе се најде пред нова година.

Свет

Израелко- палестинска „војна“ во Париз, на натпреварот е и Макрон (ВИДЕО)

Франција и Израел вечерва на „Стад де Франс“ го играат натпреварот од 5. коло во Лигата на нации, а трибините на стадионот во Париз се полупразни поради францускиот протест против Израел.

Мнозинството Французи не сакале да дојдат на натпреварот во знак на протест што нивната репрезентација го пречека Израел на домашен терен. Малиот број навивачи собрани на трибините решија да ги нападнат Израелците.

Во текот на натпреварот Французите ги нападнаа израелските навивачи и на една од трибините настана тепачка. Инциденти имаше и пред самиот натпревар, додека пропалестинските активисти се обидоа да ги нападнат Израелците, но сѐ остана „само“ на нивна пресметка со полицијата.

Икс е полн со постови од француски навивачи кои велат дека е срамота што натпреварот со Израел се игра во Париз додека израелската армија врши геноцид во Газа. Присутните навивачи ја исвиркуваа химната на Израел пред почетокот на натпреварот.

Да потсетиме, неодамна имаше конфликт на улиците на Амстердам каде Макаби од Тел Авив гостуваше кај Ајакс. Марокански навивачи претепаа голем број израелски навивачи поради провокации на сметка на настаните во Газа.

Свет

Во огромна дупка се заробени 4.000 прегладнети рудари, министерката им се закани (ВИДЕО)

Во Јужна Африка се случува вистинска драма бидејќи според неофицијални проценки, речиси 4.000 нелегални рудари се заробени во еден рудник, а можностите за снабдување со храна и вода се прекинати.

Владата го прекина синџирот на снабдување за да ги „намами“ илегалците од рудникот и да ги уапси.

Владата официјално соопшти дека нема да има помош за овие рудари, кои се наоѓаат во затворен рудник во северозападната провинција, бидејќи тоа не е во согласност со официјалната политика против илегално ископување.

Се верува дека рударите во рудникот Стилфонтејн страдаат од недостиг на храна, вода и други основни потреби, откако полицијата ги затвори влезовите што се користат за транспорт на материјали во рудникот.

Министерката во Претседателството Кумбуџо Нтшавени им рече на новинарите дека владата нема да испрати помош за илегалните рудари - локално познати како „зама замас“ - бидејќи тие се вклучени во криминални активности.

„Нема да им испратиме помош на криминалците. Со чад ќе ги избркаат. Ќе излезат. Нема помош за криминалците, тие ќе бидат гонети. Не сме ние тие што ги испративме“, рече Нтшавхени.

Таа рече дека рударите ќе бидат кривично гонети.

„Не отидоа таму за добро за државата, па нема ни да им помогнеме“, рече министерката.

Нтшавхени им се закани и на оние кои сакаат да им помогнат на рударите.

„Тие што сакаат да им помогнат, мора да слезат да им однесат храна, но штом ќе излезат ќе ги уапсиме“, рече министерката.

Рударите се во окното во Стилфонтејн, рударски град кој се наоѓа на околу 155 километри југозападно од Јоханесбург. Во текот на изминатите неколку недели, повеќе од 1.000 рудари се појавија и веднаш беа уапсени од полицијата како дел од нивната операција „Вала Умгоди“ - или „Затвори ја дупката“.

Јужна Африка некогаш беше најголемиот светски производител на злато, но бележи пад во последните неколку децении. Голем број локации сега се напуштени и се распаѓаат. Илјадници нелегални рудари влегуваат во овие затворени рудници за да најдат повеќе злато и други минерали, ризикувајќи ги своите животи поради состојбата на овие рудници.

Минатата година, во јуни, најмалку 31 лице загина во затворен рудник во провинцијата Фри Стејт по експлозија на метан.

Многу нелегални рудари доаѓаат од соседните земји - Мозамбик, Зимбабве и Лесото.

Не само што го кршат законот со илегално ископување во рудници, туку често вршат и други кривични дела - вклучувајќи убиства, грабежи и силувања.

Има и војни на терен во кои се вклучени тешко вооружени „зама замас“ кои се борат против ривалските групи и често се борат против локалните власти.

Автомобилизам

Кинеска компанија за електрични автомобили го одложува почетокот на производството во Шпанија

Кинескиот производител на електрични автомобили Chery ќе го одложи почетокот на производството на возила во Шпанија за речиси една година, изјави извршниот директор на шпанскиот партнер на Chery, Ебро.

Во септември, Ебро објави дека, од комерцијални причини, Chery ќе го одложи почетокот на производството во првата европска фабрика во Барселона од крајот на оваа година за следната година, без да наведе прецизен датум.

Меѓу причините, шпанскиот партнер на кинеската компанија ги наведе тарифите на Европската унија за електричните возила од кинеско производство, но извршниот директор Педро Калеф рече дека тие не треба да влијаат на заедничкото вложување бидејќи производството ќе биде лоцирано во Европа.

Во октомври, Шпанија се воздржа од гласањето во ЕУ за дополнителни компензаторни давачки за електричните возила произведени во Кина.

Шефот на Ебро рече дека почетокот на производството е поместен за четвртиот квартал од следната година.

„Проектот не е откажан, само некои елементи се приспособени“, рече Калеф. „Имаме причина да веруваме дека нашиот однос (со Чери) ќе биде цврст со години“, додаде тој.

Chery треба да започне со производство на теренецот Omode 5 во Барселона.

Во април, заедничкото вложување помеѓу Chery и Ebro објави дека планира да произведува до 150.000 возила годишно до 2029 година и дека фабриката во Барселона ќе биде меѓу главните извозни капацитети на Chery.

До 2021 година фабриката ја користеше јапонскиот производител на автомобили Нисан, а пред тоа Ебро.

Новата компанија ќе вработи до 1.250 поранешни работници на Nissan, изјави извршниот директор на Ebrо Рафаел Руиз за Ројтерс.

Ебро ја прекина продажбата во 1987 година, а во меѓувреме го смени брендот и на крајот на годината ќе го произведе првиот спортски теренец, во бензински и plug-in хибридни верзии.

До крајот на годината шпанската компанија има намера да започне со производство на вториот модел на спортско корисно возило, а одложувањето на производството на компанијата што ја основаа со Chery ќе им овозможи и да го поместат почетокот на производството на третиот модел од крајот до средината на следната година.

Во 2025 година, според извршниот директор, тие планираат да произведат меѓу 20.000 и 30.000 возила, кои првично треба да се продаваат првенствено во Шпанија и Андора. Цената ќе биде конкурентна, истакна Кејлеб, без да елаборира.

Ебро сега очекува приход од околу 330 милиони евра следната година и 1,1 милијарда евра во 2027 година.

притисни ентер