Македонија

Парични средства или идеологија–колку руско-украинското боиште е привлечно за граѓаните?

Двеста илјади рубљи или нешто над 2 илјади евра месечно - ова е сумата која Руската федерација вообичаено ја исплаќа на лицата кои одлучуваат да служат во војната во Украина.

Меѓу тие кои служеле до сега, од тоа што е познато се двајца Македонци, кои се пријавиле во септември, едниот од нив загинал, а вториот доби кривична пријава откако се врати во земјава поради учество во странска војска. Двајцата според информациите биле регрутирани преку телеграм, каде броеви за комуникација се лесно достапни, а слични броеви има и на официјалните сајтови за регрутација. На нив, има и цел ценовник, односно за секој преживеан ден се добива по уште 80 евра, а за секој освоен километар окупирана украинска територија или за уништување на украинска воена опрема по 500 евра. Канал 5 стапи во контакт со еден таков центар за регрутација, од каде ни ги кажаа двата клучни услови.

-За да потпишете договор, на вам потребно ви е уверение за познавање на Руски јазик и официјално да сте на територија на Руската Федерација.

-Како да дојдам до Русија од Македонија?

- За тоа како да дојдете до Руската федерација, тоа сами треба да го направите. И доколку јас не знам Руски јазик, јас не можам да заминам во војската?

- За жал не, потребно ви е познавање на руски јазик, да, - Центар за регрутација во Москва.

Двајцата македонски државјани според информациите од МВР, откако контактирале преку Телеграм, заминале за Русија каде потпишале договор да служат во руската војска. Иако станува збор за прв ваков случај со официјална потврда дека лица од земјава заминале на бојните полиња во Украина, од МВР за Канал 5 велат дека ја следат ситуацијата, а за сите за кои постојат сомненија дека се дел од паравоени формации се преземаат активности за проверка во соработка со безбедносно разузнавачките служби. Дека има индиции за македонски државјани во Украина, потврди и министерот за одбрана Владо Мисајловски.

-Немам таква информација, би бил искрен со вас, но заеднички со другите институции мможеме да провериме и да ви ја дадеме, но дека има индиции дека има припадници на тие жаришта, да има,- - Владо Мисајловски – Министер за одбрана.

Руското министерство за одбрана во март годинава објави вкупен број на странски борци и загинати кои според нив, војувале на страната на Украина. Според податоците на руските власти, 30 до 90 лица од земјава се загинати во борбите против руските власти. Но, немаше податоци дали и колку лица од Македонија се борат на руска страна.

Учеството во странски војни е кривично дело во земјава, за кое е предвидена казна затвор од најмалку 4 години.. Досега за ова дело осудени беа неколку десетици повратници од боиштата во Блискиот исток.

Македонија

Вработен во Финансиска полиција осомничен во случајот „Државна лотарија“

Директорот на Управата за финансиска полиција, Слободан Ивановски, за МИА потврди дека има лице од институцијата поврзано со случајот „Државна лотарија“ кое треба да биде спроведено во обвинителство.

На прашање дали има сознанија во врска со изјавата на министерката за финансии, Гордана Димитриеска Кочовска, која на денешната собраниска седница кажа дека поради злоупотреба на буџет е уапсено лице од Управата за финансиска полиција, Ивановски одговори потврдно.

-Да, точно е, има лице од Финансиската полиција поврзано со случајот „Државна лотарија“. Да почекаме да го однесат во обвинителство па ќе споделиме повеќе информации, рече директорот.

МИА се обрати и до Минстерството за внатрешни работи и Јавното обвинителство, од каде ни посочија дека ќе ги проверат наводите и потоа ќе информираат.

Помеѓу осомничените во случајот со Државна лотарија се и поранешниот вицепремиер, Артан Груби и ексдиректорот на Лотарија, Перпарим Бајрами, кои се во бегство.

За двајца од осомничените во случајот постои основано сомнение дека како соизвршители сториле кривично дело – Проневера во службата, а за уште четири лица е поведена постапка за кривично дело – Злоупотреба на службена положба и овластување.

Забава

Почна пријавувањето за Скопскиот маратон 2025

Повторно ќе има четири трки: маратон, полумаратон, трка на 5 километри и штафетен маратон.

Пријавувањето за 21. издание на Виз Ер Скопски Маратон, кое ќе се одржи на 5 октомври, 2025 година почна денес. Заинтересираните можат да се пријават преку официјалната веб-страница на маратонот на линкот http://skopskimaraton.com.mk.

Повторно ќе има четири трки: маратон, полумаратон, трка на 5 километри и штафетен маратон.

Првиот рок за пријавување по најповолна цена е до 10 февруари, 2025 година. Последниот рок за пријавување е до 19 септември, 2025, а сите учесници кои ќе се пријават до 29 август 2025 ќе добијат маица со логото на трката во својот стартен пакет.

Сите учесници кои ќе ја стартуваат трката на 5 октомври ќе добијат вредносен ваучер од 20 евра од генералниот спонзор на маратонот „Wizz Air“.

Свет

Во западна Сирија во тек е операција против милициите кои го поддржуваат Асад

Сириските безбедносни сили спроведуваат операција во западниот дел на земјата против милициите кои го поддржуваат соборениот претседател Башар ал Асад, пренесоа светските агенции, повикувајќи се на државната новинска агенција.

Операцијата е во тек во западната провинција Тартус, населена со малцинството на Алаутите, од каде што потекнува Асад, кој беше соборен на 8 декември од бунтовничките групи.

За време на воените дејствија, „голем број членови на вооружени групи“ лојални на Асад „биле неутрализирани“, соопшти агенцијата, која прецизираше дека целта на операцијата била „да се врати безбедноста, стабилноста и граѓанскиот мир“ во крајбрежната провинција.

Невладината организација Сириска опсерваторија за човекови права соопшти дека за време на денешната операција биле убиени три лица и прецизира дека жртвите биле борци „лојални на претходниот режим“.