Имајќи го предвид квалитетот на противникот кој со максимални пет победи е на првото место во шестата квалификациската група, за очекување е на дуелот кој ќе се игра во Жилина, во недела, најмногу работа да има голманот Томе Пачовски.
- Играме против најдобрата селекција во групата, Тие ја победија и Шпанија. Сепак, ние нема што да загубиме ќе одиме таму да се надигруваме и да направиме позитивен резултат, изјави Пачоски.
Искусниот чувар на мрежата, потврдува дека со доаѓањето на новиот селектор Љубинко Друловиќ, во репрезентацијата владее позитивна атмосфера, и дека Друловиќ внел свежина и новини во работата.
- Се работи за искусен стручњак, кој одлично си ја знае работата. Доколку го спроведеме сработеното на тренинзите и договореното со селекторот и во недела, на мечот против Словачка, сигурен сум дека ќе може да изненадиме и направиме одличен резултат, дополнува Пачоски.
Самиот настап во репрезентативниот дрес на Македонија е дополнителен мотив за секој фудбалер, па затоа Пачоски не се сомнева дека секој кој ќе добие шанса за настап на средба ќе го даде максимумот.
Натпреварот меѓу Словачка и Македонија, ќе се игра во недела во Жилина со почеток од 20 часот и 45 минути.