Опозицијата однесе победа во 4 од најголемите 5 градови во Унгарија, вклучително и Будимпешта.
Во битката за главниот град, кандидатот на прв пат обединетата опозиција, Гергели Карашони кој освои 51 процент од гласовите успеа да го порази кандидатот на Фидес, Иштван Тарлош кој доби 44 проценти од гласовите... Тарлош беше на чело на Будимпешта скоро 10 години.
Карашони победата ја карактеризираше како историска, велејќи дека Будимпешта ќе биде модернизирана и дека ова е огромен чекор кон менувањето на Унгарија и нејзиното автократско уредување.
Власта победи во најголем дел од помалите градови во Унгарија, а во нивни раце остана и вториот најголем град Дебрецин.
Орбан најави соработка со новите градоначалници од опозицијата, но посочи дека овие резултати нема да ја разнишаат владејачката позиција.
Инаку, интересно е што на овие избори право на глас имаше и екс премиерот на Македонија, Никола Груевски, кој од ноември лани се наоѓа во Будимпешта. Унгарскиот веб портал 24 објави дека тој бил на избирачкиот список во Петтиот дистрикт, но без адреса. На фејсбук профилот на Груевски, кој често објавува статуси, нема информација дали го искористил правото да гласа.